ԵՊՀ Ինֆորմատիկայի և կիրառական մաթեմատիկայի ֆակուլտետի Դիսկրետ մաթեմատիկայի և տեսական ինֆորմատիկայի ամբիոնը ստեղծվել է 2006թ. Դիսկրետ մաթեմատիկայի և Ինֆորմատիկայի հանրահաշվատրամաբանական մեթոդների ամբիոնների միավորման արդյունքում:

Բակալավրիատում ամբիոնը սպասարկում է դիսկրետ մաթեմատիկայի, հանրահաշվի, անալիտիկ երկրաչափության, գծային հանրահաշվի, կոմբինատոր օպտիմիզացիայի, մաթեմատիկական տրամաբանության, ալգորիթմների տեսության, գրաֆների տեսության, կոդավորման տեսության, ինֆորմացիայի տեսության, կրիպտոգրաֆիայի մաթեմատիկական մեթոդների, գործողությունների հետազոտման, մաթեմատիկական կիբեռնետիկայի, պատկերների ճանաչման, կոմբինատոր ալգորիթմների և վերլուծության դասընթացները:

Ամբիոնում գործում է «Դիսկրետ մաթեմատիկա և տեսական ինֆորմատիկա» մասնագիտացմամբ մագիստրոսական ծրագիր:

Ամբիոնի հիմնական գիտական ուղղություններն են․ դիսկրետ մաթեմատիկա, դիսկրետ էքստրեմալ խնդիրներ, կիրառական հանրահաշիվ, գրաֆների տեսություն, գերմեծ ինտեգրալ սխեմաների նախագծում, բուլյան ֆունկցիաների տեսություն, հանրահաշվային կոդավորման տեսություն, ալգորիթմների տեսություն, մաթեմատիկական տրամաբանություն, բարդության տեսություն, մոտավոր ալգորիթմներ, գործողությունների հետազոտում, կրիպտոգրաֆիա և այլն:

2006 թ.-ից ամբիոնում գործում է գրաֆների տեսության սեմինարների շարքը, որն անց է կացվում յուրաքանչյուր շաբաթ օրերին:

Կիրառական մաթեմատիկայի ֆակուլտետում Թվային անալիզի ամբիոնը հիմնադրվել է 1972թ.: Ամբիոնի առաջին վարիչը եղել է ականավոր մաթեմատիկոս Սերգեյ Մերգելյանը, ով ութ տարի ղեկավարել է ամբիոնը: Ամբիոնը համալսարանի խոշոր գիտական օջախներից է: Այստեղ դասավանդում են ութ գիտությունների դոկտորներ և տասը գիտությունների թեկնածուներ:

Ամբիոնի հիմնական առարկաներն են՝ մաթեմատիկական անալիզ, կոմպլեքս փոփոխականի ֆունկցիաների տեսություն, ֆունկցիոնալ անալիզ, թվային մեթոդներ, սովորական դիֆերենցիալ հավասարումներ, մաթեմատիկական ֆիզիկայի հավասարումներ, օպտիմիզացիայի մեթոդներ:

Ամբիոնում գործում է «Թվային անալիզ և մաթեմատիկական մոդելավորում» մագիստրոսական ծրագիրը:

«Ծրագրավորման և ինֆորմացիոն տեխնոլոգիաների» ամբիոնը ԵՊՀ Ինֆորմատիկայի և կիրառական մաթեմատիկայի ֆակուլտետում բացվել է 2007թ. սկզբին` ֆակուլտետի վերակազմավորումից հետո, որի նպատակն էր ֆակուլտետի ամբիոնների խոշորացումը: Սակայն իրականում ամբիոնն ունի կեսդարյա պատմություն:

1957թ. ԵՊՀ Ֆիզիկա-մաթեմատիկական ֆակուլտետում բացվեց Հաշվողական մաթեմատիկայի ամբիոնը: 1958թ. ամբիոնի վարիչ դարձավ ԽՍՀՄ ԳԱ թղթակից անդամ Ա.Ա. Լյապունովի գիտական դպրոցի ներկայացուցիչ, մոսկվաբնակ Ռիմա Իվանովնա Պոդլովչենկոն, որը մեծ ավանդ ներդրեց ամբիոնի կայացման և հետագա զարգացման գործում: 1971թ. ամբիոնի հիմքի վրա կազմավորվեց Կիրառական մաթեմատիկայի ֆակուլտետը, այժմ` Ինֆորմատիկայի և կիրառական մաթեմատիկայի ֆակուլտետ: 1972թ. Հաշվողական մաթեմատիկայի ամբիոնը տրոհվեց երկու ամբիոնների` Մաթեմատիկական կիբեռնետիկայի ամբիոն և ԷՀՄ մաթեմատիկական ապահովման ամբիոն: Հետագայում ԷՀՄ մաթեմատիկական ապահովման ամբիոնից առանձնացան երկու նոր ամբիոններ` ԷՀՄ և ծրագրավորման ամբիոնը (1975թ.) և Ալգորիթմական լեզուների ամբիոնը (1991թ.):

1996թ. ԷՀՄ մաթեմատիկական ապահովման ամբիոնն ու ԷՀՄ և ծրագրավորման ամբիոնը միավորվեցին` կազմելով Համակարգային ծրագրավորման ամբիոնը, իսկ 2007թ. միավորվեցին Համակարգային ծրագրավորման ամբիոնն ու Ալգորիթմական լեզուների ամբիոնը` կազմելով Ծրագրավորման և ինֆորմացիոն տեխնոլոգիաների ամբիոնը:

Ամբիոնի կայացման գործում մեծ է ֆիզիկամաթեմատիկական գիտությունների դոկտոր, պրոֆեսոր Ս.Ա. Նիգիյանի վաստակը, ով երկար տարիներ ղեկավարել է ամբիոնը: Նրա բազմաթիվ աշակերտներ ներկայումս մեծ արդյունավետությամբ դասավանդում են ԻԿՄ ֆակուլտետում:

Ամբիոնում գործում է ուսանողների մոտ բարձր վարկանիշ ունեցող «Հաշվողական մեքենաների, համալիրների, համակարգերի և ցանցերի մաթեմատիկական և ծրագրային ապահովում» մագիստրոսական ծրագիրը:
Ամբիոնում իրականացվում են աշխատանքներ հետևյալ հիմնական ուղղություններով.
1. Օբյեկտ կողմնորոշված ծրագրավորում,
2. Մեքենայական ուսուցում (Machine Learning),
3. Տվյալների ինտելեկտուալ վերլուծություն (Data Mining),
4. Զուգահեռ ծրագրավորում (Parallel Programming),
5. Արհեստական բանականության համակարգեր (Artificial Intelligence Systems):

Իր կեսդարյա գոյության ընթացքում Ծրագրավորման և ինֆորմացիոն տեխնոլոգիաների ամբիոնը եղել է տեղեկատվական տեխնոլոգիաների ոլորտի բարձրորակ կադրերի պատրաստման գիտակրթական կենտրոն: