19.02.2007 | 
Կրթություն
2010-Ը ՍԿԻԶԲ Է
2010-Ը ՍԿԻԶԲ Է
ՀՀ պետական բուհերի ռեկտորների խորհրդի անդամները հավաքվել էին ԵՊՀ «Համալսարան» ուսումնաարտադրական բազայում` քննարկելու մեր բարձրագույն կրթության առջեւ ծառացած հիմնական խնդիրները:

«Մարդկանց մոտ տպավորություն կա, որ ինչ-որ հերթական բարեփոխումներ են սկսվել, որ պետք է արագ-արագ արվի մինչեւ Բոլոնիայի գործընթացով նախանշված 2010 թվականը: Խնդիրը շատ ավելի լուրջ է: Փոփոխվում է մեր բարձրագույն կրթության ամբողջ համակարգը, իսկ հիմնական աշխատանքները պետք է սկսվեն 2010 թ-ից հետո»,- քննարկման ժամանակ նկատեց Կրթության եւ գիտության նախարար Լեւոն Մկրտչյանը:

Ռեկտորների խորհրդի արտագնա նիստը պայմանականորեն բաժանված էր երկու մասի: Առաջին մասում խոսվեցին եւ քննարկվեցին ուսումնական գործընթացի վերակառուցման հիմնախնդիրները ՀՀ բարձրագույն կրթության համակարգի բարեփոխումների պայմաններում: ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը ներկայացրեց բարեփոխումների նպատակներն ու խնդիրները, ինչպես նաեւ հիմնական գործողությունները:

Ներկայացվեց նաեւ ԵՊՀ մագիստրատուրայի նոր կրթակարգը: 2007-2008 ուս. տարվանից ԵՊՀ-ն մագիստրոսներ է պատրաստելու կրեդիտային համակարգով: Հայաստանի պետական ճարտարագիտական համալսարանը արդեն անցել է կրեդիտային համակարգի, սակայն միայն մագիստրատուրայում, սեպտեմբերից բակալավրիատում էլ կրթությունը կկազմակերպեն նոր կրթակարգով: Երեւանի պետական տնտեսագիտական համալսարանն ու Ագրարային համալսարանը նույնպես նոր ուսումնական տարվանից կներդնեն կրեդիտային համակարգը:

Նիստի երկրորդ մասում խոսվեց բուհական գիտության հիմնական խնդիրների մասին, ինչպես նաեւ քննարկվեցին համատեղ գիտական լաբորատորիաների ստեղծման, գիտական ծրագրերի իրականացման, ինչպես նաեւ միասնական տեխնոպարկերի կառուցման խնդիրները:

«Նմանատիպ հանդիպումները ավանդական ենք դարձնելու, որովհետեւ դրանք շատ լավ միջոց են ոչ ֆորմալ պայմաններում քննարկելու մեր բոլոր բուհերի առջեւ ծառացած հիմնական խնդիրները, եւ քննարկումների արդյունքնում գտնել օպտիմալ լուծումներ»,- նկատեց ԵՊՀ ռեկտոր Արամ Սիմոնյանը:

Այլ նորություններ
ԳԻՏՈՒԹՅԱՆ ՄԵՋ ՏԵՍՈՒԹՅՈՒՆԸ ՆԱՀԱՆՋԵԼ Է՝ ՃԱՆԱՊԱՐՀ ԲԱՑԵԼՈՎ ՓՈՐՁԱՐԱՐՈՒԹՅԱՆ ՈՒ ԲԱՐՁՐ ՏԵԽՆՈԼՈԳԻԱՆԵՐԻ ԿԻՐԱՌՈՒԹՅԱՆ ՀԱՄԱՐ. ԱՐՍԵՆ ԲԱԲԱՋԱՆՅԱՆ
ԵՊՀ ռադիոֆիզիկայի ֆակուլտետի կիրառական էլեկտրադինամիկայի և մոդելավորման ամբիոնում ներդրվել է «Էլեկտրադինամիկական պրոցեսների համակարգչային մոդելավորում և նմանակում» նոր մագիստրոսական ծրագիր, որը միտված է ուսանողներին ռադիոֆիզիկական խնդիր¬ների համակարգչային մոդելավորման և նախագծման սկզբունքների ու դրանց առանձնահատկությունների վերաբերյալ գիտելիք և հմտություններ տրամադրելուն:
ՈՒՍԱՆՈՂՆԵՐԸ ՊՐԱԿՏԻԿ ԳԻՏԵԼԻՔՆԵՐ ԵՆ ՍՏԱՆՈՒՄ ԳՈՐԾՈՂ ՄԱՍՆԱԳԵՏՆԵՐԻ ՀԵՏ ՀԱՆԴԻՊՈՒՄՆԵՐԻ ԸՆԹԱՑՔՈՒՄ
ԵՊՀ իրավագիտության ֆակուլտետի 2-րդ կուրսի ուսանողների համար «Ֆինանսական իրավունք» առարկայի շրջանակում կազմակերպվել էր հանդիպում-դասախոսություն «Նաիրի Ինշուրանս» ապահովագրական ընկերության գործադիր տնօրենի խորհրդական Արտակ Մարտիրոսյանի հետ: