17.01.2007 | 
Կրթություն
ՔՆՆԱՇՐՋԱՆԸ ՇԱՐՈՒՆԱԿՎՈՒՄ Է
ՔՆՆԱՇՐՋԱՆԸ ՇԱՐՈՒՆԱԿՎՈՒՄ Է
«Սկզբում շատ էի վախեցած, իսկ հիմա, երբ արդեն ստացել եմ առաջին հինգս, շատ ավելի հանգիստ եմ: Հաջորդ քննությանն ավելի հանգիստ կգնամ», ասում է ԵՊՀ ժուռնալիստիկայի ֆակուլտետի առաջին կուրսի ուսանողուհի Անի Մաթեւոսյանը:

Երեւանի պետական համալսարանի ուսումնական առաջին կիսամյակի հանրագումարային քննությունները մեկնարկել են հունվարի 3-ին եւ կշարունակվեն մինչեւ հունվարի 23-ը:

«Անձամբ ես քննաշրջանից գոհ եմ, դասախոսները շատ լավ են տրամադրված, բայց չեմ կարող չնշել, որ գրեթե բոլոր դասախոսներն էլ ուսանողներին գնահատելիս շատ հաճախ առաջնորդվում են ստուգման գրքույկում եղած գնահատականներով: Եթե գրքույկումդ երեք ունես, ապա հինգ ստանալը գերմարդկային ճիգեր կպահանջի»,- ասում է ռուս բանասիրության ֆակուլտետի 3-րդ կուրսի ուսանողուհի Օքսանա Սարգսյանը:

Ռուս բանասիրության ֆակուլտետի դեկանի տեղակալ Նաիրա Մարտիրոսյանը հավաստիացնում է, որ ուսանողները հիմնականում ստանում են այն թվանշանները, ինչին արժանի են: «Իհարկե, ստուգման գրքույկի թվանշանները իրենց զգալի ազդեցությունն ունեն, եւ դա շատ բնական է: Փայլուն պատասխանի դեպքում ես հինգ եմ նշանակում նաեւ երեք ստացող ուսանողին, բայց նման դեպքեր խիստ հազվադեպ են պատահում»:

Առավելագույնը մի քննություն եւ երկու ստուգարք չհանձնած ուսանողները հնարավորություն ունեն պարտքերը հանձնել քննաշրջանի վերջին օրվան հաջորդող երկու օրերին: Հունվարի 24-ը եւ 25-ը համալսարանում բաց դռների օրեր են:

ԵՊՀ ուսումնամեթոդական վարչության պետ Հրանտ Ժամհարյանը տեղեկացրեց, որ քննաշրջանի հետ կապված լուրջ եւ հիմնավորված բողոքներ դեռեւս չեն եղել, եւ բողոքների հիմնական պատճառը գնահատման կանոնակարգին անտեղյակ լինելն է:

«Ինձ են դիմել ուսանողներ սոցիոլոգիայի ֆակուլտետից: Նրանք բողոքում էին, որ դասախոսը իրենց ցածր թվանշան է դնում` պատճառաբանելով դասերին վատ հաճախելը: Ուսանողը պետք է հասկանա, որ «գերազանց» ստանում են ոչ միայն քննատոմսի հարցերին պատասխանելու, այլ նաեւ դասերին պարտաճանաչ հաճախելու եւ ակտիվ մասնակցելու համար»:

Հրանտ Ժամհարյանը նշեց, որ հաճախելիության հարցն այսօր ավելի քան կարեւորվում է համալսարանում, քանի որ շուտով ԵՊՀ-ն կանցնի նոր ուսումնական համակարգի, որտեղ ուսանողի` դասերին հաճախելու ցուցանիշը նրա գնահատականի հիմնական բաղադրիչներից մեկն է լինելու:

Առաջին լուծարքային շրջանը ԵՊՀ-ում կավարտվի փետրվարի 6-ին, իսկ փետրվարի 7-ին կմեկնարկի ուսումնական երկրորդ կիսամյակը:

Այլ նորություններ
ԱՐՏԱԿԱՐԳ ԴՐՈՒԹՅԱՆ ԱՐՏԱԿԱՐԳ ԴԻՄՈՐԴՆԵՐԸ. ԵՊՀ-ՈՒՄ ԱՎԱՐՏՎԵԼ Է ԲԱԿԱԼԱՎՐԻԱՏԻ 2020-2021 ՈՒՍՈՒՄՆԱԿԱՆ ՏԱՐՎԱ ԴԻՄՈՐԴՆԵՐԻ ԴԻՄՈՒՄ-ՀԱՅՏԵՐԻ ԱՌՑԱՆՑ ԸՆԴՈՒՆՄԱՆ ԱՌԱՋԻՆ ՓՈՒԼԸ
ԵՊՀ-ում հունիսի 15-ին ավարտվել է 2020-2021 ուսումնական տարվա դիմորդների դիմում-հայտերի առցանց ընդունման առաջին փուլը, որին հայտագրվել է 4060 դիմորդ:
ԵՊՀ-ՈՒՄ ՄԱԳԻՍՏՐԱՏՈՒՐԱՅԻ ԸՆԴՈՒՆԵԼՈՒԹՅԱՆ ԴԻՄՈՒՄ-ՀԱՅՏԵՐՆ ԸՆԴՈՒՆՎՈՒՄ ԵՆ ԱՌՑԱՆՑ
ԵՊՀ գիտխորհրդի որոշմամբ մագիստրատուրայի ընդունելության հայտերն անհրաժեշտ է լրացնել առցանց: