19.02.2020 | 
Կրթություն
ԿՐԹԱԿԱՆ ՆՈՐ ԾՐԱԳԻՐ, ՈՐԸ ՆՊԱՍՏԵԼՈՒ Է ԼՐԱԳՐՈՂՆԵՐԻ ԻՐԱՎԱԿԱՆ ԳՐԱԳԻՏՈՒԹՅԱՆ ԲԱՐՁՐԱՑՄԱՆԸ
ԿՐԹԱԿԱՆ ՆՈՐ ԾՐԱԳԻՐ, ՈՐԸ ՆՊԱՍՏԵԼՈՒ Է ԼՐԱԳՐՈՂՆԵՐԻ ԻՐԱՎԱԿԱՆ ԳՐԱԳԻՏՈՒԹՅԱՆ ԲԱՐՁՐԱՑՄԱՆԸ
ԵՊՀ իրավագիտության ֆակուլտետի նախաձեռնությամբ և «Կոնրադ Ադենաուեր» գերմանական քաղաքական հիմնադրամի աջակցությամբ մեկնարկել է «Մեդիա իրավունք» կրթական ծրագիրը, որի նպատակն է նպաստել լրագրողների իրավական գրագիտության բարձրացմանը, այդ թվում՝ լրագրողների, իրավաբանների համար «Մեդիա իրավունք» մագիստրոսական կրթական ծրագրի միջոցով:

Մեզ հետ զրույցում ԵՊՀ քրեական իրավունքի ամբիոնի դոցենտ Աննա Մարգարյանն ասաց, որ «Մեդիա իրավունք» կրթական ծրագրի նպատակն է Իրավագիտության և Ժուռնալիստիկայի ֆակուլտետների համատեղ ջանքերով հատկապես գործող և ապագա լրագրողներին փոխանցել գիտելիք մեդիադաշատի իրավական կարգավորումների վերաբերյալ, որպեսզի նրանք հստակ իմանան իրենց իրավունքների և պարտականությունների շրջանակը:

 

«Ուսումնասիրելով իրենց իրավունքները՝ լրագրողներն ավելի պաշտպանված կլինեն և ըստ այդմ՝ ավելի ազատ և անաչառ: Բացի դրանից՝ լրագրողները կհասկանան իրենց առաքելությունը, որը միայն տեղեկատվություն փոխանցելը չէ: Նրանք իրենց գործունեությամբ պետք է նպաստեն նաև հասարակության իրավագիտակցության բարձրացմանը»,- ասաց Աննա Մարգարյանը:

 

Նրա փոխանցմամբ, ծրագրի շրջանակում նախատեսվում է ներդնել «Մեդիա իրավունք» մագիստրոսական ծրագիրը, բայց մինչև այդ իրականացնել հավաստագրեր տրամադրող ծրագրեր գործող լրագրողների համար. «Այս պահին նախատեսված է նյութերի մշակում, որից հետո ձեռնամուխ կլինենք կրթական ծրագրի մեկնարկին»:

 

Աննա Մարգարյանի կարծիքով, մագիստրոսական կրթական ծրագիրն ամենայն հավանականությամբ գործելու է 2021 թվականից: Դրան կարող են դիմել ինչպես իրավաբանները, այնպես էլ լրագրողները: ԵՊՀ քրեական իրավունքի ամբիոնի դոցենտի փոխանցմամբ, մագիստրոսական ծրագիրն ավարտելուց հետո ցանկալի կլինի, որ ուսանողները ստանան մեդիա իրավունքի փորձագետի որակավորում:

 

 

«Կոնրադ Ադենաուեր» հիմնադրամի երևանյան գրասենյակի ղեկավար Լիանա Մարուքյանը մեզ հետ զրույցում պատմեց, որ հիմնադրամն աջակցում է և իրականացնում քաղաքացիական կրթությանն ուղղված միջոցառումներ. «Հիմնադրամի հանձնարարականը ժողովրդավարության զարգացումն է այն երկրներում, որտեղ ներկայացված է»:

 

Նրա տեղեկացմամբ, մեդիադաշտը միշտ հիմնադրամի ուշադրության կենտրոնում է գտնվել. «Անաչառ և անկախ մեդիադաշտի առկայությունը նույնպես երկրում ժողովրդավարության զարգացման գրավական է, և դրան հասնելու համար մենք Հայաստանում տարաբնույթ միջոցառումներ ենք կազմակերպել՝ փոխանցելով գործնական գիտելիքներ, ընդ որում՝ ոչ միայն տեղացի, այլև արտասահմանյան մասնագետների օգնությամբ»:

 

«Տարիների ընթացքում հասկացանք, որ միայն գործնական գիտելիքներ փոխանցելով դաշտում առկա խնդիրները չեն լուծվում: Եվ այս ժամանակահատվածում ԵՊՀ իրավագիտության ֆակուլտետը հանդես եկավ «Մեդիա իրավունք» կրթական ծրագիր հիմնելու և կայացնելու նախաձեռնությամբ, որոնց իրագործմանը մեր հիմնադրամը պատրաստ է աջակցել՝ փոխանցելով նաև գործնականում ունեցած փորձառությունը»,- փաստեց Լիանա Մարուքյանը:

 

Նրա հավաստմամբ, կրթական ծրագիրը հնարավորություն է ընձեռելու ոչ միայն գործնական, այլև տեսական և հիմնարար գիտելիքներ փոխանցելու ուսանողներին, որոնք հետագայում կարող են լավագույնս դրսևորվել մեդիադաշտում:

 

«Մեդիա իրավունք» կրթական ծրագրի մեկնարկային միջոցառումը տեղի է ունեցել երեկ, որին մասնակցել են ինչպես գործող իրավաբաններ, այնպես էլ լրագրողներ, ուսանողներ, ԵՊՀ իրավագիտության և ժուռնալիստիկայի ֆակուլտետների պրոֆեսորադասախոսական կազմի և հասարակական կազմակերպությունների ներկայացուցիչներ:

 

Միջոցառման ընթացքում վեր են հանվել մեդիա ոլորտի կանոնակարգման մարտահրավերները և առկա վիճակը, մեդիայի անկախության, արհեստավարժության և անաչառության հիմնախնդիրները, քննարկվել հեղինակային իրավունքի պաշտպանության, մեդիա դաշտի իրավական կարգավորման, տվյալների պաշտպանության, սոցիալական և համացանցային մեդիայի իրավական կարգավորման հիմնախնդիրներ:

 

ԵՊՀ իրավագիտության ֆակուլտետի դեկան Գագիկ Ղազինյանի փոխանցմամբ, կրթական ծրագրի շնորհիվ կունենանք ոլորտին քաջատեղյակ լրագրողներ, ըստ այդմ՝ շատ ավելի լավ և գրագետ պատրաստված նյութեր, որոնք կմատուցվեն հասարակությանը։

 

Քնար Միսակյան

Այլ նորություններ
ՎԻՐՏՈՒԱԼ ՇՐՋԱՅՑ ՀԱՅԱՍՏԱՆԻ ՊԱՏՄՈՒԹՅԱՆ ԹԱՆԳԱՐԱՆՈՒՄ
ԵՊՀ պատմության ֆակուլտետի ուսանողական գիտական ընկերության և Հայաստանի պատմության թանգարանի համատեղ նախաձեռնությամբ օգոստոսի 3-ին տեղի ունեցավ վիրտուալ շրջայց Հայաստանի պատմության թանգարանում։ Էքսկուրսիան անցկացրեց թանգարանի էքսկուրսիոն բաժնի վարիչ Լիլիթ Հովհաննիսյանը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԿԱՐԾԻՔԸ՝ ՀԱՆՐԱԿՐԹՈՒԹՅԱՆ ՊԵՏԱԿԱՆ ԱՌԱՐԿԱՅԱԿԱՆ ՉԱՓՈՐՈՇԻՉՆԵՐԻ ԵՎ ԾՐԱԳՐԵՐԻ ՄԱՍԻՆ
Այս օրերին տեղի են ունենում քննարկումներ «Հայոց լեզու 7-12-րդ դասարաններ» և «Գրականություն 7-12-րդ դասարաններ» հանրակրթության պետական առարկայական չափորոշիչների և ծրագրերի շուրջ: Արտահայտվեցին բազմաթիվ հայագետներ, այդ թվում՝ ԵՊՀ հայ բանասիրության ֆակուլտետի դասախոսներ: Հարցը քննարկվել է նաև ֆակուլտետի գիտխորհրդի նիստում: