19.09.2017 | 
Քաղաքականություն
ԵՊՀ-Ն ՈՒ ՆՈՐՎԵԳԱԿԱՆ ՏՐՈՄՍՈ ՀԱՄԱԼՍԱՐԱՆԸ ՀԱՄԱՁԱՅՆԱԳԻՐ ԵՆ ՍՏՈՐԱԳՐԵԼ
ԵՊՀ-Ն ՈՒ ՆՈՐՎԵԳԱԿԱՆ ՏՐՈՄՍՈ ՀԱՄԱԼՍԱՐԱՆԸ ՀԱՄԱՁԱՅՆԱԳԻՐ ԵՆ ՍՏՈՐԱԳՐԵԼ
Այսօր ԵՊՀ ռեկտոր Արամ Սիմոնյանն ընդունեց Նորվեգիայի արկտիկական համալսարանից (Տրոմսո) ժամանած պատվիրակությանը:

Հանդիպմանը ներկա էին ՀՀ-ում և ՌԴ-ում Նորվեգիայի Թագավորության արտակարգ և լիազոր դեսպան Լեյդուլվ Ատլե Նամտվեդտը, ԵՊՀ գիտական քաղաքականության և միջազգային համագործակցության գծով պրոռեկտոր Գեղամ Գևորգյանը, ԵՊՀ միջազգային համագործակցության վարչության պետ Ալեքսանդր Մարգարովը, ԵՊՀ կենսաբանության ֆակուլտետի դեկան Էմիլ Գևորգյանը, ինչպես նաև Տեղեկատվական տեխնոլոգիաների կրթական և հետազոտական կենտրոնի գիտական ղեկավար Սամվել Շուքուրյանը:

 

Արամ Սիմոնյանը ողջունեց հյուրերին և ներկայացրեց ԵՊՀ-ի ստեղծմանը, ներկայիս ուսումնագիտական վիճակին, ինչպես նաև զարգացման տեսլականներին վերաբերող որոշ տեղեկատվություն:

 

«Մայր բուհը փոխգործակցության համար բաց է բոլոր կրթօջախների համար: Ցավոք, նորվեգական բուհերի ու գիտական կենտրոնների հետ կապերն այդքան էլ ակտիվ չեն, սակայն մենք պատրաստ ենք համագործակցության բոլոր հնարավոր ոլորտներն ուսումնասիրելու և դրանք զարգացնելու ուղղությամբ աշխատանք իրականացնել»,- նշեց ռեկտորը:

 

ԵՊՀ միջազգային համագործակցության ընդհանուր պատկերը, ներկայումս իրականացվող ծրագրերն ու զարգացման միտումները ներկայացրեց Ալեքսանդր Մարգարովը: Էմիլ Գևորգյանն ու Սամվել Շուքուրյանն էլ հակիրճ պատմեցին իրենց ղեկավարած ստորաբաժանումներն ու հավելեցին, որ համագործակցության համար բոլոր նախադրյալները կան և իրենք պատրաստակամ են աշխատելու նորվեգացի գործընկերների հետ:

 

Հանդիպման ավարտին Արամ Սիմոնյանն ու Նորվեգիայի արկտիկական համալսարանի պրոռեկտոր Ուենչ Յակոբսենը համաձայնագիր ստորագրեցին և միմյանց հուշանվերներ փոխանցեցին:

 

 

Այնուհետև դեսպան Լեյդուլվ Ատլե Նամտվեդտը ԵՊՀ գիտական խորհրդի նիստերի դահլիճում համալսարանականների համար դասախոսություն կարդաց՝ անդրադառնալով Նորվեգիայի քաղաքական համակարգին, տնտեսական զարգացմանը վերաբերող մի շարք խնդիրների, ինչպես նաև պատասխանեց ուսանողներին հուզող հարցերին:

Այլ նորություններ
ԵՊՀ ՈՒՍՈՒՄՆԱԿԱՆ ԳՈՐԾԸՆԹԱՑԻ ԿԱՌԱՎԱՐՄԱՆ ԷԼԵԿՏՐՈՆԱՅԻՆ ԾՐԱԳԻՐԸ 10 ՏԱՐԵԿԱՆ Է
Այսօր ԵՊՀ ռեկտոր Արամ Սիմոնյանն իր աշխատասենյակում ընդունեց բուհի ուսումնական գործընթացի կառավարման «Supervision» էլեկտրոնային ծրագրի աշխատակիցներին:
«ՄԵԶ ՀԱՄԱՐ ԳՆԱՀԱՏԱԿԱՆԸ ՔԱՂԱՔԱՑԻՆԵՐԻ ԲԱՎԱՐԱՐՎԱԾ ԼԻՆԵԼՆ Է». ՄԱՆԵ ԹԱՆԴԻԼՅԱՆԸ՝ ՍՈՑԻՈԼՈԳԻԱՅԻ ՖԱԿՈՒԼՏԵՏԻ ՀՅՈՒՐ
Այսօր ԵՊՀ սոցիոլոգիայի ֆակուլտետի սոցիալական աշխատանքի և սոցիալական տեխնոլոգիաների ամբիոնը հյուրընկալել էր ՀՀ աշխատանքի և սոցիալական հարցերի նախարար Մանե Թանդիլյանին: