05.09.2006 | 
Հասարակություն
ՍԻՐԻԱՅԻ ԱՐԱԲԱԿԱՆ ՀԱՆՐԱՊԵՏՈՒԹՅԱՆ ՄՈՒՖԹԻՆ ԵՊՀ-ՈՒՄ
ՍԻՐԻԱՅԻ ԱՐԱԲԱԿԱՆ ՀԱՆՐԱՊԵՏՈՒԹՅԱՆ ՄՈՒՖԹԻՆ ԵՊՀ-ՈՒՄ
Մեզ համար բարեկամ մի երկրի ու հարազատ ժողովրդի նկատմամբ սիրո եւ երախտագիտության զգացումը, որ յուրաքանչյուր հայի սրտում է, մեծանում ու ամրապնդվում է այսօր, երբ պատմությունը թույլ է տալիս տեսնել եւ գնահատել փաստերը:

Սիրիայի Արաբական Հանրապետության մուֆթի շեյխ Ահմադ Նադր ալ Դին Հասսունին ողջունեց Երեւանի պետական համալսարանի ռեկտոր, պրոֆեսոր Արամ Սիմոնյանը:


Սեպտեմբերի 5-ին Մայր բուհի Աստվածաբանության ֆակուլտետի ուսանողների եւ դասախոսների հետ հանդիպման եկած հոգեւոր առաջնորդն ուրախ էր, որ Հայաստանի բնակչության մեծ մասը երիտասարդ է: «Նայում եմ ձեզ ու հիշում, որ ես էլ նույն տարիքին եմ եղել, նստել նույնպիսի գրասեղանների առջեւ: Հավատացեք` դա կյանքի ամենաուրախ շրջանն է»: Հյուրը ներողություն խնդրեց, որ ինքն ուսանողների սպասածից ավելի երիտասարդ է: Միաժամանակ նշեց, որ Սիրիայի Արաբական Հանրապետության նախագահն ամենաերիտասարդն է աշխարհում: 

Առաջին անգամ լինելով Հայաստանում` Շեյխ Հասսունը բավական լավ գիտեր մեր երկիրը. «Հայաստանը մեծ հարստություններ չունեցող երկիր է, բայց հզոր է ու հարուստ իր ժողովրդով,- ասաց նա: -Արեւելքում բնակվող 3-4 միլիոն հայերն ապացուցում են, որ իրենք կառուցող ժողովուրդ են:Ու հիմա Սիրիայում բնակվող հայերը արաբ ժողովրդի հետ կառուցում են իրենց ապագան»: 

Ըստ հյուրի` հայ եւ արաբ ժողովուրդների բարեկամությունը օրինակ է ողջ աշխարհի համար` ցույց տալու, որ տարբեր կրոնական ուղղությունների դավանող երկրների միջեւ կարող է դարավոր խաղաղություն լինել: «Եթե որեւէ ազգից որեւէ մեկը երբեւէ ասի, որ սպանում է հանուն կրոնի, երբեք չհավատաք այդ ստախոսին: Ես կարդացել եմ աշխարհի բոլոր կրոնական ուսմունքները. որեւէ տեղ բռնությունը, մարդասպանությունը չի քարոզվում»,- համոզված է մուֆթին: Ըստ նրա` Աստված սեր է, եւ եթե նա ստեղծել է որեւէ արարածի, ապա վերջինս հաստատ գոյություն ունենալու իրավունք ունի: «Պատերազմը, բռնության քարոզումը չկայացած դիվանագետների եւ կրոնական գործիչների տարերքն են: Ջեհադը սերն է, հոգատարությունը, կյանքը, լույսը եւ ոչ երբեք` մարդասպանությունը»,- ասում է նա: 

Առհասարակ, Սիրիայի մուֆթին ողջ աշխարհին հայտնի է իր խաղաղասիրական բնույթի բաց, համարձակ ելույթներով: Նա չի վարանում իր տեսակետը հայտնել նաեւ հայոց ցեղասպանության եւ ղարաբաղյան հակամարտության վերաբերյալ: Մասնավորապես, Հալեպում Թուրքիայի հյուպատոսի հետ զրույցի ընթացքում Շեյխ Հասսունն ասել է. «Դուք չեք արել ցեղասպանությունը, ձեր նախնիներն են արել: Ասեք` եղել է այդպիսի բան, ներողություն խնդրեք, եթե հարկ լինի` թեկուզ 500 մլն դոլար փոխհատուցում տվեք: Դրանից բոլորը կշահեն»: 

Շեյխ Ահմադ Հասսունը ծնվել է 1949թ.-ին Հալեպում: Եղել է քարոզիչ եւ հովվապետ մի շարք մզկիթներում, երկու անգամ ընտրվել է Սիրիայի խորհրդարանի անդամ: Մինչեւ 2005 թ.-ը եղել է Հալեպի նահանգի մուֆթին, որից հետո նախագահի հրամանագրով դարձել է Սիրիայի մուֆթի: Նա հիմնել է բարեսիրական միություններ, դպրոցներ, արհեստանոցներ, հիվանդանոցներ, ծերանոց: «Ամենամեծ աղոթքը կարիքավորին ձեռք մեկնելը, հիվանդին բուժելն է,-ասում է Շեյխ Հասսունը:- Իսկ մենք աղոթում ենք, որովհետեւ դեպի Աստված մեր մեծ սերն այդպես է ձեւակերպում ստանում»:

Այլ նորություններ
ԵՊՀ ԲՈՒՍԱԲԱՆՈՒԹՅԱՆ ԵՎ ՍՆԿԱԲԱՆՈՒԹՅԱՆ ԱՄԲԻՈՆԻ ԵՎ «ՓՈՔՐԻԿ ԻՇԽԱՆ» ԿՐԹԱՀԱՄԱԼԻՐԻ ՀԱՄԱԳՈՐԾԱԿՑՈՒԹՅՈՒՆԸ ՏԱԼԻՍ Է ԻՐ ԱՐԴՅՈՒՆՔՆԵՐԸ. ԱՇԱԿԵՐՏՆԵՐՆ ԱՐԺԱՆԱՑԵԼ ԵՆ ՀԱՏՈՒԿ ՄՐՑԱՆԱԿՆԵՐԻ
ԵՊՀ կենսաբանության ֆակուլտետի բուսաբանության և սնկաբանության ամբիոնի դասախոսների և «Փոքրիկ Իշխան» կրթահամալիրի ավագ դպրոցի սաների համատեղ նախաձեռնությամբ իրականացված գիտական հետազոտական աշխատանքների արդյունքները ներկայացվել են ՀՀ ԿԳՄՍ նախարարության կողմից կազմակերպված «Համադպրոցական գիտության փառատոնին», որտեղ սաներն արժանացել են հատուկ մրցանակի։
 «COVID-19: ՌԱԶՄԱՎԱՐՈՒԹՅՈՒՆՆԵՐ, ՄՈԴԵԼՆԵՐ, ՍԻՄՈՒԼՅԱՑԻԱՆԵՐ». ՄՐՑՈՒՅԹԻ ՀԱՅՏԱՐԱՐՈՒԹՅՈՒՆ
ԵՊՀ տնտեսագիտության և կառավարման ֆակուլտետի «Հետազոտությունների և գործարարության կենտրոն» հիմնադրամը ԿորոնաԹեստ ընկերության հովանավորությամբ հայտարարում է մրցույթ՝ նպատակ ունենալով փնտրել ուղիներ՝ համավարակը ճնշելու հետ մեկտեղ պահպանելու տնտեսական ակտիվությունը: