ԵՊՀ Հայոց պատմության ամբիոնը մայր բուհի հասակակիցն է և ստեղծվել է նրա հետ միաժամանակ: Ամբիոնի առաջին վարիչն է եղել ականավոր հայագետ, Համալսարանի ռեկտոր Հ. Հ. Մանանդյանը: Այնուհետև հաջորդաբար ամբիոնի վարիչներ են եղել նշանավոր պատմաբաններ Հ. Ն. Զորյանը, Ս. Պ. Պողոսյանը, Հ. Գ. Ժամկոչյանը, Ա. Գ. Աբրահամյանը, Մ. Գ. Ներսիսյանը, Վ. Ա. Պարսամյանը, Լ. Ա. Խուրշուդյանը, Հր. Ռ. Սիմոնյանը, Բ. Հ. Հարությունյանը, Պ. Հ. Հովհաննիսյանը: 2016 թ. ամբիոնի վարիչն է Ա. Ե. Մովսիսյանը:

Հայոց պատմության ամբիոնը իր գոյության ավելի քան 95 տարիների ընթացքում իրավամբ դարձել է հայ պատմագիտական դպրոցի կարևորագույն կենտրոններից մեկը: Տարբեր տարիներին այստեղ դասավանդել ու դասավանդում են ԽՍՀՄ ԳԱ ակադեմիկոս Հ. Հ. Մանանդյանը, Հայաստանի ԳԱ ակադեմիկոսներ Մ. Գ. Ներսիսյանը, Բ. Գ. Ղարիբջանյանը, Գ. Խ. Սարգսյանը, Հր. Ռ. Սիմոնյանը, Լ. Ա. Խուրշուդյանը, Վլ. Բ. Բարխուդարյանը, Ա. Ա. Մելքոնյանը, թղթ. անդամ Ա. Ա. Սիմոնյանը, անվանի պատմաբաններ Լեոն, Հ. Զորյանը, Խ. Սամուելյանը, Ա. Գ. Աբրահամյանը, Ս. Պ. Պողոսյանը, Հ. Գ. Ժամկոչյանը, Կ. Ս. Խուդավերդյանը, Ստ. Տ. Մելիք-Բախշյանը, Բ. Հ. Հարությունյանը. ի դեպ նրանց մեծ մասը նույն ամբիոնի շրջանավարտներ են: Այժմ ամբիոնում դասավանդում են 34 դասախոս, այդ թվում՝ ԳԱԱ 1 ակադեմիկոս, 1 թղթակից անդամ, 6 պրոֆեսոր և 11 դոցենտ: Ամբիոնը հանրապետության պատմաբան կադրերի պատրաստման գլխավոր կենտրոնն է, այստեղ իրենց ուսումնառությունն են ստացել հազարավոր պատմաբան-շրջանավարտներ, հարյուրավոր մագիստրոսներ, հայցորդներ, ասպիրանտներ:

Ներկայումս ամբիոնում են սովորում 10 ասպիրանտ և մեծ թվով հայցորդներ: Նշելի է, որ «Հայոց պատմություն» առարկան դասավանդվում է համալսարանի բոլոր ֆակուլտետներում, իսկ բուն ֆակուլտետում, բացի այդ առարկայից դասավանդվում են նաև հայոց պատմության աղբյուրագիտություն, պատմագրություն, դրամագիտություն, վիմագրություն, Հայաստանի պատմական աշխարհագրություն և բազմաթիվ այլ մասնագիտական առարկաներ:

Ամբիոնը նաև նշանակալի դերակատարություն ունի պատմագիտության ամենատարբեր բնագավառներին նվիրված իր ուսումնասիրություններով:

Ամբիոնի աշխատակիցների կողմից լույս են ընծայվել ավելի քան 1200 մենագրություն՝ շուրջ կես միլիոն մամուլ ծավալով: Այդ աշխատանքները նվիրված են հայոց պատմության բոլոր պատմաշրջաններին և հիմնախնդիրներին: Մասնավորապես նշանակալի են վերջին շրջանում հայոց ազատամարտի, Հայկական հարցի, ազգային գաղափարախոսության, Արցախի հիմնահարցի ուսումնասիրության բնագավառներում կատարված աշխատանքները:

Ամբիոնը առանձնահատուկ և առաջնային դերակատարություն ունի հանրապետության բուհերի և դպրոցների «Հայոց պատմություն» առարկայի ուսումնական ծրագրերի, դասագրքերի, ձեռնարկների, քարտեզների պատրաստման և հրատարակության գործում: Անցած տարիների ընթացքում լույս են տեսել ամբիոնի անդամների կողմից հեղինակված հանրակրթական և ավագ դպրոցների հայոց պատմության բոլոր դասագրքերը, բուհական բազմաթիվ դասագրքեր ու ձեռնարկներ, քրեստոմատիաներ, ուսումնական ու մասնագիտական բազմաթիվ քարտեզներ ու ատլասներ:

Ամբիոնի անդամները գործուն մասնակցություն են ցուցաբերում համալսարանական, հանրապետական ու միջազգային գիտաժողովներին: Ամբիոնի նախաձեռնությամբ հայագիտության ամենատարբեր հարցերի վերաբերյալ կազմակերպվում են գիտական նստաշրջաններ ու բանավեճեր:

Հայաստանի հարակից երկրների պատմության ամբիոնը ստեղծվել է 1998 թ․, ավելի վաղ համալսրանում գործող ԽՍՀՄ և ԽՄԿԿ պատմության ամբիոնների հիմքի վրա։ Նրա առջև խնդիր էր դրված ուսանողներին դասավանդել այն երկրների (Ռուսաստան, Իրան, Թուրքիա, Վրաստան, Ադրբեջան) պատմությունը, որոնք սերտ առնչություններ են ունեցել մեր ժողովրդի հետ: Անհրաժեշտություն էր զգացվում վերագնահատել և նորովի արժեքավորել Հայաստանի հարակից երկրների հետ մեր փոխհարաբերությունների պատմությունը, իրատեսական պատկերացում ունենալ հարևան պետությունների վերաբերյալ:

Մասնավորապես` հանրապետության համար առաջնահերթ կարևորություն են ներկայացնում Կովկասի երկրները, որոնց հետ փոխհարաբերությունները անցյալում միջնորդավորված են եղել: Ուստի այդ երկրների մասին մեզանում գերիշխել են այն տեսակետները, որոնք ձևավորվել են` ելնելով ռուսական(խորհրդային) քաղաքականության դրույթներից: Վերջին տարիների ընթացքում դիտվում է նաև արևմտյան երկրների հետաքրքրություններով թելադրված հայացքների տարածում: Կասկած չի կարող լինել, որ օտար պետությունների և մշակույթների պարտադրած պատկերացումները և տեսակետները էականորեն խանգարում են հարևան երկրների հետ բնականոն հարաբերությունների զարգացմանը: Բակալավրիատի և մագիստրատուրայի դասընթացներ մշակելիս մտցվում են այնպիսի նոր կուրսեր, հաշվի կառնեին Հայաստանի Հանրապետության շահերն ու հետաքրքրությունները: Ելնելով ժամանակի պահանջներից` ամբիոնում 2009 թ․ մշակվեց «կովկասագիտություն» մասնագիտությամբ մագիստրոսական ծրագիր։

Կովկասագիտության գծով կատարվող աշխատանքները նոր աստիճանի բարձրացվեցին 2011 թ․, երբ ֆակուլտետի կազմում բացվեց Կովկասագիտության առանձին բաժին, որի ուսումնական ծրագրի մշակման ու սպասարկման աշխատանքները իրականացնում են ամբիոնի դասախոսները: Մասնավորապես` ուսանողները հնարավորություն ունեն ուսումնասիրել Կովկասի երկրների պատմությունը, հնագիտությունը և ազգագրությունը, ինչպես նաև յուրացնել վրացերեն ու ադրբեջաներեն լեզուները:

2005 թ. ԵՊՀ-ի ընդհանուր պատմության ամբիոնը վերանվանվել է Համաշխարհային պատմության ամբիոն: Ամբիոնը ընդգրկում է համաշխարհային պատմությունը հնագույն շրջանից մինչև մեր օրերը: Այժմ ամբիոնում աշխատում է 14 դասախոս, որոնք համաշխարհային պատմության տարբեր դարաշրջանների և շրջափուլերի վերաբերյալ հանրապետության ճանաչված մասնագետներն են:

ԵՊՀ ընդհանուր պատմության ամբիոնը կազմավորվել է 1952 թ. Հին աշխարհի և Նոր պատմության ամբիոնների միավորման արդյունքում՝ ակադեմիկոս Աբգար Հովհաննիսյանի ղեկավարությամբ: Տարբեր տարիներին ամբիոնում աշխատել են նշանավոր գիտնականներ և դասախոսներ պ.գ.դ., պրոֆեսոր Ստ. Ներսիսյանը, Գր. Միքայելյանը, Ջ. Կիրակոսյանը, Վ. Դիլոյանը, դոց. Գ. Հարությունյանը և այլք: 1998 թվականից ամբիոնի վարիչն է պրոֆեսոր Ալբերտ Ստեփանյանը:

Ուսումնամեթոդական ընդգրկմամբ ամբիոնը ներկայացնում է համաշխարհային պատմությունը` սկսած հին արևելյան քաղաքակրթությունից մինչև մեր օրերը: Ամբիոնում դասավանդվում են Հին աշխարհի, Միջնադարի և Նոր ու նորագույն պատմության ամենատարբեր հիմնահարցերին վերաբերող դասընթացներ, որոնց ծրագրերը մշակվել են արդի բուհական մանկավարժության սկզբունքների համաձայն և հրատարակվել են: Ամբիոնի դասախոսներից մասնակցել են բուհական 12 և հանրակրթական դպրոցների 15 դասագրքերի ստեղծման աշխատանքներին:

1960-ական թթ. ի վեր ամբիոնում «երկաստիճան» կրթական համակարգով մասնագիտացել է շուրջ 600 ուսանող, իսկ ապա «եռաստիճան» կրթական համակարգով և մագիստրատուրայով՝ շուրջ 150 ուսանող, որոնք աշխատում են գիտության և մշակույթի տարբեր բնագավառներում: Համաշխարհային պատմության ամբիոնի 21 մագիստրոսներ թեկնածուական ատենախոսություն են պաշտպանել Հայաստանում և արտերկրում:

Տարիներ ի վեր ամբիոնի գիտահետազոտական աշխատանքն ընթացել է մի քանի հիմնական ուղղություններով` «Մինչարդյունաբերական, արդյունաբերական և հետարդյունաբերական քաղաքակրթությունների հիմնահարցեր», «Հայաստանը Արևելք-Արևմուտք քաղաքակրթական առնչությունների ծիրում», «Համաշխարհայնացումը հայոց պատմության համատեքստում», «Պատմագիտական միտք և հանրութային կյանք» և այլն: Ավելի քան 60 տարիների ընթացքում ամբիոնի անդամները հրատարակել են շուրջ 25 մենագրություն և 600 հոդված՝ Հայաստանում և արտասահամանում:

Այժմ ամբիոնին կից գործում է «Համաշխարհային քաղաքակրթությունները և դրանց տիպաբանությունն ու պատմությունը» վերտառությամբ գիտատեսական սեմինարը:

2006 թ. ամբիոնի հիման վրա ստեղծվել է «Համաշխարհային պատմության հայկական ասոցիացիա» հասարակական կազմակերպությունը և ամբիոնի հետ համատեղ կազմակերպվում են թե՛ հանրապետական և թե՛ միջազգային գիտաժողովներ՝ «Անհատը պատմության հոլովույթում 1, 2», «Լուսավորական դարաշրջանը Եվրոպայում» և այլն:

Ամբիոնի աշխատակիցների ջանքերով հրատարակվում են արդի պատմագիտության և հումանիտար մտքի հիմնարար խնդիրներին նվիրված գիտական աշխատությունների ժողովածուներ` «Պատմություն և կրթություն 1-4», «Ինքնության հարցեր 1-2», «Պատմության հարցեր 1-2», «Անհատը պատմության հոլովույթում 1, 2»: Ճանաչված գիտնականների կողքին դրանց իրենց մասն են բերում նաև ամբիոնի առավել հեռանկարային ուսանողները:

Միջազգային կապեր և համագործակվություն: Ամբիոնի դասախոսները հրավիրվում են դասախոսությունների Եվրոպայի և Ամերիկայի տարբեր համալսարաններ՝ Միչիգան, Բոստոն, Հարվարդ, Կրակով և այլն: Բացի տեղական հաստատություններից` ամբիոնի անդամներն իրենց որակավորման բարձրացում անցկացրել են նաև Թեսալոնիկի, Բոստոնի, Մոսկվայի, Պետերբուրգի, Տոմսկի, Նովգորոդի համալսարաններում:

Յուրաքանչյուր տարի բացի պլանային դասընթացներից, ամբիոնի մագիստրանտների և բակալավրատի ուսանողների համար արտասահմանյան գիտնականների մասնակցությամբ կազմակերպվում են դասախոսություններ: Ամբիոնի դասախոսները ակտիվորեն մասնակցում են միջազգային գիտաժողվների և սեմինարների՝ Մոսկվա, Ս. Պետերբուրգ, Փարիզ, Վարշավա, Հռոմ, Քեմբրիջ, Օքսֆորդ, Բոստոն, Նեապոլ, Աթենք, Թեսալոնիկ, Թբիլիսի, Վիեննա, Անն Արբոր, Բոստոն, Օսլո, Բրաունշվիգ և այլն:

Երևանի պետական համալսարանի հիմնադրումից հետո` 1921 թ., նշանավոր հնագետ Աշխարհբեկ Քալանթարը հրավիրվում է դասախոսություններ կարդալու: Հենց նույն տարում նա հիմնում է Հին Արևելքի պատմության և հնագիտության ամբիոնը: Հնագիտության առարկայի դասավանդումը նրանից հետո շարունակել է Սմբատ Տեր-Ավետիսյանը` մինչև 1940 թ.: Նրանից հետո դադարեցվել է հնագիտության ամբիոնի գործունեությունը:

1968 թ. մայիսին համալսարանի ռեկտորատի նախաձեռնությամբ որոշվեց պատմության ֆակուլտետում կազմակերպել հնագիտության, աղբյուրագիտության և ազգագրության ամբիոն պրոֆ. Ա. Գ. Աբրահամյանի գլխավորությամբ:

Ամբիոնի կյանքում կարևոր դեր խաղաց նաև ուսումնական գործընթացին այնպիսի խոշոր գիտնականնների ներգրավվածությունը, ինչպիսիք են Բ. Առաքելյանը, Կ. Ղաֆադարյանը և Բ. Պիոտրովսկին: 1975 թ. ամբիոնը վերանվանվում է հնագիտության և ազգագրության ամբիոն, որը մինչև 1982թ. ղեկավարում է հնագետ, պրոֆ. Թ. Խաչատրյանը: 1983 թ. ամբիոնը գլխավորեց պրոֆ. Ս. Եսայանը: Նշված ժամանակաշրջանում ամբիոնի աշխատակիցների ջանքերով հետազոտվեցին մի շարք հանգուցային հուշարձաններ:

1989 թ. ստեղծվեց ազգագրության ամբիոն, որի ղեկավարությունը ստանձնեց դոց. Յու. Մկրտումյանը: 1994 - 2000 թթ. ամբիոնը ղեկավարում էր Հր. Խառատյանը, մինչև 2004 թ.` կրկին Յուրի Մկրտումյանը: 2004 թ.-ին հնագիտության և ազգագրության ամբիոնները նորից վերամիավորվեցին մեկ ամբիոնի կազմում: 2001 թվականից հնագիտության ամբիոնի վարիչի պարտականությունները ստանձնեց պրոֆ. Ի. Ղարիբյանը:

2002 թ. ամբիոնի աշխատակիցների ջանքերով ֆակուլտետում բացվեց մշակութաբանության բաժինը: 2009 թ. Հնագիտություն և ազգագրության ամբիոնի վարիչն է պ.գ.դ., պրոֆեսոր Հ. Ավետիսյանը:

Ամբիոնի աշխատակիցները արդյունավետ գիտական և դաշտային հետազոտություններ են իրականացնում, ինչպես հանրապետությունում այնպես էլ արտասահմանում, պեղվել են քարի դարից մինչև միջնադար բազմաթիվ նշանավոր հուշարձաններ:

Կրթական ծրագրերի շրջանակներում ամբիոնը սերտ համագործակցություն է ծավալել նաև պատմության ֆակուլտետի ամբիոնների հետ: Հատկապես կարևոր է ԵՊՀ գիտական կենտրոնների և այլ ամբիոնների՝ մասնավորապես կենսաբանության ֆակուլտետի հետ լաբորատոր աշխատանքները:

Ամբիոնի համար բազային կառույց է հանդիսանում ԵՊՀ հայագիտական հետազոտությունների ինստիտուտի հնագիտական հետազոտությունների լաբորատորիան:

Այսօր հնագիտության և ազգագրության ամբիոնում դասավանդում են մի շարք ճանաչված դասախոս գիտնականներ, ՀՀ ԳԱԱ թղթակից անդամներ՝ Պ.Ավետիսյանը, Լ. Աբրահամյանը, Մ. Հասրաթյանը, պրոֆեսորներ՝ Ի. Ղարիբյանը, Ռ. Նահապետյանը, Հ. Ավետիսյանը, դոցենտներ՝ Ա. Պետրոսյանը, Հ. Հակոբյանը, Մ. Գաբրիելյանը, Ա. Գնունին, Ա. Բոբոխյանը, Հ. Հարությունյանը:

Ամբիոնը ունի երեք ասպիրանտ և մեկ հայցորդ, որոնք ներգրավված են գիտակրթական ծրագրերում:

Ամբիոնի աշխատակիցների ջանքերով հրատարակվել են մեծ քանակությամբ մենագրություններ, դասագրքեր, գիտական հոդվածներ ոչ միայն հանրապետությունում, այլև արտասահմանում:

Երևանի պետական համալսարանի Հայ արվեստի պատմության և տեսության ՅՈւՆԵՍԿՕ-ի ամբիոնը ստեղծվել է 1996 թ.: Իր հիմնադրման օրից ամբիոնը պատասխանատվություն է կրում նույն ժամանակ ստեղծված արվեստաբանության բաժնի համար: Դասախոսական անձնակազմի մեջ աշխատել են այնպիսի մասնագետներ, որոնք հանդիսանում են ոչ միայն Հայաստանի, նաև ռուսական և այլ ուսումնական կենտրոնների շրջանավարտներ: ՀՀ ԳԱԱ արվեստի ինստիտուտից, Մ. Մաշտոցի անվան Մատենադարանից և Ազգային պատկերասրահից, Երևանի պետական գեղարվեստի ակադեմիայից, Ռուս արվեստի թանգարանից պատմության ֆակուլտետի արվեստաբանության բաժնում դասավանդելու համար հրավիրվել են մասնագետներ:

Հայ արվեստի պատմության ամբիոնը արվեստաբանության բաժնի ուսանողների համար կազմակերպում է հայ արվեստի պատմություն, ճարտարապետություն, կիրառական արվեստ, թանգարանագիտություն, երաժշտության, կինոյի պատմություն և համաշխարհային արվեստի պատմություն առարկաների դասավանդումը: Դասախոսություններն ընթանում են հայերենով և ռուսերենով: Ամբիոնի անդամները առանձին - առանձին կամ միասին գործուն մասնակցություն են ցուցաբերում հանրապետական և միջազգային գիտաժողովներին` հանդես գալով զեկուցումներով, ինչպես նաև դասախոսություններ են կարդում տարբեր երկրների համալսարաններում և թանգարաններում:

Հայ արվեստի պատմության և տեսության ամբիոնը Երևանում, Զալցբուրգում, Մոսկվայում, Բուխարեստում կազմակերպել է միջազգային կոնֆերանսներ հայ արվեստի խնդիրների վերաբերյալ: 2012 թ. սկսած ամբիոնի անձնակազմի ջանքերով սկսվել է Ռումինիայի քաղաքներում պահվող հայ արվեստի գանձերի ուսումնասիրությունը և գիտական համագործակցությունը ռումինացի մասնագետների հետ:

Տարիներ շարունակ ամբիոնում ծավալված է գիտահետազոտական լայն գործունեություն, որն ընդգրկում է հայ արվեստի պատմության տարբեր ժամանակաշրջանների հիմնահարցերը:

Հայ արվեստի պատմության ամբիոնը ստեղծել է Հայ արվեստի գրադարանը և որպես նվիրատվություն` գրքեր է ստացել հայաստանյան և այլ երկրների հաստատություններից ու անհատներից:

ԵՊՀ Մշակութաբանության բաժինը որպես պատմության ֆակուլտետի առանձին ստորաբաժանում գործում է 2002 - 2003 ուսումնական տարվանից: Բաժինն սկզբում ուներ միայն բակալավրիատ, իսկ 2006 - 2007 ուստարում բացվել է նաև մագիստրատուրա: Բաժինը մասնագետներ է պատրաստում մշակութաբանություն, մշակույթի տեսություն և պատմություն, մշակութային քաղաքականություն և ժամանակակից մշակութային գործընթացներ, պատմության և մշակութաբանության դասավանդում մասնագիտությունների գծով:

ԵՊՀ Մշակութաբանության ամբիոնը բացվել է 2007 թ. հունվարին` Երևանի պետական համալսարանի պատմության ֆակուլտետի կազմում: Այն ֆակուլտետի մշակութաբանության բաժնի ուսումնական ծրագրերի կազմողն ու դասընթացների իրականացման պատասխանատուն է, ինչպես նաև համահամալսարանական «Մշակութաբանություն» առարկայի դասավանդումն իրականացողը:

Ներկայումս Մշակութաբանության բաժնում մասնագիտական ուսուցումը տարվում է հետևյալ երեք հիմնական համալիրներով. Մշակութաբանության և մշակույթի տեսության համալիրը ներառում է մշակութաբանության ներածություն, մշակույթը հումանիտար գիտությունների համակարգում, մարդաբանություն, մշակութային մարդաբանություն, մշակույթի փիլիսոփայություն, մշակույթի սոցիոլոգիա, հնագիտություն, ազգագրություն, էթնոսոցիոլոգիա, քաղաքական մշակութաբանություն, մշակութային փոխառնչություններ, մշակույթի մասին տեսությունների պատմություն, մասնագիտության արդի խնդիրներ դասընթացները և մշակույթը հետազոտող մի շարք այլ գիտական համակարգեր: Մշակույթի պատմության համալիրը ներառում է երկու բլոկ` Համաշխարհային մշակույթի պատմություն և Հայ մշակույթի պատմություն:

ԵՊՀ ռեկտորի և ամբիոնի մեկտարյա ջանքերի շնորհիվ 2008 թ. սեպտեմբերին ԲՈՀ-ի կոլեգիայի նիստը որոշում է կայացրել գիտական աստիճանների շնորհման անվանացանկում Մշակութաբանությունը ներառելու մասին (Փիլիսոփայություն, Թ0006, Մշակութաբանություն, Փիլիսոփայական գիտություններ, Պատմական գիտություններ): Ամբիոնն այսօր ունի Մշակութաբանության մասնագիտության գծով իր առաջին ասպիրանտներն (առկա ուսուցմամբ` 1, հեռակա` 2) ու հայցորդները: Կարճ ժամանակում ամբիոնում ստեղծվել է փորձառու դասախոսական կազմ, որի ջանքերով այսօր իրականացվում է մշակույթի ոլորտին վերաբերող տեսական և պրակտիկ հիմնական գիտակարգերի դասավանդումը:

Նորաստեղծ ամբիոնը լուրջ գործունեություն է ծավալել գիտահետազոտական աշխատանքների բնագավառում: Ամբոնի վարիչ Համլետ Պետրոսյանը արդեն հինգերորոդ տարին է` ղեկավարում է Արցախի Տիգրանակերտի հնագիտական հետազոտության աշխատանքները: Մասնակցության արդյունքում ուսանողները ստեղծել են «Տիգրանակերտին աջակցողներ» ուսանողական ակումբը, որը իր գորունեությունը սկսեց դեկտեմբերին «Մենք Տիգրանակերտում» խորհագրով ցուցահանդեսի ցուցադրությամբ:

Ամբիոնի դասախոսները իրականացնում են ակտիվ գիտահետազոտական գործունեություն մշակութաբանության, մշակութային մարդաբանության և մշակութային ժառանգության բնագավառներում: Ավանդական և ժամանակակից երաժշտական մշակույթի և թանգարանագիտության մասնագետ Հ. Պիկիչյանը հանդիսանում է «Թանգարան» ամսագրի գլխավոր խմբագիրը և Թանգարանային աշխատակիցների ու նրանց բարեկամների ասոցիացիայի նախագահը: Նրա ջանքերի շնորհիվ բաժնի բազմաթիվ ուսանողները ներգրավվում են թանգարանային գործունեության մեջ: Ն. Մարգարյանը ակտիվ հետազոտություններ է իրականացնում անունների մարդաբանության և երիտասարդական շարժումների բնագավառներում: Յու. Անտոնյանը հետազոտում է ժամանակակից կրոնական գործընթացներ, ինչպես նաև հանդիսանում է Եվրոպայի խորհրդի կողմից ֆինանավորվող Մշակութային Քաղաքականության կոմպենդիում ծրագրի Հայաստանի ներկայացուցիչը (http://www.culturalpolicies.net/web/index.php): Կոմպենդիումի համալրման վերջին աշխատանքների մեջ ակտիվ մասնակցություն է ցուցաբերել նաև ամբիոնի մագիստրատուրայի ուսանողներից մեկը: Ռ. Մկրտչյանը ակտիվորեն ընդգրկում է ուսանողներին հնագիտական պեղումների արդյունքների մարդաբանական զննման գործընթացում:

Բաժնի բոլոր դասախոսները տպագրվում են տեղական և արտասահմանյան ամսագրերում, ինչպես նաև ակտիվորեն մասնակցում են բազմաթիվ տեղական և միջազգային հետազոտական ծրագրերին, սեմինարներին և կոնֆերանսներին: Ամբիոնի դասախոսները նաև պարբերաբար խորհրդատվական ծառայություններ են մատուցում ՀՀ մշակույթի նախարարությանը և այլ պետական և ոչ պետական կազմակերպություններին:

Մշակութաբանության ամբիոնը համագործակում է «Տիգրան Մեծ» ռազմաուսումնական վարժարանի հետ (Արմավիրի մարզ)` կազմակերպելով այնտեղ դասախոսություններ և ցուցադրություններ:

Մշակութաբանության ամբիոնը սկսած 2009 թ.-ից կազմակերպում է «Մշակույթը, պատմությունը և արդիականությունը» խորագրով մշակութաբանական ուսանողական ամենամյա կոնֆերանս, որտեղ զեկուցումներով հանդես են գալիս մշակութաբանության բաժնի բակալավրիատի 3-րդ, 4-րդ կուրսերի և մագիստրատուրայի 1-ին կուրսի ուսանողները: Զեկուցումների քննարկմանը մասնակցել են մշակութաբանության ամբիոնի դասախոսները, ինչպես նաև հրավիրյալ փորձագետներ: Այժմ ընթանում են երրորդ` արդեն միջբուհական գիտաժողովի նախապատրաստական աշխատանքները: Նախատեսվում է, որ զեկուցումները լույս կտեսնեն առանձին գրքույկի տեսքով:

Արդեն երրորդ տարին է` ամբիոնը “Friends of Armenia„ անգլիական կազմակերպության աջակցությամբ Մշակութաբանության բաժնի բարձր առաջադիմություն ունեցող և սոցիալապես անապահով ուսանողներին տարեկան երեք միանվագ կրթաթոշակ է հատկացնում:

Ամբիոնի վարիչն է պատմական գիտ. դոկտոր Համլետ Լենսերի Պետրոսյանը:

Սփյուռքագիտության ամբիոնը հիմնադրվել է 2008 թ. աշնանը` Սփյուռքի նորաստեղծ նախարարության նախաձեռնությամբ և ԵՊՀ ռեկտոր Արամ Սիմոնյանի հանձնարարականով: Իր բուն գործունեությունը ամբիոնը սկսել է 2009 թ.` կազմակերպելով ընդունելություն ամբիոնի նորաստեղծ մագիստրատուրայում:

Ամբիոնի գործունեության նախապատրաստական փուլում, այսինքն` 2008 թ. աշնանից մինչև 2009 թ. մայիս-հունիս ամիսները, ձևավորվել է ամբիոնը, կազմվել են ամբիոնի գործունեության նախնական ծրագիրը, մագիստրատուրայի ուսումնական և աշխատանքային պլանները: