Երևանի Պետական Համալսարանի Կիրառական սոցիոլոգիայի ամբիոնը կազմավորվել է 1986 թ-ին պրոֆեսոր Լյուդմիլա Հարությունյանի կողմից` ԵՊՀ-ի սոցիոլոգիական հետազոտությունների լաբորատորիայի հիման վրա, որը ԵՊՀ-ում գործում էր 1980 թ-ից: Փաստորեն, Երևանի Պետական Համալսարանի Կիրառական սոցիոլոգիայի ամբիոնը Խորհրդային Միությունում ստեղծված նման ամբիոններից մեկն էր, որն առաջինների շարքում ներբերեց հասարակության ուսումնասիրման ժամանակակից մոտեցումներն ու մեթոդները, ձևավորեց համաշխարհային սոցիոլոգիական մտքի ներդրման և կիրառման, ինչպես նաև ազգային սոցիոլոգիական դպրոցի զարգացման հայաստանյան ավանդույթը:

2004 թ-ին Փիլիսոփայության, սոցիոլոգիայի և հոգեբանության ֆակուլտետի կազմում գործող Կիրառական սոցիոլոգիայի ամբիոնից առանձնացավ Սոցիալական աշխատանքի և սոցիալական տեխնոլոգիաների ամբիոնը, և այդ երկու ամբիոնների հիման վրա 2004 թ-ի սեպտեմբերի 1-ից ԵՊՀ-ում որպես առանձին ստորաբաժանում սկսեց գործել Սոցիոլոգիայի ֆակուլտետը:

Կիրառական սոցիոլոգիայի ամբիոնը վարում է «Սոցիոլոգիա» մասնագիտությամբ բակալավրիատի ծրագիր, ինչպես նաև երկու մագիստրոսական ծրագրեր, որոնց ուսանողները մասնագիտանում են սոցիոլոգիական հետազոտությունների մեթոդաբանության, կոնֆլիկտաբանության, սոցիալական անվտանգության և միգրացիոն քաղաքականության հիմնահարցերում:
Ամբիոնի կազմում աշխատում են 4 պրոֆեսորներ, 4 դոցենտներ, 2 ասիստենտներ և դասախոսներ:
Ամբիոնն իրականացնում է բազմաբնույթ հետազոտություններ քաղաքական, տնտեսական, ռազմական, հաղորդակցությունների և ԶԼՄ սոցիոլոգիայի բնագավառներում, ինչպես նաև անվտանգային, գենդերային և միգրացիոն հիմնախնդիրների ուսումնասիրություններ:

Կիրառական սոցիոլոգիայի ամբիոնի գործընկերներն են` Հռոմի Սապիենցա համալսարանը (Իտալիա), Օլդենբուրգի համալսարանը (Գերմանիա), Գրաց համալսարանը (Ավստրիա), Ֆրիբուրգի համալսարանը (Շվեյցարիա), Թբիլիսիի պետական համալսարանը (Վրաստան), Եկատերինբուրգի, Ռոստովի, Կուբանի և Ադիգեյայի պետական համալսարանները (ՌԴ), Աստանայի Եվրասիական համալսարանը և Կարագանդայի պետական տեխնիկական համալսարանը (Ղազախստան), և այլն: Ամբիոնում դասավանդում են ԵՊՀ Սոցիոլոգիայի ֆակուլտետի, ՀՀ և արտերկրի հրավիրյալ մասնագետները գործընկեր համալսարաններից:

Բացի ԵՊՀ գրադարանային ռեսուրսից, Կիրառական սոցիոլոգիայի ամբիոնն իր հետ համագործակցող մասնագետներին և իր ուսանողներին առաջարկում է նաև մասնագիտական գրականություն և տեղեկատվություն իր կողմից ստեղծված` Տարածաշրջանային ինտեգրացիայի և կոնֆլիկտների լուծման կենտրոնի, ինչպես նաև Միգրացիոն հետազոտությունների կենտրոնի ռեսուրսները:

Կիրառական սոցիոլոգիայի ամբիոնն ակտիվորեն համագործակցում է ՀՀ Պաշտպանության նախարարության, ՀՀ Տարածքային կառավարման նախարարության Միգրացիայի պետական ծառայության, Միգրացիայի միջազգային կազմակերպության (ՄԱԿ), ԵԱՀԿ Երևանյան գրասենյակի, Կարիտաս Հայաստան կազմակերպության, Հետազոտական ռեսուրսների կովկասյան կենտրոնի և մի շարք այլ միջազգային և հայաստանյան կազմակերպությունների հետ:

ԵՊՀ Սոցիոլոգիայի տեսության և պատմության ամբիոնը կազմավորվել է 2011 թվականին: Ամբիոնի կազմավորումը հիմնարար սոցիոլոգիական հետազոտությունների իրականացման ինստիտուցիոնալ հնարավորություն էր, խթան կիրառական սոցիոլոգիական հետազոտություններին զուգահեռ տեսական և պատմասոցիոլոգիական ուսումնասիրությունների իրականացման համար:

ԵՊՀ Սոցիոլոգիայի տեսության և պատմության ամբիոնի գիտական և ուսումնական գործունեության հիմնական ուղղություններն են սոցիոլոգիական տեսությունները, սոցիոլոգիայի պատմությունը, հատկապես հայ սոցիոլոգիայի պատմությունը, միջին մակարդակի տեսությունները, ինքնության հիմնահարցերն ու տարածության (քաղաքային, գյուղական) հիմնախնդիրները: Ամբիոնի աշխատակիցները հեղինակել են բազմաթիվ գիտահետազոտական աշխատություններ և ուսումնամեթոդական ձեռնարկներ: Հատկապես կարևոր են՝ «Հայ սոցիոլոգիական մտքի անթոլոգիա», «Հայ սոցիոլոգիայի պատմություն (XIX դարավերջ - XX դարասկիզբ)» և «Գեմանական սոցիոլոգիական միտքը» ԵՊՀ հրատարակությունները:

Ամբիոնը միջազգային մակարդակում համագործակցում է տարբեր գիտակրթական հաստատությունների հետ. Հումբոլդի համալսարան (Գերմանիա), Պոտսդամի համալսարան (Գերմանիա), Ֆրիբուրգի համալսարան (Շվեյցարիա), Օքսֆորդի համալսարան (Մեծ Բրիտանիա), Տնտեսագիտության բարձրագույն դպրոց (ՌԴ), Մոգիլյովի պետական համալսարան (Բելառուս), Սանկտ-Պետերբուրգի ֆինանսա-տնտեսական ակադեմիա (ՌԴ), Թբիլիսիի Ի. Ջավախիշվիլիիի անվան պետական համալսարան (Վրաստան), Ռուսաստանի գիտությունների ակադեմիայի Վոլոգդայի գիտական կենտրոն (http://en.volnc.ru/) և այլն:

Ներկայումս ամբիոնի աշխատակիցների ղեկավարությամբ իրականացվում են ՀՀ ԿԳՄՍՆ գիտության կոմիտեի կողմից ֆինանսավորվող երկու հետազոտական նախագծեր. 1. «Գյուղականության ճգնաժամը Հայաստանում» (21T-5D268), ղեկավար՝ Հ.Ռ. Վերմիշյան; 2. «Առաջնորդություն և հետևորդության դիսպոզիցիաները ՀՀ կրթության և գիտության ոլորտում» (21T-5D271), ղեկավար՝ Ս.Ա. Բալասանյան:

Սոցիոլոգիայի տեսության և պատմության ամբիոնի ուսումնական և գիտական հիմնական գործունեությունն իրականացվում է ամբիոնի հետևյալ կազմով. 1 պրոֆեսոր, 5 դոցենտ, 1 ասիստենտ, 3 դասախոս և լաբորանտ, համատեղության կարգով 10 աշխատող:

Ամբիոնը ունի երեք առկա և մեկ հեռակա ասպիրանտ: Ստեղծման պահից ամբիոնում պատրաստվել և պաշտպանվել է 4 թեկնածուական աշխատանք:

ԵՊՀ-ում սոցիալական աշխատանքին վերաբերող դասընթացներ սկսել են դասավանդվել 1988 թ.-ից՝ Փիլիսոփայության, հոգեբանության և սոցիոլոգիայի ֆակուլտետի սոցիոլոգիայի բաժնի ուսանողներին: 1996 թվականին կատարվել է առաջին ընդունելությունը «սոցիալական աշխատանք մասնագիտությամբ»: Սոցիալական աշխատանքի և սոցիալական տեխնոլոգիաների ամբիոնը հիմնադրվել է 2004 թ.-ին՝դառնալով նորաստեղծ Սոցիոլոգիայի ֆակուլտետի ամբիոններից մեկը: Այն սկսեց սպասարկել «սոցիալական աշխատանք» մասնագիտությամբ բակալավրի և մագիստրոսի ուսումնական ծրագրերը: Սոցիալական աշխատանքի կրթական ծրագրերը ներառում են երեք բաղադրիչ` տեսություն, պրակտիկա և հետազոտական աշխատանք: Կրթությունը կազմակերպվում է առկա և հեռակա ուսուցման ձևերով:

Բակալավրիատում սովորող ուսանողները երկրորդ կուրսի վերջում ընտրում են երեք մասնագիտացումներից մեկը՝ ընտանիքի և երեխաների պաշտպանություն, սոցիալական աշխատանքն իրավախախտների հետ և սոցիալական տեխնոլոգիաներ:

Սոցիալական աշխատանքի և սոցիալական տեխնոլոգիաների ամբիոնը վերահսկում է նաև «Հասարակայնության հետ կապեր» մասնագիտության գծով մագիստրոսական ծրագիրը:

Սոցիալական աշխատանքի և սոցիալական տեխնոլոգիաների ամբիոնի անձնակազմը բաղկացած է տասներեք լրիվ և երկու կես դրույք ունեցող դասախոսներից: Նրանցից 8-ը գիտության թեկնածուներ են և դոցենտ: Ամբիոնի բոլոր դասախոսները բազմաթիվ վերապատրաստումներ են անցել Եվրոպայի և ԱՄՆ-ի տարբեր համալսարաններում: ԵՊՀ-ում սոցիալական աշխատանք մասնագիտությամբ սովորող ուսանողնեի թիվը մոտավորապես 250 է:

2010-2013 թվականների Սոցիալական աշխատանքի և սոցիալական տեխնոլոգիաների ամբիոնը տեղական և արտասահմանյան համալսարանների հետ՝որպես կոնսորցիումի անդամ, մասնակցել է Տեմպուս 4 ծրագրին, որի արդյունքում ԵՊՀ-ում ներդրվել է մագիստրոսական նոր ծրագիր՝ Սոցիալական քաղաքականության և վարչարարության գծով: 2019-21թթ. ամբիոնը հնարավորություն ունեցավ զարգացնելու այդ ծրագրի շարունակությունը՝մասնակցելով Էրազմուս ծրագրի: Այն հետապնդում է «սոցիալական աշխատանք» և «հանրային առողջապահություն» մասնագիտությունների գծով ասպիրանտական ծրագրեր ստեղծելու նպատակ: Ամբիոնն ակտիվորեն մասնակցում է ՀՀ սոցիալական պաշտպանության համակարգի բարեփոխումներին: Ամբիոնի շատ դասախոսներ որպես վերապատրաստողներ մասնակցել ու մասնակցում են համակարգի ծառայողների վերապատրաստումներին՝ նպաստելով սոցիալական աշխատանքի մասնագիտական մշակույթի տարածմանը և զարգացմանը: Նրանց ակտիվ մասնակցությամբ է այսօր զարգանում համայնքային սոցիալական աշխատողների ցանցը: Համագործակցելով պետական և հասարակական տարբեր կառույցների հետ՝ ամբիոնը պարբերաբար կազմակերպում է գիտաժողովներ և կլոր սեղաններ, որոնց ժամանակ քննարկվում են մասնագիտության զարգացմանը նվիրված հրատապ խնդիրները: Որպես կանոն նման միջոցառումները հարմարեցվում են սոցիալական աշխատողի հանրապետական կամ միջազգային օրերին: Վերջին նման միջոցառումը 2021 թ. նոյեմբերին Ծաղկաձորում կազմակերպված միջազգային աշխատաժողովն էր՝ նվիրված 44-օրյա պատերազմի հետևանքով սոցիալական աշխատողների առջև ծառացած մարտահրավերների հաղթահարմանը:

Ամբիոնի դասախոսներն օգնում են Արցախում զարգացնել սոցիալական պաշտպանության համակարգը՝նրանում ներդնելով սոցիալական աշխատանքի տարրը: Տեղում նրանք կազմակերպում են սոցիալական աշխատանքգի գծով կարճատև դասընթացների ունկնդիրներին, վերապատրաստում նրանց, աշխատանքի տեղավորվելուց հետո սկզբնական շրջանում իրականացնում մասնագիտական սուպերվիզիա:

Ամբիոնն օգնում է Արցախի «Մեսրոպ Մաշտոց» համալսարանին՝ ներդնելու սոցիալական աշխատանքի գծով մագիստրոսական ծրագիր:

Համագործակցային ծրագրերը

Սոցիալական աշխատանքի և սոցիալական տեխնոլոգիաների ամբիոնը սերտորեն համագործակցում է ԱՄՆ-ի Կոնեկտիկուտի համալսարանի սոցիալական աշխատանքի դպրոցի հետ: Երկու կողմի մագիստրատուրայի ուսանողների համար ամեն տարի կազմակերպվում է «Համեմատական սոցիալական քաղաքականություն» դասընթացը, որի վերջում ուսանողների փոխադարձ այցելություն է կազմակերպվում՝ գործընկեր երկրում սոցիալական աշխատանքի զարգացման վիճակին ծանոթանալու նպատակով:

Վերջին տարիներին ամբիոնը Էրազմուս+ ծրագրի շրջանակում լայնորեն սկսել է համագործալցել Չեխիայի Հռադեք Կռալովեի համալսարանի հետ: Ծրագրի շրջանակում մեր դասախոսները մասնակցում են «Հռադեքյան օրեր» ավանդական գիտաժողովին, փոխադարձ այցելություններ են կատարում՝ դասախոսություններ կարդալու նպատակով: Մեր ուսանողները «կրեդիտների շարժունություն» ծրագրի շրջանակում ամառային կիսամյակի ընթացքում լինում են գործընկեր համալսարանում:

ԵՊՀ Սոցիոլոգիայի ֆակուլտետի Միգրացիայի ուսումնասիրությունների կենտրոնը հիմնադրվել է 2011թ. «Միգրացիա և բարձրագույն կրթություն. հմտությունների եւ կարողությունների զարգացում» ԵՄ Տեմպուս IV ծրագրի շրջանակներում՝ համագործակցելով Հայ-ռուսական (Սլավոնական) համալսարանի (Հայաստան), Իվանե Ջավախիշվիլու անվան Թբիլիսիի պետական համալսարանի և Հանրային հարաբերությունների Վրաստանի ինստիտուտի (Վրաստան), Խազար համալսարանի և Քավքազ համալսարանի (Ադրբեջան), Գրացի Կարլ Ֆրանցի անվան համալսարանի (Ավստրիա), Օլդենբուրգի Կարլ ֆոն Օսետսկու անվան համալսարանի (Գերմանիա), Բրյուսելի Ազատ համալսարանի (Բելգիա), Ալիկանտեի համալսարանի (Իսպանիա), Համաշխարհային համալսարանական ծառայության - Ավստրիական կոմիտեի, Միգրացիայի միջազգային կազմակերպության (ՄՄԿ), ՀՀ տարածքային կառավարման նախարարության Միգրացիոն պետական ծառայության, Ադրբեջանի կրթության նախարարության հետ:

Միգրացիայի ուսումնասիրությունների կենտրոնի ստեղծման անհրաժեշտությունը պայմանավորված է ամբողջ աշխարհում, մասնավորապես Եվրասիայի տարածաշրջանում, միգրացիոն հիմնախնդիրների համաողմանի հետազոտության հրատապությամբ: Միգրացիայի ուսումնասիրությունները կիրականացվեն հետևյալ հիմնական ուղղություններով` ներքին միգրացիա, մշտական միգրացիա, կարճաժամկետ և երկարաժամկետ աշխատանքային միգրացիա, առևտրային միգրացիայի, տարանցիկ միգրացիայի, անկանոն միգրացիա, թրաֆիկինգի զոհերի, ներգաղթի, ապաստան հայցողների, վերադարձող միգրանտների, հայրենադարձների, կրկնակի միգրացիայի, շրջակա միջավայրի միգրացիայի, փախստականների:

Այժմ Սոցիոլոգիայի ֆակուլտետում ներդրվել է «Միգրացիայի և կոնֆլիկտների ուսումնասիրություններ» նոր մագիստրոսական ծրագիրը, որը ներառելով միգրացիայի և կոնֆլիկտաբանության առանցքային հիմնախնդիրների վերլուծություններին նվիրված դասընթացները՝ մասնագիտացմանը տալիս է արդիական և կիրառական նշանակություն: Մագիստրոսական ծրագրի կոնֆլիկտաբանության հիմնական դասընթացներն են՝ Հակամարտությունների վերլուծություն և կարգավորում, հակամարտությունների կառավարում, միջազգային բանակցությունների, միջազգային և խաղաղության հետազոտությունների: Հատուկ դասընթացներն են՝ հակամարտության և հաղորդակցում, ազգայնականության տեսություններ, տարածաշրջանային հակամարտությունները Հարավային Կովկասում, անվտանգության հետազոտություններ: Միգրացիոն ուսումնասիրությունների հիմնական դասընթացներն են՝ միգրացիա և բազմամշակութայնություն, գենդեր և միգրացիա, միգրացիան և փոքր ժողովուրդները, տարածաշրջանային միգրացիայի պատմություն, սոցիալական գործընկերություն և այլն:

Կենտրոնի մասին առավել մանրամասն տեղեկատվություն կարող եք ստանալ միգրացիայի ուսումնասիրությունների կենտրոնի պաշտոնական կայքէջից:

Տարածաշրջանային ինտեգրացիայի և կոնֆլիկտների լուծման կենտրոնը՝ որպես ռեսուրս կենտրոն, հիմնադրվել է 1996թ-ին՝ ԱՄՆ-ի Կոնեկտիկուտի համալսարանի Սոցիալական աշխատանքի դպրոցի (UConn - School of Social Work) դոկտոր Նենսի Համփֆրեյսի և Երևանի պետական համալսարանի Կիրառական սոցիոլոգիայի ամբիոնի պրոֆեսոր Լյուդմիլա Հարությունյանի ջանքերով: Կենտրոնի հիմնադրման գործում մեծ ավանդ է ունեցել ԱՄՆ-ի Ջորջ Մեյսոն համալսարանի Կոնֆլիկտի վերլուծության և լուծման ինստիտուտի (ICAR) դոկտոր Մուրադ Մուրադյանը:

Կենտրոնն աջակցում է տարածաշրջանային ուսումնասիրությունների խնդիրներին ուղղված գիտական գործունեությանը, մասնավորապես՝ Հարավային Կովկասի ինտեգրացիոն գործընթացներին, կոնֆլիկտների կանխարգելմանն ու դեէսկալացիային տարածաշրջանում, «ոչ պատերազմ ոչ խաղաղություն հասարակության» հիմնահարցերին և ժողովրդավարական փոխակերպումների հնարավորություններին: Կենտրոնի հիմնական նպատակներից է կոնֆլիկտի և խաղաղության հետազոտման մասնագիտական կարողությունների զարգացումը Հայաստանում: Կենտրոնում ամենօրյա աշխատաքներ են տարվում բարելավելու դասավանդումը, կազմակերպվում են գիտաժողովներ, ամառային դպրոցներ, ստեղծվում դասագրքեր և ուսուցողական նյութեր: Այս ամենի իրականացումը հնարավորություն է ստեղծել մշակելու և առաջարկելու կոնֆլիկտի և խաղաղության հետազոտությունների նոր մագիսրոսական ծրագիր, որը հաջողությամբ ներդրվել է ԵՊՀ-ի Սոցիոլոգիայի ֆակուլտետում:

Տարածաշրջանային ինտեգրացիայի և կոնֆլիկտների լուծման կենտրոնը, որպես ռեսուրս կենտրոն, ունի կոնֆլկտաբանական, սոցիոլոգիական և սոցիալական աշխատանքի վերաբերյալ օտարալեզու գրականությամբ հարուստ գրադարան, որը պարբերաբար համալրվում է:

ԵՊՀ սոցիոլոգիայի ֆակուլտետի Սոցիալական հետազոտությունների իննովացիոն կենտրոնը զբաղվում է հասարակագիտական, սոցիոլոգիական և հումանիտար գիտահետազոտական և կրթական ծրագրերի ներգրավմամբ և իրականացմամբ:

Կենտրոնը, հետազոտական նորագույն մեթոդների կիրառմամբ, զբաղվում է տեղական և միջազգային դոնոր կազմակերպությունների հետ գիտակրթական ծրագրերի, դաշտային հետազոտական աշխատանքների և հետազոտական արդյունքների մշակմամբ և վերլուծությամբ:

Կենտրոնը կիրառում է հետազոտական նորագույն մեթոդները՝ համադրելով դրանք հիմնարար և կիրառական բնույթի հասարակագիտական հետազոտությունների կազմակերպման և իրականացման ավանդույթների հետ, իր գործունեության ընթացքում խթանելով Հայաստանում հետազոտական աշխատանքների արդյունավետության բարձրացումը, և գիտահետազոտական ծրագրերին հետազոտողների լայն շրջանակի ներգրավումը:

Սոցիալական հետազոտությունների իննովացիոն կենտրոնի նպատակները

Կազմակերպել և իրականացնել սոցիալական բնույթի հետազոտություններ և հանրային կարծիքի ուսումնասիրություններ:

Նպաստել ԵՊՀ հետազոտական ներուժի և շահագրգիռ կազմակերպությունների, միջազգային և տեղական կառույցների միջև համագործակցության ձևավորմանը՝ գիտահետազոտական ծրագրերի ներգրավման միջոցով:

Հետազոտական նորագույն մեթոդներով իրականացնել ԵՊՀ գիտական, կրթական, կառավարման, վարչական գործունեությանն ուղղված հետազոտություններ, առաջարկություններով հանդես գալ ԵՊՀ ներքին գործընթացների որակի, ձևի բարելավման վերաբերյալ, նպաստել բարեփոխումներին, ԵՊՀ-ում հետազոտական աշխատանքների իրականացմանը, դրանցում ԵՊՀ հետազոտողների ներգրավմանը:

Տրամադրել հետազոտական արդյունքներ և փորձագիտական խորհրդատվություն պետական/ոչ պետական, տեղական/միջազգային կազմակերպություններին, անհատներին ու սոցիալական խմբերին:

Կազմակերպել, իրականացնել կրթական, գիտական միջոցառումներ և տարաբնույթ դասընթացներ՝ ներգրավելով ԵՊՀ պրոֆեսորա-դասախոսական անձնակազմը:

Հետազոտական արդյունքների ներկայացմանը, դրանց քննարկմանն ուղղված կլոր սեղանների, աշխատաժողովների կազմակերպում և իրականացում:

Իրականացնել բարձրագույն կրթության որակի գնահատում և մոնիթորինգ, ԵՊՀ-ի նորարարական ծրագրերի արդյունավետության գնահատում:

Գործադրել ջանքեր՝ ուղղված Հայաստանում հետազոտական համայնքի համախմբմանը:

Աշխատակիցներ

Արեմ Արթուրի Մկրտչյան - տնօրեն
Շուշանիկ Գեղամի Հարությունյան - Զարգացման գծով տնօրեն
Տաթևիկ Զավենի Կարապետյան - Հայտերի ներկայացման մասնագետ
Վարդան Լյովայի Վարդանյան - Հաղորդակցության մենեջեր
Մարիաննա Գևորգի Սարգսյան - Գրասենյակի մենեջեր

ԵՊՀ Սոցիոլոգիայի ֆակուլտետի Կիրառական սոցիոլոգիական հետազոտությունների լաբորատորիան սոցիոլոգիական հետազոտությունների մեթոդաբանության մշակման, հետազոտական գործիքների ձևավորման և վավերականացման, դաշտային աշխատանքների իրականացման, հետազոտությունների արդյունքների վերլուծության բնագավառում պետական ֆինանսավորմամբ գործող եզակի գիտահետազոտական կենտրոն է:

Լաբորատորիան պահպանում և զարգացնում է հիմնարար և կիրառական բնույթի հասարակագիտական հետազոտությունների կազմակերպման և իրականացման ավանդույթները` նպաստելով հայաստանյան իրականության մեջ սոցիոլոգիական հետազոտությունների որակի, գիտակրթական և հետազոտական գործունեության արդյունավետության բարձրացմանը:

Կիրառական սոցիոլոգիական հետազոտությունների լաբորատորիայի նպատակները և խնդիրները.

Մշակել կիրառական սոցիոլոգիական հետազոտությունների որակի գնահատման համակարգ,

Կազմակերպել և իրականացնել կոնկրետ սոցիոլոգիական հետազոտություններ,

Մշակել սոցիոլոգիական հետազոտության պլանավորման, իրականացման և տվյալների հետ աշխատանքի էթիկական ստանդարտներ,

Ստեղծել սոցիոլոգիական տեղեկատվական բազա գիտական, կրթական, կառավարման, վարչական որոշումների կայացման բնագավառներում կիրառելու նպատակով,

Մշակել հետազոտության նորարարական մեթոդների (վիզուալ, նարատիմ, սեմիոտիկ) կիրառման գործիքակազմ:

Գործնական տեսանկյունից լաբորատորիան նպատակ ունի`

Իր ձեռքբերումների շրջանակներում ըստ անհրաժեշտության տրամադրել սոցիոլոգիական տեղեկատվություն և փորձագիտական խորհրդատվություն պետական/ոչ պետական, տեղական/միջազգային կազմակերպություններին, անհատներին ու սոցիալական խմբերին:

ՀՀ-ում հետազոտական ներուժի զարգացմանը ուղղված գործունեության համատեքստում կազմակերպել գիտական և կրթական (թրեյնինգներ, գիտաժողովներ, կլոր սեղաններ, աշխատաժողովներ) միջոցառումներ։

Լաբորատորիայի գործունեության ուղղություններն են`

Ակտուալ հիմնախնդիրների վերլուծության ունիվերսալ գործիքների մշակում և վավերականացում,

Հավանական և նպատակային ընտրանքի ռազմավարության մոդելների մշակում,

Ժամանակակից սոցիալական հիմնախնդիրների ուսումնասիրություն և վերլուծություն,

Հասարակական նշանակալի ծրագրերի որակի մշտադիտարկում և գնահատում,

Բարձրագույն կրթության որակի գնահատում և մոնիթորինգ, ԵՊՀ-ի նորարարական ծրագրերի արդյունավետության գնահատում, հայ սոցիոլոգիական ավանդույթների շրջանակներում հետազոտությունների կոորդինացում և աջակցություն,

Սոցիոլոգիայի ամբիոնի պրակտիկաների կազմակերպում, մեթոդական սեմինարների, դասընթացների, ամառային դպրոցների կազմակերպում,

Դասավանդման նոր մեթոդների փորձարկում, հայ հասարակության արդի հիմնախնդիրների ուսումնասիրություն:

Կիրառական սոցիոլոգիական հետազոտությունների լաբորատորիան աջակցում է նաև երիտասարդ և կայացած հասարակագետների գիտական ներուժի և հմտությունների զարգացմանը, մեթոդաբանական աջակցություն է ցուցաբերում ֆակուլտետի դասախոսական անձնակազմին և ուսանողներին նրանց հետազոտական աշխատանքներում:

2006 թ.-ից ի վեր լաբորատորիան իրականացրել է մի շարք ծրագրեր:

«ԵՊՀ-ում բարձրագույն կրթության որակի մոնիթորինգ և գնահատում» - 2008 թ.-ին այս ծրագրի շրջանակներում իրականացվել է «Բարձրագույն կրթության որակի գնահատման համընդհանուր չափորոշիչների մշակում» նախագիծը` ուղղված կրթության գնահատման ինդիկատորների համակարգի ստեղծմանը լոկալ և միջազգային փորձի ուսումնասիրման հիմնա վրա:

2009 թ.-ին լաբորատորիան իրականացրել է «Բարձրագույն կրթության որակի գնահատման մեթոդաբանության գնահատում և փորձարկում», որի շրջանակներում կատարվել է «Բարձրագույն կրթության մասնակցային գնահատում» սոցիոլոգիական հետազոտություն:

ԵՊՀ-ի նորարարական ծրագրերի արդյունավետության գնահատում ծրագրի շրջանակներում իրականացվել է «ԵՊՀ հասարակագիտական ֆակուլտետներում մագիստրոսական համակարգի արդյունավետության գնահատում»` ուղղված մագիստրոսական կրթական ծրագրի գործառնության արդյունավետության աստիճանի գնահատմանը և բարելավման առաջարկների մշակմանը:

«ԵՊՀ ուսանողի իմիջի ուսումնասիրություն» հետազոտության շրջանակներում Լաբորատորիան իրականացրել է սոցիոլոգ-ուսանողների կերպարի ուսումնասիրություն` նրանց ինքնընկալման առանձնահատկությունների և ուսման ընթացքում այդ առանձնահատկությունների փոփոխման դինամիկայի հետազոտման նպատակով:

Հեռաուսուցման լաբորատորիան հիմնադրվել է 2005 թվականին՝ սոցիոլոգիայի ֆակուլտետի և Մեծ Բրիտանիայի Բաց Համալսարանի Առողջության և Սոցիալական Խնամքի ֆակուլտետի արդյունավետ և երկարատև համագործակցության շնորհիվ՝ «TEMPUS» համատեղ եվրոպական ծրագրի շրջանակներում:

Հեռաուսուցման լաբորատորիայի առաքելությունն է կրթության մատչելիության և շարունակականության ապահովումը:

2005 թվականից հեռաուսուցման լաբորատորիան մշակում և իրականացնում է հեռաուսուցման և հիբրիդային ուսուցման երկարատև և կարճաժամկետ ծրագրեր հետևյալ մասնագիտություններով և մասնագիտացումներով:
• Սոցիալական աշխատանք (մեկամյա հեռաուսուցման դասընթաց)
• Սոցիալական մանկավարժություն (մեկամյա հեռաուսուցման դասընթաց)
• Մարդկային ռեսուրսների կառավարում (մեկամյա հիբրիդային ուսուցման դասընթաց)
• Հասարակայնության հետ կապեր և Մարքեթինգ (մեկամյա հիբրիդային ուսուցման դասընթաց)
• Հոգեբանություն (մեկամյա հիբրիդային ուսուցման դասընթաց)

Կարճաժամկետ ծրագրերից են՝ քոուչինգ, մարքեթինգ, սթրեսի կառավարում, կոնֆլիկտների կառավարում, նախագծերի կառավարում, ժամանակի կառավարում և այլն:

Այսօրվա դրությամբ լաբորատորիան ունի ավելի քան 1700 շրջանավարտ: Լաբորատորիան իրականացնում է նաև կորպորատիվ վերապատրաստումներ: Մասնավորապես լաբորատորիայում վերապատրաստել են Վիվա-Սել ՄՏՍ, Վորլդ Վիժն Հայաստան, Հայկական Կարիտաս, <<Թուֆենկյան>> բարեգործական հիմնադրամի, Առաքելություն Հայաստան բարեգործական հասարակական կազմակերպության և այլ շատ կազմակերպությունների աշխատակիցներ:

Լաբորատորիան մշակել է և իրականացրել է նաև մի շարք մեկամյա անգլիալեզու հեռաուսուցման դասընթացներ օտարերկրյա ուսանողների համար: