15.01.2020 | 
Հասարակություն
ԵՊՀ ՄԻԱԿ ԿԻՆ ԱԿԱԴԵՄԻԿՈՍԸ 90 ՏԱՐԵԿԱՆ Է
ԵՊՀ ՄԻԱԿ ԿԻՆ ԱԿԱԴԵՄԻԿՈՍԸ 90 ՏԱՐԵԿԱՆ Է
Այսօր լրանում է Հայաստանի գիտության վաստակավոր գործիչ, ՀՀ ԳԱԱ ակադեմիկոս, կենս. գիտ. դոկտոր, պրոֆեսոր, ԵՊՀ կենսաբանության ֆակուլտետի բուսաբանության ամբիոնի պատվավոր վարիչ Լիա Օսիպյանի ծննդյան 90-ամյակը:

Լիա Օսիպյանի աշխատանքային ողջ գործունեությունը կապված է Երևանի պետական համալսարանի հետ, որտեղ նա անցել է երկարամյա ճանապարհ՝ լաբորանտից մինչև ամբիոնի վարիչ և ֆակուլտետի դեկան:

 

Լինելով հայկական սնկաբանական դպրոցի հիմնադիրը՝ Լիա Օսիպյանն այսօր էլ շարունակում է հանրապետությունում սնկերի կենսաբազմազանության ուսումնասիրությունները, ընդլայնում ուսումնասիրվող խմբերի շրջանակը, Հայաստանում փորձարարական սնկաբանության ուղղության հիմնադիրն է:

 

Գիտնականը Հայաստանում առաջինն է ուսումնասիրել ջրային սնկերը, բարձրլեռնային շրջանների ջրամբարների և ջրատարների սնկերը:

 

Լ. Օսիպյանի ավելի քան 30 տարվա գիտական գործունեությունը նվիրված է եղել սննդամթերքների և դեղային պատրաստուկների սնկաբանական անվտանգության հարցերին:

 

Նա Հայաստանում առաջինն էր, որ սկիզբ դրեց մարդու և բնության համար գենետիկորեն մոդիֆիկացված օրգանիզմների և մթերքների հնարավոր վտանգների մասին քննարկումներին:

 

Ակադեմիկոս Լիա Օսիպյանն առաջավոր գիտնական է, գիտության կազմակերպիչ, հասարակական գործիչ, շնորհալի մանկավարժ: Նրա գործունեությունն ի մի է բերվել մոտ 400 տպագրված գիտական աշխատանքներում, այդ թվում՝ 5 մենագրություններում:

 

Գիտնականը եղել է բազմաթիվ գիտական համաժողովների նախաձեռնող և կազմակերպիչ, գիտական զեկուցումներ է ներկայացրել աշխարհի մի շարք երկրների տարբեր գիտաժողովներում, ծավալել է ակտիվ հասարակական գործունեություն, բազմաթիվ մասնագիտական և հասարակական կազմակերպությունների անդամ է, մի շարք հրատարակչությունների խմբագիր և ամսագրերի խմբագրական կոլեգիայի անդամ:

 

Նա «Հայաստանի սնկերը» բազմահատորյակի երեք հատորների հեղինակն է և չորսի խմբագիրը:

 

Ներկայումս Լիա Օսիպյանը հասարակական գործունեություն է ծավալում սպառողների իրավունքների և սննդամթերքների անվտանգության պաշտպանության, Հայաստանի անտառների և կանաչ տնկարկների պահպանման ու վերականգնման վերաբերյալ:

 

ysu.am-ը շնորհավորում է բազմավաստակ գիտնականի տարեդարձը՝ մաղթելով քաջառողջություն և բեղուն գործունեություն:

 

Պատրաստեց Հասմիկ Ասլանյանը

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
ԿԵՆՍԱԲԱՆՈՒԹՅԱՆ ՄԻՋԱԶԳԱՅԻՆ ՕԼԻՄՊԻԱԴԱՅԻ ՄԱՍՆԱԿԻՑՆԵՐԸ ՇԱՐՈՒՆԱԿՈՒՄ ԵՆ ԲԱՑԱՀԱՅՏԵԼ ՀԱՅԱՍՏԱՆԸ
Այսօր հայոց պատմամշակութային ժառանգությանը ծանոթանալու նպատակով «Կենսաբանության 33-րդ միջազգային օլիմպիադայի» (ԿՄՕ) մասնակիցները շրջայց են կատարել «Էրեբունի» պատմահնագիտական արգելոց–թանգարանում, այնուհետև ճանաչողական էքսկուրսիա իրականացրել Մեսրոպ Մաշտոցի անվան Մատենադարանում: