06.07.2010 | 
Կրթություն
ԿԱՄՈՒՐՋ-ՖՈՐՈՒՄԸ` ՈՐՊԵՍ ԱՄՓՈՓՈՒՄ
ԿԱՄՈՒՐՋ-ՖՈՐՈՒՄԸ` ՈՐՊԵՍ ԱՄՓՈՓՈՒՄ
Հայկական վիրտուալ համալսարանը հունիսի 2-ին ամփոփեց իր աշխատանքային առաջին տարին:

«Հայկական բարեգործական ընդհանուր միության» Հայկական վիրտուալ համալսարանի (ՀՎՀ) ստեղծման ծրագիրը նախաձեռնել են դեռեւս 2004 թվականին: Պաշտոնապես, սակայն, օն-լայն կրթության հայաստանյան առաջին ներկայացուցիչը գործում է 2009 թվականի հունիսից: Ծրագրի տեխնոլոգիան բազմակողմանիորեն մշակվել եւ մշակվում է Երեւանի պետական համալսարանի գիտնականների եւ ծրագրավորողների համագործակցությամբ:

 

Կրթության բոլորովին նոր տարբերակ առաջարկող կրթօջախը հունիսի 2-ին գլոբալ կամուրջ-ֆորումով ամփոփեց հայագիտական հեռավար կրթության բնագավառում առաջին տարվա իր գործունեությունը: Հոբելյանական ֆորումին մասնակցում էին ինչպես հայաստանցի մասնագետներ, այնպես էլ ոլորտը ներկայացնող օտարերկրյա հյուրեր: Կենդանի ֆորումի ընթացքում կապ հաստատվեց համալսարանի` աշխարհի տասնյակ երկրներում բնակվող ուսանողների, ուսուցիչների եւ հեռավար կրթության մասնագետների հետ, ովքեր ներկայացրին ուսման իրենց փորձն ու պատասխանեցին ներկաների հարցերին:

 

Մեկ տարվա ընթացքում համալսարանն անցկացրել է 4 ուսումնական շրջան, որոնց մասնակցել են 35 երկրների ավելի քան 500 ուսանողներ: Աշխարհի տարբեր երկրներում գտնվող ուսանողներին համախմբողը Հայաստանն է ու հայերենը: Հայկական վիրտուալ համալսարանում գործում են երեք` լեզվի, պատմության ու մշակույթի ֆակուլտետներ: Եւ որպեսզի նպատակն արդարացվի, ու հայեցի կրթությունը մատչելի ու հասանելի լինի բոլոր ցանկացողների համար, այն իրականացվում է հետեւյալ լեզուներով` հայերեն (արեւելահայերեն եւ արեւմտահայերեն), անգլերեն, ռուսերեն, ֆրանսերեն եւ իսպաներեն: Բացի օն-լայն դասերից, որոնց ընթացքում ուսուցիչը վիրտուալ կապ է հաստատում դասընթացի մասնակիցների հետ, Հայկական վիրտուալ համալսարանը ներմուծել է նաեւ ուսուցման խառը մեթոդը. ավանդական դասարանին միանում է օն-լայն ուսուցիչն ու դասն անցկացնում դասվարի հետ միասին:

Այլ նորություններ
«ԻՆԴՈՒՍՏՐԻԱՅԻ ՕՐ» ԵՊՀ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏՈՒՄ
Երևանի պետական համալսարանի մաթեմատիկայի և մեխանիկայի ֆակուլտետն այսօր կազմակերպել էր «Ինդուստրիայի օր» խորագիրը կրող միջոցառում, որի նպատակն էր բարձր կուրսերի ուսանողներին հնարավորություն տալ ծանոթանալու ՏՏ ոլորտի ընկերությունների ներկայացուցիչների հետ և իրենց մագիստրոսական ծրագրի համար գտնելու համագործակցության ուղիներ։
ՀԱՆԴԻՊՈԻՄ ԱՍԱԼԱ-Ի ԱՆԴԱՄ ՎԱԶԳԵՆ ՍԻՍԼՅԱՆԻ ՀԵՏ
Երևանի պետական համալսարանի «Վարդանանք» ՌՀԴԱ-ի և Պատմության ֆակուլտետի ուսանողական գիտական ընկերության համատեղ նախաձեռնությամբ այսօր կազմակերպվել էր հանդիպում ԱՍԱԼԱ-ի անդամ, «Վան» գործողության ղեկավար Վազգեն Սիսլյանի հետ։