11.11.2013 | 
Գիտություն
ԳԻՏՈՒԹՅԱՄԲ ԶԲԱՂՎՈՒՄ ԵՆ ՈՒՍԱՆՈՂՆԵՐԸ
ԳԻՏՈՒԹՅԱՄԲ ԶԲԱՂՎՈՒՄ ԵՆ ՈՒՍԱՆՈՂՆԵՐԸ
Այսօր ԵՊՀ հայ բանասիրության ֆակուլտետում մեկնարկեց աշնանային գիտական նստաշրջանը:

Ամեն տարի անցկացվող միջոցառուման այս տարվա առանձնահատկությունն այն էր, որ ԵՊՀ պատմության և հայ բանասիրության ֆակուլտետներից բացի` մասնակցում էին ևս 4 բուհերի՝ Վ. Բրյուսովի անվան պետական լեզվաբանական համալսարանի, Գյումրու մանկավարժական ինստիտուտի, Սևանի Վազգենյան դպրանոցի, Գևորգյան հոգևոր ճեմարանի և Գորիսի պետական համալսարանի ուսանողներ: Կազմակերպիչը ֆակուլտետի Ուսանողական գիտական ընկերությունն էր:

 

«Գիտաժողովի մասնակցելը բավականին բարդ է, քանի որ պետք է գրել, ներկայացնել, վիճել, ապացուցել, և շատ լավ է, որ մեր ուսանողները դրան պատրաստ են: Մի շրջան ՈՒԳԸ-ն այնքան էլ ակտիվ չէր աշխատում, բայց սկսեցին գիտաժողովներ, նստաշրջաններ կազմակերպել, որոնց արդեն մասնակցում են մեծ թվով ուսանողներ ոչ միայն ԵՊՀ-ից, այլև Հայաստանի այլ քաղաքների բուհերից»,- ողջունելով ուսանողների նախաձեռնությունը՝ նշեց Հայ բանասիրության ֆակուլտետի դեկանի տեղակալ Արտաշես Սարգսյանը:

 

Ինչպես և նախորդ տարիներին, այս անգամ ևս կոնկրետ թեմաներ չեն առաջադրվել. ուսանողներն ընտրել են ըստ իրենց նախասիրությունների, իսկ կազմակերպիչները ներկայացված նյութերը նախապես խմբավորել են և բաժանել 4 սեկցիաների՝ Հայոց լեզվի պատմություն և լեզվաբանություն, Ժամանակակից հայոց լեզու, Գրականություն և Մանկավարժություն:

 

«Ամեն տարի տպագրվում է ԵՊՀ ուսանողական գիտական ընկերության ժողովածուն, որում բավականին շատ են մեր ֆակուլտետի ուսանողների հոդվածները: Այսպիսի գիտաժողովների մասնակցելը մեր ուսանողներին մի շարք առավելություններ է տալիս: Ասպիրանտուրա ընդունվելու կամ հայցորդ ձևակերպվելու համար այժմ պահանջվում է ունենալ տպագրված առնվազն երկու գիտական հոդված, իսկ այդ ժողովածուն այդ հնարավորությունը տալիս է»,- նշեց ֆակուլտետի դասախոս Աշոտ Տեր-Մինասյանը:

 

Հայ գրականության պատմության ամբիոնի վարիչ, բան. գիտ. դոկտոր, պրոֆեսոր Սամվել Մուրադյանն էլ վստահեցնում  է, որ այս գիտաժողովներն ուսանողների համար փորձ ձեռք բերելու, թրծվելու լավ հարթակ են. «Վաղը, մյուս օրը մեր փոխարեն դուք եք զբաղվելու լեզվի ու գրականության խնդիրներով ու դրան պետք է պատրաստվել այսօրվանից»:

 

Ուսանողական գիտական նստաշրջանը կտևի մինչև նոյեմբերի 15-ը, բոլոր մասնակիցները կստանան հավաստագրեր, իսկ լավագույն նյութերը հաջորդ տարի կտպագրվեն ՈՒԳԸ-ի գիտական հանդեսում:

Այլ նորություններ
ՂՐՂԶՍՏԱՆՈՒՄ ԱՆՑԿԱՑՎԵԼՈՒ Է ԵԱՏՄ ՏԱՐԱԾՔՈՒՄ ԱՄԵՆԱՄԵԾ «ԵՎՐԱՍԻԱԿԱՆ ՇԱԲԱԹ-2019» ԽՈՐԱԳՐՈՎ ՀԱՄԱԺՈՂՈՎԸ
Եվրասիական տնտեսական միության (ԵԱՏՄ) գործարարները և ակտիվ երիտասարդները հանդիպելու են մեկ հարթակում՝ քննարկելու տնտեսական ինտեգրման և բիզնես համագործակցության հարցերը, որին հեռակա կարգով կարող են մասնակցել նաև ԵՊՀ տարբեր ֆակուլտետների դասախոսներ, երիտասարդ գիտնականներ, ասպիրանտներ և փորձագետներ:
ԼՈՒՅՍ ԵՆ ՏԵՍԵԼ «ԵՊՀ ՈՒԳԸ ԳԻՏԱԿԱՆ ՀՈԴՎԱԾՆԵՐԻ ԺՈՂՈՎԱԾՈՒ» ԵՐԻՏԱՍԱՐԴԱԿԱՆ ԳԻՏԱԿԱՆ ՊԱՐԲԵՐԱԿԱՆԻ 2019 ԹՎԱԿԱՆԻ ԱՌԱՋԻՆ ՀԱՄԱՐՆԵՐԸ
ԵՊՀ գիտխորհրդի նիստերի դահլիճում այսօր տեղի ունեցավ «ԵՊՀ ՈՒԳԸ գիտական հոդվածների ժողովածու» երիտասարդական գիտական պարբերականի Բնական և ֆիզիկամաթեմատիկական գիտությունների 1.1 (27), Հումանիտար և հասարակական գիտությունների 1.2 (28) համարների շնորհանդեսը: