Միջազգային հարաբերությունների ֆակուլտետի «Դիվանագիտական ծառայության և մասնագիտական հաղորդակցման ամբիոնը» ստեղծվել է 2010 թ. մայիսին:

Այս բաժնում ուսանողները ուսումնասիրում են դիվանագիտական և հյուպատոսական ծառայության ինչպես տեսական, այնպես էլ գործնական հարցերը: Բաժնի ուսումնական պլանում կարևոր տեղ է հատկացված դիվանագիտական և հյուպատոսական ծառայության առանձնահատկություններին, դիվանագետի պատասխանատու առաքելությանը և հիմնական պարտականություններին:

Բաժնում դասավանդվում են դիվանագիտական ծառայության անբաժան մասը հանդիսացող դիվանագիտական բանակցությունների վարում , դիվանագիտական վարվեցողություն, դիվանագիտական արարողակարգ և վարվելակերպ, երկրագիտություն առարկաները:

Դիվանագիտական ծառայության և մասնագիտական հաղորդակցման ամբիոնում մեծ կարևորություն է տրվում հատկապես օտար լեզուների (եվրոպական և արևելյան) կատարյալ իմացությունը: Համաձայն ՀՀ Դիվանագիտական ծառայության մասին օրենքի 24-րդ հոդվածի պարտադիր է համարվում առնվազն երկու օտար լեզուների տիրապետելը:

Այդ անհրաժեշտությունից ելնելով՝ առաջին և երկրորդ լեզուների դասավանդումը կատարվում է դիվանագիտական խոսքի և մշակույթի և դիվանագիտական ծառայության հմտություններին տիրապետելու համապատասխան:

Բարձր առաջադիմությամբ բակալավրիատի շրջանավարտները իրենց ուսուցումը կարող են շարունակել մագիստրատուրայում: Լավագույն շրջանավարտները հնարավորություն են ունենում հաջող քննություններ հանձնելուց հետո անցնել աշխատանքի արտաքին գործերի նախարարությունում, միջազգային կազմակերպություններում և տարբեր նախարարությունների միջազգային կապերի վարչություններում:

ԵՊՀ Հանրային կառավարման կրթական ծրագիրը սկիզբ է առել 2005թ.՝ առաջարկելով «Հանրային կառավարում» մասնագիտացմամբ մագիստրոսների պատրաստման դասընթացներ: Ծրագիրը նախաձեռնվել և մշակվել է Արիզոնայի պետական համալսարանի համագործակցության արդյունքում (ծրագրի մեկնարկը՝ 2003թ.): 2007թ.-ից ԵՊՀ Միջազգային հարաբերությունների ֆակուլտետի շրջանակներում գործում է «Հանրային կառավարում» մասնագիտությամբ բակալավրիատի կրթական ծրագիրը: ԵՊՀ Հանրային կառավարման ամբիոնը հիմնադրվել է 2008 թ-ին:

Ամբիոնի հետազոտական աշխատանքների հիմնական ուղղություններն են՝ պետական կառավարման, ինչպես նաև տեղական ինքնակառավարման վարչա-քաղաքական ոլորտների տեսական և կիրառական ասպեկտները, հանրային կառավարման համակարգերի բարեփոխման գործնական և հայեցակարգային հետագծերի ուսումնասիրումը:

Ամբիոնում դասավանդում են 11 դասախոսներ, որոնցից 5-ը գիտությունների թեկնածուներ են:

Ամբիոնը ձևավորվել է 1993 թ-ին: 1993 - 2000 թթ. ամբիոնի առաջին վարիչն էր պատմական գիտությունների դոկտոր, պրոֆ. Է. Ա. Զոհրաբյանը, իսկ 2001 թ. փետրվարից մինչև 2008 թ. ապրիլը` պատմական գիտությունների դոկտոր, պրոֆ. Վ. Ա. Բայբուրդյանը: 2008 - 2013 թթ. ամբիոնը կրկին ղեկավարել է պրոֆ. Է. Ա. Զոհրաբյանը: 2013 թ-ի սեպտեմբերից ամբիոնի վարիչն է պատմական գիտությունների թեկնածու, դոցենտ Մ. Վարդազարյանը: 2017 թ.-ի սեպտեմբերից ամբիոնի վարիչի ժամանակավոր պաշտոնակատար է նշանակվել պ.գ.թ., դոցենտ Վ.Ս.Պետրոսյանը: 2018 թվականից Միջազգային հարաբերությունների և դիվանագիտության ամբիոնի վարիչն է Վ. Ս. Պետրոսյանը:

Մինչև 1998թ. սեպտեմբերին Միջազգային հարաբերությունների ֆակուլտետի կազմավորումը «Միջազգային հարաբերությունների պատմության և տեսության» ամբիոնը գործում էր Պատմության ֆակուլտետի կազմում:

Սկզբնական շրջանում 4 հիմնական անդամներից բաղկացած ամբիոնը 2014թ. դրությամբ իր կազմում արդեն ուներ 23 հաստիք, որոնցից 11-ը լրիվ հաստիքով, մյուսները կես կամ քառորդ: Ներկայումս ամբիոնում դասավանդում են 4 գիտության դոկտորներ, այդ թվում մեկ ԳԱԱ թղթակից անդամ և 14 գիտության թեկնածուներ: Ամբիոնի դասախոսներից 8-ը դիվանագիտական աշխատանքի փորձ ունեն:

Ամբիոնի անդամները ակտիվ կերպով զբաղվում են գիտական հետազոտություններով, որոնք ընթանում են հիմնականում հետևյալ ուղղություններով.

1. Հայ դիվանագիտության և ՀՀ արտաքին քաղաքականության հիմնահարցեր,
2. Միջազգային հարաբերությունների ժամանակակից գործընթացներ,
3. Համաշխարհային և տարածաշրջանային ինտեգրացիոն զարգացումներ:

Ամբիոնի նախաձեռնությամբ անցկացվում են տարեկան գիտական նստաշրջաններ և գիտաժողովներ: Պարբերաբար կազմակերպվում են հանդիպումներ ՀՀ-ում հավատարմագրված օտարերկրյա դիվանագիտական ներկայացուցիչների և արտասահմանից հրավիրված առաջնակարգ դասախոսների հետ:

Քաղաքագիտության ամբիոնը գործում է Երևանի պետական համալսարանում 1991 թվականից՝ հիմնադրվելով ԵՊՀ գիտական խորhրդի 1991 թ. հունիսի 6-ի նիստի որոշմամբ: 1991-1998 թթ. Քաղաքագիտության ամբիոնը գործել է ԵՊՀ փիլիսոփայության, սոցիոլոգիայի և հոգեբանության ֆակուլտետի կազմում:

1998 թ. սեպտեմբերին ԵՊՀ պատմության ֆակուլտետի միջազգային հարաբերությունների բաժնի և ԵՊՀ փիլիսոփայության, սոցիոլոգիայի և հոգեբանության ֆակուլտետի քաղաքագիտության բաժնի հիմքի վրա հիմնադրվեց Միջազգային հարաբերությունների ֆակուլտետը:

ԵՊՀ գիտական խորհրդի որոշմամբ 2010 թվականին Քաղաքագիտության ամբիոնը վերակազմավորվեց երկու ամբիոնների՝ 1) Քաղաքական գիտության պատմության և տեսության, 2) Քաղաքական ինստիտուտների և գործընթացների:

ԵՊՀ հոգեբարձուների որոշմամբ 2022 թվականի մարտի 21-ին երկու ամբիոնների միավորմամբ ձևավորվեց Քաղաքագիտության ամբիոնը:

Քաղաքագիտության ամբիոնի զարգացման մեջ կան մի քանի միտումներ, մասնավորապես՝ 1) քաղաքագիտության ենթակառուցվածքի ստեղծում և միջազգայնացում, 2) քաղաքագետների պատրաստում և գիտնականների հետազոտական ներուժի հզորացում, 3) քաղաքական հետազոտությունների նոր մեթոդաբանական բազայի ձևավորում, 4) քաղաքական համակարգի և վարչակարգի վերափոխումների ուսումնասիրություն, քաղաքական գործոնների և գործընթացների, ինչպես նաև ազգային և տարածաշրջանային անվտանգության, համաշխարհային քաղաքականության և հանրային քաղաքականության խնդիրների համեմատական վերլուծություն:

Քաղաքագիտության դասընթացի ծրագրի իրականացումն ուսումնական գործընթացում նախատեսում է դասախոսություններ, սեմինարներ, ուսանողների վերլուծական աշխատանքների կատարում քաղաքագիտության խնդիրներից մեկի վերաբերյալ։ Այն ենթադրում և խրախուսում է ուսանողների անկախությունն ու ստեղծագործականությունը գիտական և հասարակական-քաղաքական գրականության հետ աշխատանքի ընթացքում, նպաստում աշխարհայացքի, հասարակական և քաղաքական գիտելիքների ազատ ձևավորմանը:

Քաղաքագիտության ամբիոնն իրականացնում է հիմնարար և կիրառական հետազոտություններ։ Եթե հիմնարար հետազոտությունը կապված է հանրային իշխանության և քաղաքական համակարգի տեսությունների հետ, ապա կիրառական հետազոտությունը ներառում է պետական կառավարման, կուսակցությունների ռազմավարության և մարտավարության, քաղաքական վերլուծության և որոշումների կայացման հայեցակարգերը:

Ամբիոնում այժմ աշխատում են մոտ 30 դասախոսներ, որոնցից 7-ը դոկտոր և պրոֆեսորներ են, 20-ը՝ գիտության թեկնածուներ, 10-ը՝ դոցենտներ, 3-ը՝ ասիստենտներ:

Միջազգային հարաբերությունների ֆակուլտետի «Չինարեն լեզվի և մշակույթի կենտրոնը» հիմնադրվել է ԵՊՀ հոգաբարձուների խորհրդի 2015 թվականի հունիսի 19-ի N 9 նիստի որոշմամբ: Կենտրոնը ղեկավարում է միջազգային հարաբերությունների ֆակուլտետի Դիվանագիտական ծառայության և մասնագիտական հաղորդակցման ամբիոնի վարիչ դոցենտ Սյուզաննա Նավասարդյանը:

Կենտրոնի հիմնական խնդիրներն ու գործառույթներն են՝

Խթանել ԵՊՀ-ում չինարենի ուսուցումը:

Ուսանողների կրթական հետաքրքրությունն ուղղել դեպի Չինաստանի մշակութային արժեքները:

Աջակցել ԵՊՀ-ում չինարենի ուսումնական գործընթացի ներդրմանը, կազմակերպել համապատասխան մասնագիտական դասընթացներ ԵՊՀ ուսանողների համար:

Աջակցել ԵՊՀ համագործակցությանը Հայաստանի Հանրապետությունում հավատարմագրված Չինաստանի Ժողովրդական Հանրապետության դեսպանատան և ԵՊԼՀ Կոնֆուցիոսի ինստիտուտի հետ։

Համագործակցել ԵՊՀ և այլ գիտական կենտրոնների և համալսարանների հետ՝ կենտրոնի աշխատանքների արդյունավետ կատարման, ինչպես նաև փորձի փոխանակման նպատակով։

Կազմակերպել չինարենի անհատական և խմբակային դասընթացներ ինչպես ԵՊՀ, այնպես էլ արտաքին դիմորդների համար՝ համաձայն ներքին չափորոշիչների:

Պլանավորել և իրականացնել թեմատիկ դասընթացներ, կինոդիտումներ, ցուցահանդեսներ, օլիմպիադաներ չինարենի, չինական մշակույթի, կրոնի և պատմության ոլորտներում, ինչպես նաև նշել ազգային տոները և այլ միջոցառումներ։

(+ 374 60) 71-00-82, ներքին 10-82
chinacenter@ysu.am