«Տնտեսագիտության և միջազգային տնտեսական հարաբերությունների» ամբիոնը ստեղծվել է «Տեսական և ընդհանուր տնտեսագիտության» և «Միջազգային տնտեսական հարաբերությունների» ամբիոնների միաձուլման արդյունքում` 2016թ.-ին:

«Տեսական և ընդհանուր տնտեսագիտության» ամբիոնը (նախկինում՝ «Տնտեսագիտության տեսության» ամբիոն) հիմնադրվել էր 1929թ.-ին, իսկ «Միջազգային տնտեսական հարաբերությունների» ամբիոնը՝ 1991թ.-ին, վերջինս Հայաստանում առաջինն էր իր մասնագիտացման ուղղվածությամբ:

2016 թվականի դեկտեմբերից «Տնտեսագիտության և միջազգային տնտեսական հարաբերությունների» ամբիոնը գլխավորում է Գ. Ս. Գալստյանը: Ամբիոնում աշխատում են 1 ՀՀ ԳԱԱ թղթակից անդամ, 5 պրոֆեսոր, 10 դոցենտ, 5 ասիստենտ և 1 դասախոս: Գործում են «Տնտեսական քաղաքականություն և իրավունք», «Միջազգային տնտեսական հարաբերություններ» մագիստրոսական ծրագրերը:

Ամբիոնն իրականացնում է ֆակուլտետի տնտեսագիտական կրթության հիմնարար՝ «Տնտեսագիտական տեսություն», «Տնտեսագիտական մտքի պատմություն», «Տնտեսական պատմություն», «Համաշխարհային տնտեսություն», «Միջազգային տնտեսագիտություն» և այլ առարկաների դասավանդումը բակալավրիատում և մագիստրատուրայում:

Ամբիոնը սպասարկում է ԵՊՀ այլ ֆակուլտետներում «Տնտեսագիտություն» և տնտեսագիտական այլ դասընթացների, ինչպես նաև տնտեսագիտական ուղղվածությամբ դպրոցներում «Կիրառական տնտեսագիտություն» առարկայի դասավանդումը:

Տնտեսագիտության մեջ մաթեմատիկական մոդելավորման ամբիոնը (նախկինում «Տնտեսական կիբեռնետիկա») հիմնադրվել է 1965 թվականին: Ամբիոնը գլխավորել են գիտությունների թեկնածու, դոցենտ Վ. Ի. Կարաբեկովը, տնտեսագիտության դոկտոր, պրոֆեսոր Յու. Թ. Մովսիսյանը (1972-1974թթ., 1978-1992թթ.), տնտեսագիտության դոկտոր, պրոֆեսոր, Վ. Հ. Թորոյանը (1992-2002թթ.): 2003 թվականից ամբիոնը ղեկավարում է տեխ. գիտությունների դոկտոր, պրոֆեսոր Ա. Հ. Առաքելյանը:

Ամբիոնում աշխատում են 3 պրոֆեսոր, 11 դոցենտ, 10 ասիստենտ և 15 դասախոս:

Ներկայումս ամբիոնի կողմից բակալավրիատում սպասարկվում են ֆակուլտետի երեք մասնագիտություններում դասավանդվող հետևյալ դասընթացները.

Ա. ՄԱԹԵՄԱՏԻԿԱԿԱՆ ԵՎ ԲՆԱԳԻՏԱԿԱՆ ԴԱՍԸՆԹԱՑՆԵՐ
• «Տեղեկատվական տեխնոլոգիաների կիրառման հիմունքներ»
Բ. ԸՆԴՀԱՆՈՒՐ ՄԱՍՆԱԳԻՏԱԿԱՆ ԴԱՍԸՆԹԱՑՆԵՐ
• «Տնտեսագիտական ինֆորմատիկա»
• «Գործույթների հետազոտման մաթեմատիկական մեթոդներ»
• «Տնտեսական իրավիճակների մոդելավորում»
• «Համակարգչային պրակտիկում»
• «Միկրոտնտեսագիտություն»
• «Մակրոտնտեսագիտություն»
• «Էկոնոմետրիկա»
Գ. ՀԱՏՈՒԿ ՄԱՍՆԱԳԻՏԱԿԱՆ ԴԱՍԸՆԹԱՑՆԵՐ
• «Էլեկտրոնային առևտուր»,
• «Օպտիմալ կառավարում»,
• «Բնապահպանական գործընթացների մոդելավորում»:

Ամբիոնի կողմից իրականացվում են երկու մագիստրոսական ծրագիր՝ «Մոդելավորումը ֆինանսատնտեսական համակարգերում» և «Տվյալների գիտությունը բիզնեսում»։ Դրանցից առաջինն իրականացվում է ՀՀ կենտրոնական բանկի հետ համատեղ։
«Տվյալների գիտությունը բիզնեսում» մագիստրոսական ծրագիրը գործում է 2017 թվականից։ Ծրագրի նպատակն է պատրաստել բարձրակարգ մասնագետներ տվյալագիտության բարդ, հետաքրքիր և հեռանկարային ոլորտում: Ծրագիրն ուսանողներին հնարավորություն է տալիս աշխարհում տեղի ունեցող տվյալների հեղափոխության մի մասնիկը դառնալ` տվյալագիտության մեջ տեսական գիտելիքները փոխկապակցելով բիզնեսի պահանջների հետ: ԵՊՀ «Տվյալների գիտությունը բիզնեսում» մագիստրոսական ծրագիրն իրականացվում է Սան Խոսեի պետական համալսարանի (ՍԽՊՀ), Ձեռնարկությունների ինկուբատոր հիմնադրամի ու Ինովացիոն լուծումների և տեխնոլոգիաների կենտրոնի հետ համատեղ՝ PMI Science-ի աջակցությամբ: Մասնավորապես, ձեռք է բերվել համաձայնություն, որ ծրագրի մինչև հինգ ուսանող, երկփուլանի ընտրությունը հաղթահարելու դեպքում, ուսման երկրորդ տարին կարող են շարունակել ՍԽՊՀ «Տվյալների վերլուծություն» մագիստրոսական ծրագրում և բարեհաջող ավարտելուց հետո ստանալ և՛ ԵՊՀ, և՛ ՍԽՊՀ դիպլոմներ։ Այդ նպատակով շարունակաբար ներդաշնակեցվում են երկու ծրագրերի ուսպլանները և ուսուցման գործընթացը։

Ամբիոնի շրջանավարտները բարձրորակ տնտեսագետ-վերլուծաբաններ են, որոնք ունակ են աշխատել տնտեսության բոլոր ոլորտներում: Նրանք կարևոր դերակատարում են ունեցել ինչպես Խորհրդային, այնպես էլ նորանկախ Հայաստանի տնտեսության զարգացման և կառավարման հիմնախնդիրների մշակման և իրականացման գործում:

Ներկայումս ամբիոնի գիտահետազոտական գործունեության հիմնական ուղղություններն են միգրացիոն հոսքերի ուսումնասիրության, շրջակա միջավայրի տնտեսագիտության, կազմակերպության /ֆիրմայի/ տնտեսագիտության և ՀՀ-ում տարածքային համաչափ զարգացման հիմնախնդիրները:

Ամբիոնը հիմնադրվել է 1996 թվականին: Հիմնադիր ամբիոնի վարիչն է եղել տնտեսագիտության դոկտոր, պրոֆ. Հայկ Լևոնի Սարգսյանը: 2003-2016 թթ.-ին ամբիոնը գլխավորել է տնտեսագիտության դոկտոր, պրոֆեսոր Սարգիս Լևոնի Ղանթարջյանը: 2016 թվականիցից մինչ օրս ամբիոնը գլխավորում է տնտեսագիտության թեկնածու, դոցենտ Կառլեն Գագիկի Խաչատրյանը:

Ամբիոնում աշխատում են 5 պրոֆեսոր, 15 դոցենտ, 9 ասիստենտ և 3 դասախոս։

Առանձին դասընթացներ դասավանդելու համար հրավիրվում են համապատասխան բնագավառների մասնագետներ, ինչը հնարավորություն է ընձեռում ակադեմիական կրթությունը զուգակցելու գործնական հմտությունների հետ:

Ամբիոնում գործում են «Գործարար վարչարարություն (կառավարում)» և «Պետական կառավարում և տեղական ինքնակառավարում» մագիստրոսական ծրագրերը: Աշխատակիցների կողմից տպագրվել են տասնյակ դասագրքեր, մենագրություններ, ուսումնական և ուսումնամեթոդական ձեռնարկներ, բացմաթիվ գիտական հոդվածներ: Ամբիոնի աշխատակիցները մշտապես մասնակցում են տարբեր միջազգային գիտաժողովների և կոնֆերանսների, արժանանում գիտության ոլորտում ձեռքբերումների համար տարբեր մրցանակների: Մասնավորապես, 2011 թ. հուլիսի 22-ին ֆակուլտետի դեկան, ամբիոնի պրոֆեսոր Հ. Սարգսյանը Սինգապուրում արժանացել է 2011թ. «Տնտեսագիտության լավագույն պրոֆեսոր» կոչմանը:

Ամբիոնի աշխատակիցները վերապատրաստվել են աշխարհի տարբեր հանրահայտ բուհերում` Կալիֆոռնիայի պետական համալսարանում, Հարվարդի համալսարանում, Ռուսաստանում, Հունաստանում, Բուլղարիայում:

«Ֆինանսահաշվային» ամբիոնը ստեղծվել է 2001 թվականին: Ամբիոնի առաջին վարիչը եղել է ճանաչված գիտնական, պետական և հասարակական գործիչ, տնտեսագիտության թեկնածու, դոցենտ Լևոն Միսակի Դավթյանը։ 2004-2007 թվականներին ամբիոնը ղեկավարել է տնտեսագիտության դոկտոր, պրոֆեսոր Վարդան Բաբկենի Բոստանջյանը: 2008 թվականից ամբիոնը ղեկավարում է տնտեսագիտության դոկտոր, պրոֆեսոր Հայկ Գերասիմի Մնացականյանը:

«Ֆինանսահաշվային» ամբիոնի ստեղծման օրվանից տարվել և տարվում են հետևողական աշխատանքներ պրոֆեսորադասախոսական բարձր որակավորում ունեցող անձանակազմի ձևավորման, գիտամանկավարժական պահանջվող մակարդակի ապահովման, կրթական և մասնագիտական ծրագրերի մշակման ներդրման, ուսումնական գործընթացի արդյունավետության բարձրացման, գիտահետազոտական գործունեության ծավալման ուղղություններով: Արդյունքում, ամբիոնում առկա են բոլոր այն պայմանները, որոնք անհրաժեշտ են հանրապետության կրթահամակարգի բոլոր մակարդակներում գիտամանկավարժական և գիտահետազոտական արդյունավետ գործունեություն իրականացնելու համար: Ելնելով կրթական ծառայությունների որակին ներկայացվող պահանջների կտրուկ բարձրացումից՝ ամբիոնը ուսումնական գործընթացի կատարելագործման, կրթական ժամանակակից տեխնոլոգիաների կիրառման, ինչպես նաև դասախոսների մասնագիտական մակարդակի արդիականացման ճանապարհով ծավալում է համակողմանի գործունեություն նշված պահանջների բավարարման համար:

«Ֆինանսահաշվային» ամբիոնում վերանայվել և արդիականացվել են բակալավրիատում և մագիստրատուրայում ամբիոնի կողմից դասավանդվող առարկաների ուսումնական ծրագրերը: Ամբիոնի մագիստրատուրայում գործում են «Ֆինանսներ, դրամաշրջանառություն և վարկ», «Հաշվապահական հաշվառում և աուդիտ» և «Բանկային գործունեության կազմակերպում» մագիստրոսական ծրագրերը:

Մագիստրոսական ծրագրերում դասավանդվում են հետևյալ հիմնարար առարկաները՝ «Դրամավարկային քաղաքականություն», «Բանկային մենեջմենթ», «Կորպորատիվ ֆինանսներ», «Ներդրումային քաղաքականություն», «Գործարարական իրավունք», «Հարկային վարչարարություն», «Մաքսային վարչարարություն», «Հարկաբյուջետային քաղաքականություն», «Ֆինանսական հաշվառում», «Կառավարչական հաշվապահություն», «Հաշվապահական հաշվառման ստանդարտներ», «Աուդիտի հիմունքներ»:

Ամբիոնի աշխատանքներում հիմնական դասախոսների հետ միասին ընդգրկված են նաև ՀՀ բանկային, հարկային, մաքսային և տնտեսության այլ ոլորտների փորձառու մասնագետները: Ամբիոնի աշխատակիցների թվում դասավանդում են 2 պրոֆեսոր և 10 դոցենտ։

Բացի մագիստրոսական ծրագրերից, ամբիոնը բակալավրիատում դասավանդում է նաև հետևյալ առարկաները՝ «Հաշվապահական հաշվառում», «Ֆինանսներ», «Բանկային գործ», «Ռիսկերի կառավարում և ապահովագրություն», «Կառավարչական հաշվառում», «Վարկային գործառնություններ», «Բանկային նոր տեխնոլոգիաներ», «Պետական ֆինանսական համակարգեր»:

«Նորարարության տնտեսագիտություն» ամբիոնը հիմնադրվել է 2019 թ.-ին: Ամբիոնի վարիչն է տնտեսագիտության դոկտոր, պրոֆեսոր Աշոտ Խաչատուրի Մարկոսյանը։

Ամբիոնի ստեղծումը պայմանավորված է բարձրագույն կրթության ոլորտում որդեգրված՝ գիտության ոլորտում նորարարական գործունեության զարգացման, ինչպես նաև Հայաստանի Հանրապետության բարձրագույն կրթության, գիտության և նորարարական մշակումների մրցունակությունը ու միջազգայնացումը խթանելու, դրանք միջազգային զարգացման միտումներին և Հայաստանի Հանրապետության սոցիալ-տնտեսական զարգացման ծրագրերին համահունչ դարձնելու նպատակներով:
Ամբիոնում գործում է «Ինովացիոն կառավարում» մագիստրոսական ծրագիրը:

Ամբիոնում աշխատում են 3 տնտեսագիտության դոկտոր, պրոֆեսոր, 1 դոցենտ, 3 ասիստենտ։
Ամբիոնի բոլոր դասախոսներն ունեն աշխատանքային հարուստ կենսափորձ ՀՀ տնտեսության առանցքային այնպիսի ոլորտներում, ինչպիսիք են՝ պետական կառավարման համակարգը, արտոնագրման և հեղինակային իրավունքների պաշտպանությունը, սոցիալական ծառայությունները և այլն:

Ամբիոնի դասախոսների գործունեությունն արժանացել է բարձր գնահատականի՝ ՌԴ Նախագահի (ԱՊՀ շրջանակում), ՀՀ Նախագահի, ՀՀ Ազգային ժողովի, ՀՀ վարչապետի կողմից բարձր պարգևների և խրախուսանքների շնորհմամբ:

XX-XXI դարերի սահմանագլխին սկիզբ առած և հասարակությունում ընթացող տնտեսական, տեխնոլոգիական, իրավական, սոցիալական և ժողովրդավարական վերափոխումների ծրագրային նպատակների և փաստացի արդյունքների ուժգնացող խզումը նոր և առավել արդյունավետ լուծումների պահանջ է առաջադրում: Եվ այդ լուծման բաղադրիչներից մեկը սահմանադրականության դեֆիցիտի հաղթահարումն է:

ԵՊՀ Տնտեսագիտության և կառավարման ֆակուլտետի Սահմանադրական տնտեսագիտության գիտավերլուծական կենտրոնը /այսուհետ՝ Կենտրոն/ ստեղծվել է 2016թ-ին, որի գործունեությունը նպատակաուղղված է սահմանադրականության մշտադիտարկման ու կառավարման, տնտեսության ինստիտուցիոնալ զարգացման հիմնախնդիրների վերաբերյալ հետազոտությունների իրականացմանը, գիտագործնական լուծումների առաջադրմանը:

Կենտրոնի խնդիրներն են.
• մշակել երկրների սահմանադրական ախտորոշման, մշտադիտարկման և կառավարման մեթոդական մոտեցումներ,
• մշակել սահմանադրականության մակարդակի գնահատման ինդիկատորների համակարգ, հարցումների անցկացման միասնական մեթոդաբանություն և գործընկեր կազմակերպությունների հետ համատեղ ստեղծել միասնական տվյալների բազաներ,
• մշակել տարբեր ոլորտներին առնչվող տնտեսական քաղաքականության սկզբունքներ՝ հաշվի առնելով սահմանադրական նորմերի ազդեցության գործառութային, կառուցակարգային հնարավորությունները և կիրառելիության առանձնահատկությունները,
• ստեղծել համագործակցող գիտահետազոտական և վերլուծական կազմակերպությունների, շահագրգիռ կարգավորող մարմինների, ինչպես նաև սահմանադրականության ոլորտի անհատ հետազոտողների լայն ցանց,
• մատուցել կրթական ծառայություններ սահմանադրական տնտեսագիտությանն առնչվող առանձին դասընթացների մշակման ու վերապատրաստումների ծրագրերի միջոցով:

Կենտրոնի աշխատանքներին մասնակցում են ԵՊՀ ֆակուլտետների և այլ բուհերի ուսանողները, մագիստրանտները, ասպիրանտները և այլ հետազոտողներ:

Կենտրոնի աշխատանքների իրականացմանն աջակցում են՝
• ՀՀ կառավարությունը,
• ՀՀ Կենտրոնական Բանկը,
• ՀՀ Սահմանադրական դատարանը,
• «Սահմանադրական մշակույթ միջազգային վերլուծական կենտրոն» հիմնադրամը:
• Ֆիզիկական անձիք

Կենտրոնի գործունեության միջոցով ակնկալվում է իրականացնել սահմանադրական տնտեսագիտության հիմնախնդիրներին առնչվող հիմնարար հետազոտություններ: