12.02.2009 | 
Ուսանողական, Գիտություն
ԻՐԱՎԱԳԵՏՆԵՐԻ ՀԱՂԹԱՆԱԿԸ
ԻՐԱՎԱԳԵՏՆԵՐԻ ՀԱՂԹԱՆԱԿԸ
ԵՊՀ իրավագիտության ֆակուլտետի թիմը կմեկնի Վաշինգտոն:

Միջազգային իրավունքի ասպարեզում աշխարհի ամենահեղինակավոր` Ֆիլիպ Ջեսափի անվան դատախաղ-մրցույթի հայաստանյան մրցափուլերում ԵՊՀ ուսանողների թիմը դարձել է չեմպիոն:

 

Փետրվարի 7-8-ը Երեւանում անցկացվող դատախաղ-մրցույթին այս տարի մասնակցում էին Հայաստանի 5 բուհեր` Երեւանի պետական համալսարանը, Եվրոպական տարածաշրջանային եւ ՀՀ պետական կառավարման ակադեմիաները, Գյումրու Մ. Նալբանդյանի անվան մանկավարժական եւ Վանաձորի պետական մանկավարժական ինստիտուտները: 1-ից 4-րդ մրցափուլերում թիմերից յուրաքանչյուրը պետք է հանդես գար նախապես իրենց տրված մտացածին «գործի» պաշտպանի կամ հայցվորի դերում:

 

Երկու մրցափուլում ԵՊՀ թիմը պաշտպանեց հայցվորի դիրքերը, երկուսում` պաշտպանի: Փետրվարի 8-ին կայացած կիսաեզրափակչում ԵՊՀ թիմի մրցակիցն էր Կառավարման ակադեմիայի թիմը, իսկ եզրափակչում` Եվրոպական տարածաշրջանային ակադեմիայինը: Եզրափակիչն անց էր կացվում Վճռաբեկ դատարանում:

 

Ժյուրիի կազմում էին դատախազության միջազգային իրավական համագործակցության վարչության պետ Նելլի Հարությունյանը, փաստաբան Նազելի Վարդանյանը եւ «ELSA-Հայաստան» ՀԿ հիմնադիր Իրինա Խառատյանը: ԵՊՀ թիմը շահեց մրցույթի բոլոր մրցանակները` «Լավագույն գրավոր աշխատանք», «Լավագույն բանախոս» (այս մրցանակը երկրորդ տարին անընդմեջ տրվում է ԵՊՀ թիմի ավագ Լեւոն Գեւորգյանին) եւ 1-ին մրցանակ:

 

Մայր բուհի թիմի կազմում 5 ուսանողներ են` Լեւոն Գեւորգյան, Արմենուհի Գառգալոյան, Տարոն Սիմոնյան, Օֆելյա Հարությունյան, Տաթեւիկ Մանուկյան, իսկ թիմի մարզիչը ի.գ. թ. Եղիշե Կիրակոսյանն է: «2009 թվականի հաղթանակը թիմի միակ բարձրագույն արդյունքը չէ. անցյալ տարի եւս ԵՊՀ թիմը դարձել էր Հայաստանի չեմպիոն եւ մեկնել Վաշինգտոն: Թեեւ միջազգային ասպարեզում մեր թիմի գրանցած արդյունքներն այդքան էլ բարձր չէին, այնուամենայնիվ, 150 լավագույն թիմերի հետ մրցելն արդեն իսկ լուրջ փորձ է, մանավանդ որ մի քանի մրցափուլերում մեր թիմը հաղթանակներ եւս ունեցել է»,- ասաց թիմի անդամ Տարոն Սիմոնյանը:

 

Ֆինանսական միջոցներ հայթայթելու դեպքում ԵՊՀ թիմը կմասնակցի մարտի 21-28-ը Վաշինգտոնում կայանալիք Ֆ. Ջեսափի անվան դատախաղ-մրցույթի միջազգային մրցափուլերին: Ի դեպ, անցյալ տարի մասնակցության նյութական ծախսերը հոգացել էին ԵՊՀ-ն, «X գրուպ» ընկերությունը, Ամերիկայում հայ իրավաբանների ընկերակցությունը:

Այլ նորություններ
ԵՊՀ ԿԵՆՍԱՔԻՄԻԿՈՍՆԵՐՆ ՈՒՍՈՒՄՆԱՍԻՐՈՒՄ ԵՆ ՕՐԳԱՆԱԿԱՆ ԹԱՓՈՆՆԵՐԻ ՄՇԱԿՈՒՄԸ ԵՎ ԴՐԱՆՑԻՑ ԲԱՐՁՐԱՐԺԵՔ ԱՐՏԱԴՐԱՆՔԻ ՍՏԱՑՈՒՄԸ
ՀՀ ԿԳՄՍՆ գիտության կոմիտեի կողմից ֆինանսավորման է երաշխավորվել «Օրգանական թափոններից կենսազանգվածի և կենսաէներգիայի փոխակերպման կենսաքիﬕական ուղիների բնութագրումը և օքսիդավերականգնողական կարգավորումը» գիտական թեման: Այն ներկայացրել է ԵՊՀ կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնը։
«ՀԱՅԱՍՏԱՆՆ ԻՐ ՈՒՐՈՒՅՆ ՏԵՂՆ ՈՒՆԻ ԽԱՂՈՂԻ ՀԱՄԱՇԽԱՐՀԱՅԻՆ ՔԱՐՏԵԶԻ ՎՐԱ». ԿԵՆՍԱԲԱՆՈՒԹՅԱՆ ԳԻՏԱՀԵՏԱԶՈՏԱԿԱՆ ԻՆՍՏԻՏՈՒՏԻ ԱՎԱԳ ԳԻՏԱՇԽԱՏՈՂ ՔՐԻՍՏԻՆԵ ՄԱՐԳԱՐՅԱՆ
Հայաստանում խաղողի գենետիկական ռեսուրսների ուսումնասիրության մեկնարկը տրվել է դեռևս 2011 թ. ԵՊՀ գենետիկայի և բջջաբանության ամբիոնի վարիչ, ՀՀ ԳԱԱ թղթակից անդամ Ռուբեն Հարությունյանի նախաձեռնությամբ: