29.04.2013 | 
Հասարակություն
ԱՆԳԼԵՐԵՆԻ ՕՐԸ ՆՇՎԵՑ ԵՊՀ-ՈՒՄ
ԱՆԳԼԵՐԵՆԻ ՕՐԸ ՆՇՎԵՑ ԵՊՀ-ՈՒՄ
Տոնը համալսարանում էր մեկտեղել արտասահմանյան դեսպանների, հյուրերի և մարդկանց, ովքեր անգլերենի հետ այս կամ այն ձևով առնչվում են:

Անգլերեն լեզվի օրը նշվում է ապրիլի 23-ին` Շեքսպիրի ծննդյան և մահվան օրը:  Առաջին անգամ Անգլերեն լեզվի օրը, ինչպես և ՄԱԿ-ի պաշտոնական մյուս լեզուների օրերը նշել են 2010 թվականին: Իսկ այսօր Շեքսպիրի լեզվին նվիրված միջոցառում էր կազմակերպվել ԵՊՀ մշակույթի կենտրոնում` Ռոմանագերմանական բանասիրության ֆակուլտետի և ՄԱԿ-ի հայաստանյան գրասենյակի հետ համատեղ:

 

«Ուրախ եմ, որ ձեզ ողջունում եմ Անգլերենի օրվա կապակցությամբ, և ուրախ եմ, որ դա անում եմ հայերեն: Վերջին 20 տարիների ընթացքում Հայաստանում անգլերենի նկատմամբ հետաքրքրությունը չափազանց մեծացել է: Գիտակրթական տեղեկատվության 80%-ից ավելին անգլերենով է: Եթե ուզում ենք տիրապետել այդ ինֆորմացիային և ստեղծել ցանկալի կարիերա, պետք է տիրապետել շատ լեզուների, այդ թվում` անգլերենին` մայրենիին զուգահեռ»,- միջոցառման սկզբում նշեց ԵՊՀ ռեկտոր Արամ Սիմոնյանը:  

 

Միջոցառմանը մասնակցելու էին եկել Հայաստանում Հնդկաստանի դեսպան Սուրեշ Բաբուն, Մեծ Բրիտանիայի և Հյուսիսային Իռլանդիայի Միացյալ Թագավորության դեսպան Ջոնաթան Ջեյմս Էյվսը, ԱՄՆ դեսպան Ջոն Հեֆերնը, ովքեր խոսեցին անգլերենի ու գլոբալիզացվող աշխարհում դրա կարևորության մասին:

 

«Անգլերենը մեզ համար ևս շատ կարևոր լեզու է, քանի որ դրանով խոսում են ոչ միայն հասարակ քաղաքացիները. այն օգտագործվում է նաև կրթական, բիզնես և նույնիսկ կառավարական միջավայրերում: Կան հնդկական ծագումով հայտնի գրողներ, ովքեր անգլերենն օգտագործել են որպես մայրենի լեզու»,- խոսելով իր երկրում այս լեզվի նշանակության մասին` նշեց Հայաստանում Հնդկաստանի դեսպան Սուրեշ Բաբուն:

 

Հայաստանում օտար լեզուների մասնագետներ պատրաստող խոշոր կենտրոններից մեկը ԵՊՀ ռոմանագերմանական բանասիրության ֆակուլտետն է, որի շրջանավարտներն աշխատում են միջազգային կազմակերպություններում, դեսպանատներում և այլուր: Ֆակուլտետը, ունենալով օտար լեզուների դասավանդման հարուստ փորձ, շատ է կարևորում բազմալեզու միջավայրի ստեղծումը:

 

«Մեր ուսանողները նաև 2-րդ լեզու ընտրելու հնարավորություն ունեն: Մեծ ուշադրություն ենք դարձնում որակի ապահովմանը: Ուսանողական հարցումները ցույց են տալիս, որ նրանք գոհ են լեզվի դասավանդման որակից, բայց, բնականաբար, դեռ աշխատելու տեղ ունենք: Շատ ենք կարևորում նաև լեզվակիրների հետ շփումները, ինչի արդյունքում հրավիրվում են արտասահմանյան մասնագետներ, ովքեր դասավանդում են հենց անգլերեն»,- փաստում է ֆակուլտետի դեկան Սամվել Աբրահամյանը:

 

Նշենք, որ արաբերենը, չինարենը, անգլերենը, ֆրանսերենը, ռուսերենը և իսպաներենը  ՄԱԿ-ի վեց պաշտոնական լեզուներն են:  Անգլերենը պաշտոնական է համարվում Ասիայի և Աֆրիկայի որոշ երկրներում: Անգլերենը և ֆրանսերենը ՄԱԿ-ի քարտուղարության աշխատանքային լեզուներն են: Որոշ հաշվարկներով ավելի քան 500 միլիոն մարդ աշխարհում անգլերենի լեզվակիրներ են:

 

Միջոցառման տոնական տրամադրությունն ապահովում էին Մշակույթի կենտրոնի սաները` անգլալեզու երգերով ու ասմունքով:

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։