10.05.2018 | 
Կրթություն
«ՄԵՐ ԱՇԱԿԵՐՏՆԵՐԻ ՀԱՄԱՐ PISA-Ի ԱՌԱՋԱԴՐԱՆՔՆԵՐԸ ՇԱՏ ԱՆՍՈՎՈՐ ԵՆ ԼԻՆԵԼՈՒ». ԿՐԹՈՒԹՅԱՆ ՓՈՐՁԱԳԵՏ ՍԵՐՈԲ ԽԱՉԱՏՐՅԱՆ
«ՄԵՐ ԱՇԱԿԵՐՏՆԵՐԻ ՀԱՄԱՐ PISA-Ի ԱՌԱՋԱԴՐԱՆՔՆԵՐԸ ՇԱՏ ԱՆՍՈՎՈՐ ԵՆ ԼԻՆԵԼՈՒ». ԿՐԹՈՒԹՅԱՆ ՓՈՐՁԱԳԵՏ ՍԵՐՈԲ ԽԱՉԱՏՐՅԱՆ
«PISA-ն շատ կարևոր ստուգատես է և շատ կազմակերպությունների կողմից համարվում է կրթության որակի գնահատման չափանիշ»,-այսօր մեզ հետ զրույցում, անդրադառնալով Աշակերտների միջազգային գնահատման (PISA) ստուգատեսին, նման կարծիքն հայտնեց ԵՊՀ փիլիսոփայության և հոգեբանության ֆակուլտետի փիլիսոփայության պատմության ամբիոնի դասախոս, կրթության փորձագետ Սերոբ Խաչատրյանը:

Նշենք, որ ՀՀ կրթության և գիտության նախարարությունը հանդես է եկել կրթական համակարգի միջազգայնացման նոր նախաձեռնությամբ. Հայաստանն առաջիկայում կարող է անդամակցել Աշակերտների միջազգային գնահատման ծրագրին (PISA), որը Տնտեսական համագործակցության և զարգացման կազմակերպության կողմից ստեղծված միջազգային գնահատման և վերլուծական գործիք է: Այն հնարավորություն է տալիս  համեմատելու և համադրելու ազգային կրթության համակարգն այլ երկրների կրթության համակարգերի հետ: Աշակերտների միջազգային գնահատման ծրագիրը (PISA)  օգնում է վերհանել ազգային կրթության համակարգի խնդիրներն ու բացթողումները, որը կարող է արդյունավետ հիմք հանդիսանալ կրթության քաղաքականության մշակման համար:

 

Կրթության փորձագետ Սերոբ Խաչատրյանի խոսքով, PISA ստուգատեսն անցկացվում է 15 տարեկան աշակերտների շրջանում գիտելիքների և հմտությունների ստուգմամբ՝ թեստային առաջադրանքների տարբերակով: PISA-ի առաջադրանքները 4 ուղղությամբ են կազմվում՝ ընթերցանություն, մաթեմատիկա, բնագիտություն և համակարգչային իմացություն: 

 

Նրա խոսքով, բացի վերոնշյալ բնագավառներից, ստուգատեսում երբեմն ընդգրկվում են նաև այլ ոլորտներ: «Օրինակ՝ 2015 թվականին ստուգատես է անցկացվել նաև ֆինանսական գրագիտությունից։  Փորձել են պարզել, թե ինչպես են աշակերտները համագործակցում տարբեր ուսումնական խնդիրներ լուծելու հարցում։ 2018 թվականին նոր բնագավառ է լինելու ստուգատեսում՝ գլոբալ կոմպետենցիան։ Հայաստանի նման երկրի համար դժվար կլինի այս ստուգատեսում բարձր արդյունքներ ապահովելը, քանի որ մեր կրթական համակարգում ավելի կարևորվում են գիտելիքի մեխանիկական վերարտադրությունը, պարզունակ թեստերը։ Իսկ PISA-ի դեպքում ավելի բարդ և ժամանակակից աշխատաշուկայում և հասարակությունում պահանջվող հմտություններ են ստուգվում: Այսինքն՝ մեր աշակերտների համար PISA-ի առաջադրանքները շատ անսովոր են լինելու: Բայց մյուս կողմից՝ Հայաստանի համար գործող ծրագրերը PISA-ին համապատասխանեցնելու հնարավորություն կլինի»,-ընդգծեց բանախոսը:

 

Ս. Խաչատրյանը թեև դրական գնահատական է տալիս և կարևոր քայլ է համարում Աշակերտների միջազգային գնահատման (PISA) ծրագրին անդամակցելը, սակայն կարծում է, որ որոշակի ժամանակ է պետք, որպեսզի Հայաստանն առաջընթաց ունենա այս ոլորտում։

 

ԵՊՀ մանկավարժության և կրթության զարգացման կենտրոնի դոցենտ Արևիկ Ղազարյանի խոսքով, Աշակերտների միջազգային գնահատման (PISA) ծրագիրը միջազգային գնահատման և վերլուծական գործիք է:

 

 

«Այս ծրագիրը հնարավորություն կտա համեմատելու ազգային կրթության համակարգն այլ երկրների կրթության համակարգերի հետ, ինչպես նաև այն համապատասխանեցնելու միջազգային չափանիշներին: Ծրագրին անդամակցելը ևս մեկ փորձ է միջազգային ասպարեզում դրսևորվելու և ինտեգրվելու համար, քանի որ բարեփոխումների համատեքստում կազմակերպվում են մի շարք գործընթացներ, որոնց նպատակը միջազգային կրթական տարածքում արժանապատիվ ներկայանալն է»,- հավելեց նա:

 

Ա. Ղազարյանը նշեց, որ Աշակերտների միջազգային գնահատման ծրագիրը (PISA) կօգնի վերհանել ազգային կրթության համակարգի խնդիրները և աստիճանաբար շտկել դրանք: «Այն աշակերտներին հնարավորություն կտա համեմատելու սեփական գիտելիքներն այլ երկրների աշակերտների գիտելիքների հետ, ինչպես նաև ի հատ բերելու սեփական ձեռքբերումները և բացթողումները»,- ընդգծեց նա:

 

Ըստ բանախոսի՝ համակարգչային իմացության ստուգատեսը և՛ նպատակային է, և՛ շատ ճիշտ, քանի որ համակարգչի միջոցով է աշակերտը մասնակցելու այդ ստուգատեսին:

 

Տարածաշրջանային երկրներից համակարգին անդամակցում են Ռուսաստանը, Վրաստանը, Թուրքիան, Մոլդովան: Ա. Ղազարյանի խոսքով, որպեսզի Հայաստանն էլ հետ չմնա հարևան երկրներից, նպատակահարմար է, որ մեր երկիրն էլ մասնակցի Աշակերտների միջազգային գնահատման (PISA) ստուգատեսին:

 

Նշենք, որ PISA համակարգով իրենց գիտելիքներն են ստուգել աշխարհի շուրջ 80 երկրներից ավելի քան 549 հազար սովորողներ, այդ թվում՝ 44-ը  միջին եկամուտներ ունեցող: Մինչև հունիս PISA-ի ղեկավարությունը պետք է որոշում կայացնի Հայաստանի անդամակցության վերաբերյալ:

 

Համակարգին անդամակցում են կրթության ոլորտում առաջատար համարվող մի շարք  երկրներ, մասնավորապես՝ Սինգապուրը, Ճապոնիան, Կանադան, ԱՄՆ-ը, Չինաստանը, Ֆինլանդիան, Նիդերլանդները, Կենտրոնական Եվրոպայի և Ասիայի  երկրները: Տարածաշրջանային երկրներից համակարգին անդամակցում են Ռուսաստանը, Վրաստանը, Թուրքիան, Մոլդովան և այլն:

 

Նադեժդա Տեր-Աբրահամյան

Այլ նորություններ
ՏԵՍԱԿԱՆ ԳԻՏԵԼԻՔՆԵՐԸ ՎԵՐԱԾՎՈՒՄ ԵՆ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ․ «ՏՕՊԱՍ» ԾՐԱԳՐԻ ՀԵՐԹԱԿԱՆ ԽՈՐՀՐԴԱԿՑՈՒԹՅՈՒՆԸ ԵՊՀ-ՈՒՄ
Երևանի պետական համալսարանի տնտեսագիտության և կառավարման ֆակուլտետում այսօր տեղի է ունեցել «ՏՕՊԱՍ»-ի (TOPAS- From Theoretical-Oriented to Practical education in Agrarian Studies) «Տեսական ուղղվածությունից գործնական կրթությանը նվիրված Ագրարային կրթության» ծրագրի հերթական խորհրդակցությունը։
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։