16.11.2022 | 
Ուսանողական, Կրթություն
«ԵՊՀ-ՈՒՄ ԴԱՍԱՎԱՆԴՈՒՄ ԵՆ ԱՌԱՋԱՏԱՐ ՏԵՍԱԲԱՆ-ԳԻՏՆԱԿԱՆՆԵՐ». ԽԱՉԱՏՈՒՐ ՄԱՆՈՒԿՅԱՆ
«ԵՊՀ-ՈՒՄ ԴԱՍԱՎԱՆԴՈՒՄ ԵՆ ԱՌԱՋԱՏԱՐ ՏԵՍԱԲԱՆ-ԳԻՏՆԱԿԱՆՆԵՐ». ԽԱՉԱՏՈՒՐ ՄԱՆՈՒԿՅԱՆ
Խաչատուր Մանուկյանը ԵՊՀ ռադիոֆիզիկայի ֆակուլտետի ուսանող է: Նրա հետ զրուցել ենք մասնագիտության ընտրության, գիտական գործունեության, ապագայի ծրագրերի և այլ հարցերի շուրջ:

Պատմում է Խաչատուրը:

 

Միշտ վստահ եմ եղել, որ ամենապրոֆեսիոնալ և պատրաստված մասնագետները դասավանդում են ԵՊՀ-ում: 

 

Որակյալ կրթություն ստանալու նպատակով ընդունվեցի Երևանի պետական համալսարան: Իմ ընտանիքում գիտությանն ամենամոտը հայրս է, և նրա խորհրդով էլ ընդունվեցի ռադիոֆիզիկայի ֆակուլտետ: Դեռևս առաջին կուրսում, ծանոթանալով մասնագիտությանս, հասկացա, որ ճիշտ ընտրություն եմ կատարել:

 

 

Ռադիոֆիզիկան ժամանակակից մասնագիտություն է:

 

Սովորում եմ կիսահաղորդիչների ֆիզիկայի և միկրոէլեկտրոնիկայի բաժնում, մեծ հետաքրքրությամբ եմ ուսումնասիրում այս ոլորտը: Վստահ կարող եմ ասել, որ այն ամենից արագ զարգացող, չափազանց ուշագրավ, ապագայի մեծ հեռանկարներ ունեցող և խիստ արդիական մասնագիտություն է նրանց համար, ովքեր հետաքրքրվում են ֆիզիկական գիտություններով:

 

Գիտություն, ծրագրավորում, սպորտ. ես ընտրում եմ գիտությամբ զբաղվելը:

 

Կրթություն ստանալուն զուգահեռ՝ աշխատում եմ որպես ծրագրավորող, հետաքրքրվում եմ էլեկտրոնիկայով, կիսահաղորդիչների ֆիզիկայով: Ի դեպ, բոլորովին վերջերս սկսել եմ գործունեություն կիսահաղորդիչների լաբորատորիայում: Չորս տարեկանից սպորտով եմ զբաղվում, ավելի կոնկրետ՝ սառույցի հոկեյով: Նախասիրություններս շատ են, բայց վերջնական որոշումս կայացրել եմ. ինձ տեսնում եմ գիտության մեջ: Վստահեցնում եմ՝ գիտնականի աշխատանքը մեծ դեր ու նշանակություն ունի մարդկության համար:

 

 

Գիտությամբ զբաղվելը ենթադրում է անցնել բարդ ճանապարհ:

 

Այս ոլորտում սկսնակ եմ, դեռ ուսումնասիրում եմ ռադիոկապը, ալեհավաքները, ընդունիչները, փոխակերպիչները և այլն: Այժմ հիանում եմ գիտնականների կատարած աշխատանքներով ու հայտնագործություններով: Ինձ համար անչափ կարևոր է այն, որ ռադիոֆիզիկայի ֆակուլտետում ոչ միայն ստանում եմ տեսական գիտելիքներ, այլև հնարավորություն եմ ունենում գիտության ոլորտում պրոֆեսիոնալներից խորհուրդներ հարցնելու և այնպիսի հարցեր տալու, որոնց պատասխանները չկան համացանցում ու գրքերում: Վստահ կարող եմ ասել, որ ԵՊՀ-ում դասավանդում են առաջատար տեսաբան-գիտնականներ:

 

Ցանկանում եմ իմ ավանդը ներդնել Հայաստանում տեխնոլոգիական զարգացման մեջ:

 

Գիտության մեջ որոշակի քայլեր արդեն կատարել եմ: Համոզված եմ՝ գիտելիքներ ձեռք բերելու, զարգանալու, հաջողության հասնելու համար անհրաժեշտ է միայն ամուր կամք:

 

Կարինե Հովհաննիսյան

Այլ նորություններ
ԵՊՀ ՖԻԶԻԿԱՅԻ ՖԱԿՈՒԼՏԵՏԸ ՇԱՐՈՒՆԱԿՈՒՄ Է ԸՆԴԼԱՅՆԵԼ ՀԱՄԱԳՈՐԾԱԿՑՈՒԹՅՈՒՆՆԵՐԻ ՇՐՋԱՆԱԿԸ
ԵՊՀ ֆիզիկայի ֆակուլտետում Տվենտեի համալսարանի պրոֆեսոր, Մոսկվայի ֆիզիկատեխնիկական ինստիտուտի լաբորատորիայի ղեկավար Ալեքսանդր Գոլուբովն անցկացրեց «Քվանտային տոպոլոգիայի ֆենոմենը գերհաղորդական համակարգում» թեմայով սեմինար:
ՏԱՐԻՆ ՉԱՐԵՆՑՅԱՆ Է. ԵՊՀ ՈՒՍԱՆՈՂՆԵՐԸ ԿԱՐԴՈՒՄ ԵՆ ՊՈԵՏԻ ԵՐԿԵՐԻ ՌՈՒՍԵՐԵՆ ԹԱՐԳՄԱՆՈՒԹՅՈՒՆՆԵՐԸ
ԵՊՀ ռուս բանասիրության ֆակուլտետում տեղի ունեցավ «Եղիշե Չարենցը ռուս պոետների թարգմանություններում» խորագրով միջոցառում՝ նվիրված մեծ գրողի 125-ամյակին: