11.07.2022 | 
Կրթություն, Գիտություն
ՄԵԿՆԱՐԿԵԼ Է «ՍԻՄԵՏՐԻԱՅԻ ՄԵԹՈԴՆԵՐԸ ՖԻԶԻԿԱՅՈՒՄ» ԽՈՐԱԳՐՈՎ ՄԻՋԱԶԳԱՅԻՆ ԳԻՏԱԺՈՂՈՎԸ
ՄԵԿՆԱՐԿԵԼ Է «ՍԻՄԵՏՐԻԱՅԻ ՄԵԹՈԴՆԵՐԸ ՖԻԶԻԿԱՅՈՒՄ» ԽՈՐԱԳՐՈՎ ՄԻՋԱԶԳԱՅԻՆ ԳԻՏԱԺՈՂՈՎԸ
Աշխարհի տարբեր երկրներից ավելի քան վաթսուն գիտնականներ եկել են Երևան՝ քննարկելու ֆիզիկայում սիմետրիայի մեթոդների ուսումնասիրության վերջին ձեռքբերումները:

Այսօր մեկնարկեց ԵՊՀ ակադեմիկոս Ալեքսեյ Սիսակյանի անվան հեռանկարային հետազոտությունների միջազգային կենտրոնի, ԵՊՀ ֆիզիկայի ֆակուլտետի, ԿԳՄՍՆ գիտության պետական կոմիտեի, Միջուկային հետազոտությունների միացյալ ինստիտուտի (Դուբնա) համատեղ կազմակերպած միջազգային 18-րդ գիտաժողովը՝ «Սիմետրիայի մեթոդները ֆիզիկայում» խորագրով:

 

Երկու տարին մեկ անգամ անցկացվող գիտաժողովի մեկնարկը տրվել է դեռևս 1993 թ․ Միջուկային հետազոտությունների միացյալ ինստիտուտում: Այն անցկացվում է կա՛մ Դուբնայում, կա՛մ Հայաստանում:

 

ԵՊՀ ակադեմիկոս Ալեքսեյ Սիսակյանի անվան հեռանկարային հետազոտությունների միջազգային կենտրոնի տնօրեն Գեորգի Պողոսյանը, ընդգծելով այսօրինակ գիտաժողովների կարևորությունը Հայաստանում նաև «գիտական տուրիզմի» զարգացման տեսանկյունից, նշեց. «Այս գիտաժողովը շատ կարևոր է ինչպես երիտասարդ, այնպես էլ փորձառու գիտնականների համար․ նրանք փորձի և գիտելիքների փոխանակման հնարավորություն են ստանում»։

 

 

Միջազգային 18-րդ գիտաժողովին մասնակցելու, ոլորտին առնչվող խնդիրների մասին քննարկումներ իրականացնելու և փորձի փոխանակման նպատակով այս տարի Հայաստան են ժամանել գիտնականներ Մեքսիկայից, Ֆրանսիայից, Գերմանիայից, Ռուսաստանից, Լեհաստանից, Բուլղարիայից և այլ երկրներից:  

 

Գիտաժողովի կազմակերպիչ Ելենա Կոլգանովան, ով ևս հանդես եկավ զեկույցով, կարևորեց գիտաժողովի կազմակերպումը՝ այն համարելով գիտության զարգացմանն ուղղված լավագույն խթան։

 

«Բոլոր զեկուցումները, որոնք ներկայացնում են աշխարհի տարբեր երկրներից ժամանած գիտնականները, շատ կարևոր են այն մարդկանց համար, ովքեր զբաղվում են ֆունդամենտալ գիտությամբ»,- իր խոսքում ասաց նա։

 

 

Պրոֆեսոր Հրաչ Բաբուջյանը տասը տարուց ավելի է՝ մասնակցում է գիտաժողովին, փաստում է, որ այս գիտաժողովի մասնակցությունը յուրաքանչյուր տարի նոր գիտելիքներ է տալիս և նոր ծանոթությունների հնարավորություն ստեղծում։

«Գիտությունը «փակված» մարդկանց գործունեություն չէ․ այն սոցիալական բարդ երևույթ է: Գիտնականներին մշտապես անհրաժեշտ է միմյանց հետ շփումը, քննարկումները»,- ասաց պրոֆեսորը:

 

 

 

Հ. Բաբուջյանը, անդրադառնալով գիտաժողովներին երիտասարդների մասնակցությանը, նշեց, որ պետք է անել ամեն բան՝ երիտասարդների շրջանում գիտության հանդեպ հետաքրքրություն ու սեր արթնացնելու ուղղությամբ:

 

Նշենք, որ հնգօրյա գիտաժողովին ներկայացված զեկուցումները տպագրվելու են հոդվածների տեսքով:

 

Այլ նորություններ
«ՆՈՐԱՐԱՐԱԿԱՆ ՍԱՐՔԱՎՈՐՈՒՄՆԵՐՈՎ ՀԱԳԵՑՎԱԾՈՒԹՅՈՒՆԸ ՆՊԱՍՏՈՒՄ է ԵՊՀ-ՈՒՄ ԳՈՐԾՆԱԿԱՆ ԴԱՍԵՐԻ ԱՐԴՅՈՒՆԱՎԵՏ ԿԱԶՄԱԿԵՐՊՄԱՆԸ». ԱՆՆԱ ՄԱԴԱԹՅԱՆ
ԵՊՀ եվրոպական լեզուների և հաղորդակցության ֆակուլտետի ուսանող Աննա Մադաթյանը «Էրազմուս+» միջազգային կրեդիտային շարժունության ծրագրով կրթություն է ստացել Իսպանիայի Լա Կորունյա համալսարանում: Մեզ հետ զրույցում Աննան պատմել է լեզուների իմացության կարևորության, Իսպանիայում անցկացրած օրերի և այլ թեմաների մասին։
«ԵՊՀ-ՈՒՄ ԳՈՐԾՈՂ ՈՒՍԱՆՈՂԱԿԱՆ ԿԱՌՈՒՅՑՆԵՐԸ ՄԻՏՎԱԾ ԵՆ ՀԱԳԵՑՆԵԼՈՒ ՈՒՍՈՒՄՆԱՌՈՒԹՅԱՆ ՏԱՐԻՆԵՐԸ»․ ԼԵՆԱ ՄՈՒՐԱԴՅԱՆ
ԵՊՀ աշխարհագրության և երկրաբանության ֆակուլտետի այս տարվա շրջանավարտներից է ֆակուլտետի ուսանողական խորհրդի նախագահ Լենա Մուրադյանը։ Լենայի հետ զրուցել ենք մասնագիտության ընտրության, ուսանողական հագեցած տարիների և այլ թեմաների շուրջ: