29.10.2015 | 
Հասարակություն
«HEN-GEAR» ՆԱԽԱԳԻԾՆ ԱՄՓՈՓԵՑ ԻՐ ԱՇԽԱՏԱՆՔՆԵՐԸ
«HEN-GEAR» ՆԱԽԱԳԻԾՆ ԱՄՓՈՓԵՑ ԻՐ ԱՇԽԱՏԱՆՔՆԵՐԸ
Այսօր ԵՊՀ գիտխորհրդի նիստերի դահլիճում տեղի ունեցավ «Տեմպուս» ծրագրի «HEN-GEAR» նախագծի ամփոփիչ կոնֆերանսը:

ysu.am-ը բազմիցս անդրադարձել է եվրոպական «Տեմպուս» ծրագրի «HEN-GEAR» նախագծին՝ մանրամասն ներկայացնելով դրա գլխավոր նպատակն ու առաքելությունը: Ինչպես Մայր բուհում, այնպես էլ «HEN-GEAR» նախագծին մասնակցող հայաստանյան ևս 7 բուհերում վերջին երեք տարիների ընթացքում կազմակերպվել են բազմաթիվ սեմինարներ, փորձագիտական հանդիպումներ ու քննարկումներ: Ստեղծվել է պորտալ, որի միջոցով շրջանավարտները կարողանում են գրանցվել, պատասխանել մի շարք հարցերի` այդ կերպ իրենց տվյալներն ու մասնագիտական հնարավորություններն ամրագրելով տվյալների շտեմարանում: Համակարգի կարևորագույն առանձնահատկությունն այն է, որ շրջանավարտների տվյալների շտեմարանում համապատասխան որոնումներ կարող են կատարել գրանցված գործատուները և նրանց պահանջներին բավարարած շրջանավարտներին աշխատանքի առաջարկություն ներկայացնել:  Եվ ահա այսօր ԵՊՀ-ում կազմակերպված ամփոփիչ կոնֆերանսի ընթացքում մանրամասն ներկայացվեց կատարված ամբողջ աշխատանքը:

 

 

Ամփոփիչ կոնֆերանսին ներկա էին ՀՀ կրթության և գիտության փոխնախարար Կարինե Հարությունյանը, Ալմալաուրեա կոնսորցիումի տնօրենության ներկայացուցիչ, տեխնիկական տնօրեն Անջելո Գուերիերոն, ՀՀ ԱՍՀՆ աշխատանքի և զբաղվածության վարչության պետ Թադևոս Ավետիսյանը, ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, ծրագրում ընդգրկված բուհերի ռեկտորներ, կրթության ոլորտի առաջատար մասնագետներ և այլն:

 

ՀՀ կրթության և գիտության փոխնախարարը նկատում է՝ շնորհիվ «Տեմպուս» ծրագրի «HEN-GEAR» նախագծի` հայաստանյան մի շարք բուհերի հնարավորություն է ընձեռվում առավել տեղեկացված լինել իրենց շրջանավարտների զբաղվածության, առկա խնդիրների ու մասնագիտական բացթողումների մասին: Ըստ տիկին Հարությունյանի՝ իտալական փորձը Հայաստանում կիրառելը ողջունելի է և նույնքան նպատակային. «Մենք բարձր ենք գնահատում ծրագրի շարունակականությունը և կարծում ենք, որ տարիներ անց կունենանք մի բազա, որը մեզ հնարավորություն կտա հասկանալու և՛ կրթական ոլորտի, և՛ աշխատաշուկայի խնդիրներն ու բացթողումները»:

 

 

Բոլոր զեկուցողներն էլ միաբերան փաստեցին, որ իտալական այս փայլուն գաղափարն օր առաջ հասնելու է իր վերջնական արդյունքին՝ օգտակար լինելով այն շրջանավարտներին, ովքեր չունեն աշխատանք, բայց ունեն մեծ ներուժ: Մասնակից բուհերի ռեկտորները համոզված են, որ կարող են հետագայում իրենց կրթական ծրագրերն այնպես կազմել, որ բուհն ավարտելուց հետո աշխատանք գտնելու հարցում նոր խնդիրներ առաջ չգան, և ուսանողներն այլևս չմեղադրեն կրթական հաստատություններին:

 

ԵՊՀ պրոռեկտոր Ռուբեն Մարկոսյանը ողջունեց ծրագրի շահառուներին և փաստեց, որ 2013 թ.-ին մեկնարկած այս ծրագիրը ստեղծել է համաբուհական մի պորտալ, որն արդեն իսկ ապահովում է շրջանավարտների, նրանց կրթության ու փորձառության վերաբերյալ համապարփակ տեղեկատվական շտեմարան. «Այս երեք տարիների աշխատանքի արդյունքում այսօր իսկ համակարգում գրանցվել է շուրջ 9.000 շրջանավարտ, և առցանց հասանելի է մոտ 7.000 կենսագրություն»:

 

 

Ալմալաուրեա կոնսորցիումի տնօրենության ներկայացուցիչ, տեխնիկական տնօրեն Անջելո Գուերիերոն նշեց, որ իտալական փորձը Հայաստանին փոխանցելով` համագործակցության լայն դաշտ է ստեղծում ինչպես հայաստանյան բուհերի, այնպես էլ միջազգային կրթական կառույցների համար. «Իտալական ավելի քան 70 համալսարանների մասնագիտական փորձը Հայաստանում նոր ծրագրերի սկիզբ կարող է դնել: Այս երեք տարիների ընթացքում մենք ծրագրում կառուցվածքային փոփոխություններ ենք առաջարկել, ամրապնդել նաև բարձրագույն ուսումնական հաստատությունների հետ հարաբերությունները: Կան որոշ բացեր, բայց դրանք մենք նախատեսում ենք ավարտին հասցնել 2016 թ.-ին»:

 

Անջելո Գուերիերոն վստահ է՝ ծրագրի շահառու կողմերը, բացի համալսարաններից, նաև կառավարությունն ու նախարարություններն են. «Ե՛վ աշխատող, և՛ չաշխատող շրջանավարտները պետք է լրացուցիչ գիտելիքներ ձեռք բերեն, որպեսզի համապատասխանեն շուկայի պահանջներին: Համալսարանները պետք է համապատասխան հմտություններով մասնագետներ պատրաստեն և՛ տեղական, և՛ միջազգային շուկայում աշխատելու համար: Այդ ամենին կարող է նպաստել փորձի փոխանակումը, նմանատիպ համակարգերում գրանցվելը և այլն»:

 

«Այս հարթակը հնարավորություն է տալիս մեզ հաշվի առնելու գործատուների, ինչպես նաև շրջանավարտների կարծիքը, իսկ դա էլ իր հերթին նշանակում է, որ համալսարաններն իրենց գործունեության մեջ պետք է հաշվի առնեն իրենց շրջանավարտներից ստացած հետադարձ կարծիքները: Գործատուներն օգտագործում են այս հարթակը լավ կադրեր գտնելու համար, նոր համալսարաններ էլ են միանում համակարգին. դա էլ նշանակում է, որ հարթակը դառնում է համապետական մի մեծ նախաձեռնություն»,- ասաց «HEN-GEAR» նախագծի համակարգող Լուիզա Մենգորն ու հավելեց, որ իրենք բոլոր գործընկերների հետ երկար ժամանակ բանակցությունների մեջ են եղել` քննարկելով բոլոր քայլերի կենսունակությունը՝ շարունակականությունն ապահովելու համար:

 

«Տեմպուս» ծրագրի «HEN-GEAR» նախագծի եզրափակիչ կոնֆերանսի բուն զեկուցումները ներկայացվեցին կլոր սեղան-քննարկման ընթացքում: Ե՛վ իտալացի, և՛ հայաստանյան կրթական ոլորտի ներկայացուցիչները մանրամասն ներկայացրին ծրագրի նպատակայնությունն ու անցկացրին բաց քննարկում:

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։