08.11.2011 | 
Հասարակություն
ՄՇԱԿՈՒԹԱՅԻՆ ՀԱՄԱԳՈՐԾԱԿՑՈՒԹՅԱՆ ՆՈՐ ՓՈՒԼ
ՄՇԱԿՈՒԹԱՅԻՆ ՀԱՄԱԳՈՐԾԱԿՑՈՒԹՅԱՆ ՆՈՐ ՓՈՒԼ
Եգիպտոսի պատվիրակությունը Հայաստանում Եգիպտոսի մշակույթի օրերի շրջանակներում այցելեց նաեւ Մայր բուհ:

Այսօր ԵՊՀ ռեկտոր Արամ Սիմոնյանը հյուրընկալեց եգիպտական պատվիրակությանը, որը գլխավորում էր Եգիպտոսի Արաբական Հանրապետության մշակույթի նախարարի խորհրդական, մշակույթի արտաքին հարաբերությունների 1-ին պետքարտուղար Հոսսամ Նասսարը: Ռեկտորը նախ ողջունեց հյուրերին, այնուհետեւ բարձր գնահատեց երկու հնագույն պետությունների բազմաճյուղ հարաբերությունները. «Ուրախ եմ, որ այցելել եք Երեւանի պետական համալսարան` ծանոթանալու մեր ուսանողական ու մշակութային կյանքին:

 

Ընդհանրապես Եգիպտոսը միշտ էլ հայերի լավ բարեկամն է եղել, որը եղբայրության ձեռք է մեկնել մեզ, մասնավորապես Ցեղասպանության ժամանակ հազարավոր հայեր ապաստան են գտել հենց Եգիպտոսում»: Այնուհետեւ ԵՊՀ եգիպտագիտության հայկական կենտրոնի տնօրեն դոկտոր Քրիստիան Թութունջյան դը Վարդավանը նույնպես ողջունեց հյուրերին ու ներկայացրեց կենտրոնի գործունեության պատմությունը եւ ընթացիկ ծրագրերը: Մշակույթի նախարարի խորհրդական Հոսսամ Նասսարը, կարեւորելով հայ-եգիպտական մշակութային բնագավառների միջեւ սերտ համագործակցությունը, խոսեց Հայաստանում եգիպտագիտության զարգացման նոր հեռանկարների, Եգիպտոսում հայկական մշակույթի տարածման, ինչպես նաեւ նոր սերնդի դաստիարակության գործում մշակույթի դերի մասին:

 

ԵՊՀ միջազգային համագործակցության վարչության պետ Ալեքսանդր Մարգարովը Եգիպտոսի պատվիրակությանը հակիրճ ներկայացրեց ԵՊՀ պատմությունը, ուսումնական, գիտական եւ միջազգային համագործակցության վերաբերյալ որոշ տվյալներ, իսկ ԵՊՀ մշակույթի կենտրոնի տնօրեն Կարինե Դավթյանը պատմեց կենտրոնի հիմնադրման ու գործունեության, ինչպես նաեւ իրականացվող ծրագրերի, համագործակցության եւ ընդհանրապես համալսարանական կյանքում մշակութային դաստիարակության մասին:

 

Կողմերը նախնական համաձայնության եկան ԵՊՀ մշակույթի կենտրոնի եւ Հայաստանում Եգիպտոսի Արաբական Հանրապետության դեսպանատան անմիջական աջակցությամբ արաբերեն ֆիլմերի ցուցադրությունների ու քննարկումների միջոցով ուսանողներին հնարավորություն ընձեռել ավելի մոտիկից ծանոթանալու եգիպտական մշակույթին: Արամ Սիմոնյանն էլ իր հերթին նշեց, որ մոտ ապագայում ԵՊՀ-ում կհիմնվի իսլամական կենտրոն, որը նույնպես կնպաստի երկու պետությունների միջեւ հարաբերությունների ամրապնդմանը: Հանդիպման վերջում ռեկտորը հյուրերին փոխանցեց Մայր բուհի եւ հայկական ճարտարապետության մասին պատմող բուկլետներ, հուշանվերներ:

 

Հոսսամ Նասսարն էլ իր հերթին Արամ Սիմոնյանին նվիրեց իր հեղինակած ստեղծագործությունների գիրքը: Հանդիպմանը ներկա էին նաեւ ԵՊՀ ուսումնական աշխատանքների գծով պրոռեկտոր Ալեքսանդր Գրիգորյանը, Արեւելագիտության եւ Պատմության ֆակուլտետների դեկաններ Գուրգեն Մելիքյանն ու Էդիկ Մինասյանը, ինչպես նաեւ ԵՊՀ եգիպտագիտության հայկական կենտրոնի տնօրեն Քրիստիան Թութունջյան դը Վարդավանը:

Այլ նորություններ
«ՀԱՅՈՑ ՑԵՂԱՍՊԱՆՈՒԹՅԱՆ ԱՆԴՐԱԴԱՐՁՆ ԱՄԵՐԻԿՅԱՆ ՄԱՄՈՒԼՈՒՄ»․ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ-ն այսօր հյուրընկալել էր «The Armenian Genocide: Prelude and Aftermath. As reported in the U.S. Press - The New York Times» գրքի հեղինակներին՝ Վենետիկի Մխիթարյան միաբանության միաբան, գերաշնորհ հայր Վահան ծայրագույն վարդապետ Օհանյանին և ավստրալահայ գործիչ Արա Քաթիբյանին, որոնք նախ հանդիպեցին ԵՊՀ ռեկտոր Արամ Սիմոնյանի հետ, այնուհետև Պալեանների անվան դահլիճում հանդես եկան գրքի կազմման և հրատարակման մասին ելույթով։
ՏՆՏԵՍԱՊԵՍ ԶԱՐԳԱՆԱԼՈՒ ՀԱՄԱՐ ՀԱՄԱՐՁԱԿՈՒԹՅՈՒՆ Է ՊԵՏՔ. ԱՀ ՆԱԽԿԻՆ ՎԱՐՉԱՊԵՏԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԵՊՀ տնտեսագիտության և կառավարման ֆակուլտետում այսօր տեղի ունեցավ «Հայաստանի տնտեսական զարգացման հեռանկարները» թեմայով դասախոսություն, որի բանախոսն էր Արցախի Հանրապետության նախկին վարչապետ Արայիկ Հարությունյանը: