02.07.2013 | 
Հասարակություն
ԴԻՆ ՇՓԻԼՄԱՆՆ ԱՐԺԱՆԱՑԱՎ ԵՊՀ ՊԱՏՎԱՎՈՐ ԴՈԿՏՈՐԻ ԿՈՉՄԱՆԸ
ԴԻՆ ՇՓԻԼՄԱՆՆ ԱՐԺԱՆԱՑԱՎ ԵՊՀ ՊԱՏՎԱՎՈՐ ԴՈԿՏՈՐԻ ԿՈՉՄԱՆԸ
Համալսարանականների հյուրն էր Մարդու իրավունքների եվրոպական դատարանի նախագահ Դին Շփիլմանը:

Այսօր ԵՊՀ գիտխորհրդի նիստերի դահլիճում Մայր բուհի պրոֆեսորադասախոսական կազմի ներկայացուցիչները հանդիպեցին Մարդու իրավունքների եվրոպական դատարանի նախագահ Դին Շփիլմանի հետ: Հանդիպմանը ներկա էր նաև ՀՀ ՍԴ նախագահ Գագիկ Հարությունյանը և Մարդու իրավունքների եվրոպական դատարանի դատավոր Ալվինա Գյուլումյանը:

 

Հյուրին նախ ողջունեց ռեկտոր Արամ Սիմոնյանը, ով խոսեց մարդու իրավունքների պաշտպանության ոլորտի խնդիրների մասին, ինչպես նաև որոշ մանրամասներ ներկայացրեց հյուրի կենսագրական հարուստ կյանքից:

 

«Ուրախ ենք Ձեզ ընդունելու Մայր բուհի պատերի ներքո: Մարդու իրավունքների եվրոպական կոնվենցիան իր մեջ ներառում է համամարդկային արժեքներ, որոնք ուղղված են մարդու իրավունքների պաշտպանությանը, խոսքի ազատությանը, ցեղասպանության դատապարտմանը և մասնավորապես  ժողովրդավարական հասարակության կառուցմանը»,- ասաց Արամ Սիմոնյանը:

 

Դին Շփիլմանը հակիրճ խոսեց Մարդու իրավունքների եվրոպական դատարանի պատմության, անցած ուղու մասին, ներկայացրեց մարդու իրավունքների պաշտպանությանն ուղղված եվրոպական քաղաքականությունը, արժեհամակարգը և այն հիմնական սկզբունքները, որով առաջնորդվում է և՛ ԵՄ-ն, և՛ դատարանը:

 

Այնուհետև ԵՊՀ ռեկտորը հասարակական և գիտական բեղուն գործունեություն ծավալելու համար Դին Շփիլմանին հանձնեց ԵՊՀ պատվավոր դոկտորի կոչման հավաստագիրը, ԵՊՀ հուշամեդալ, ինչպես նաև Մայր բուհի ու Հայաստանի մասին պատմող գրքեր և բուկլետներ:

 

«Ինձ համար մեծ պատիվ է այսպիսի բարձր կոչմանն արժանանալու համար: Կարծում եմ, ի դեմս ինձ, այս կոչմանն արժանացել է նաև Մարդու իրավունքների եվրոպական դատարանը: Ընդհանրապես համալսարանները մեծ դեր ունեն երկրի գրեթե բոլոր ճյուղերի զարգացման և բարգավաճման գործում: Առանց որակյալ համալսարանական կրթության՝ ոչ մի բնագավառ կայանալ պարզապես չի կարող, ուստի ձեր դերը չափազանց կարևոր է: Գիտեմ, որ Երևանի պետական համալսարանը հարուստ անցյալ ունի, և վստահաբար կարող եմ ասել, որ ապագան էլ նույն կերպ փառահեղ է լինելու: Շատ շնորհակալ եմ»,- եզրափակեց Դին Շփիլմանը:

 

Ելույթներից հետո ներկաները մի շարք հարցեր ուղղեցին հյուրին: Դրանք հիմնականում վերաբերում էին Մարդու իրավունքների եվրոպական դատարանի գործունեությանը, ծանրաբեռնվածությանը, արդյունավետ գործելաճին ուղղված ծրագրերին, բարոյական վնասի փոխհատուցման չափանիշներին, ինչպես նաև դատարան դիմող երկրներին, մասնավորապես Հայաստանին վերաբերող վճակագրական տվյալներին:

 

Շփիլմանը նշեց, որ ներկայումս Մարդու իրավունքների եվրոպական դատարանի վարույթում Հայաստանն ունի 873 դիմում, որի 87 տոկոսը քննման փուլում է: Բանախոսի խոսքերով՝ այս թիվը, համեմատած այլ երկրների հետ, այդքան էլ մեծ թիվ չի կազմում:

Ալվինա Գյուլումյանն էլ հավելեց, որ նշված 873 դիմումներից մոտ 500-ը ԼՂՀ հակամարտության վերաբերյալ Ադրբեջանի Հանրապետության քաղաքացիների դիմումներն են ընդդեմ ՀՀ-ի:

Այլ նորություններ
ՀԱՄԱԼՍԱՐԱՆԱԿԱՆՆԵՐՆ ԱՄՓՈՓՈՒՄ ԵՆ ԱՆՑՆՈՂ ՏԱՐԻՆ․ ՄԱՍ 2-ՐԴ
Համալսարանականները շարունակում են ամփոփել անցնող տարվա ընթացքում կատարած աշխատանքներն ու գրանցած հաջողությունները։ Տարին մշակութային էր, ԵՊՀ ուսանողների և շրջանավարտների համար՝ հագեցած աշխատանքի առաջարկներով։
ՀԱՄԱԼՍԱՐԱՆԱԿԱՆՆԵՐՆ ԱՄՓՈՓՈՒՄ ԵՆ ԱՆՑՆՈՂ ՏԱՐԻՆ. ՄԱՍ 1-ԻՆ
Ավարտվում է 2022 թվականը, և համալսարանականները ներկայացնում են անցնող տարվա ընթացքում գրանցված հաջողություններն ու ձեռքբերումները, ինչպես նաև անդրադառնում ապագայի ծրագրերին։ Հաջողությունները եղել են բոլոր ուղղություններով՝ գիտականից մինչև ֆինանսական։