01.05.2020 | 
Հասարակություն
ՀԱՅ-ԹՈՒՐՔՄԵՆԱԿԱՆ ՀԱՄԱՏԵՂ ՀԵՌԱՎԱՐ ԳԻՏԱԺՈՂՈՎ՝ ՆՎԻՐՎԱԾ ՍԱՅԱԹ-ՆՈՎԱՅԻ ԵՎ ՄԱՀԹՈՒՄԿՈՒԼԻ ՖՐԱԳԻԻ ԲԱՆԱՍՏԵՂԾԱԿԱՆ ԺԱՌԱՆԳՈՒԹՅԱՆԸ
ՀԱՅ-ԹՈՒՐՔՄԵՆԱԿԱՆ ՀԱՄԱՏԵՂ ՀԵՌԱՎԱՐ ԳԻՏԱԺՈՂՈՎ՝ ՆՎԻՐՎԱԾ ՍԱՅԱԹ-ՆՈՎԱՅԻ ԵՎ ՄԱՀԹՈՒՄԿՈՒԼԻ ՖՐԱԳԻԻ ԲԱՆԱՍՏԵՂԾԱԿԱՆ ԺԱՌԱՆԳՈՒԹՅԱՆԸ
Թուրքմենստանի Մահթումկուլիի անվան պետական և Երևանի պետական համալսարաններն ապրիլի 29-ին անցկացրել են համատեղ հեռավար գիտաժողով «Մարդասիրական գաղափարների և ժողովրդական ավանդույթների արտացոլումը թուրքմենական գրականության դասական Մահթումկուլի Ֆրագիի և հայ բանաստեղծ, աշուղ Սայաթ-Նովայի ստեղծագործության մեջ» խորագրով:

Գիտաժողովի բացման խոսքով հանդես է եկել Մահթումկուլիի անվան պետական համալսարանի արտասահմանյան գրականության ամբիոնի վարիչ Ռոմանգուլի Մուստակովը, որը նշեց, որ երկու մեծ վարպետների պոեզիայում արտացոլված են համամարդկային  արժեքներ և իդեալներ:

 

ԵՊՀ թյուրքագիտության ամբիոնի վարիչ, պրոֆեսոր Ալեքսանդր Սաֆարյանը, դիմելով գիտաժողովի մասնակիցներին, ողջունեց թուրքմեն գործընկերների՝ վիրտուալ հանդիպում կազմակերպելու նախաձեռնությունը, ապա համառոտ ներկայացրեց հայ-թուրքմենական մշակութային բազմադարյա կապերի ուսումնասիրության դրույթները: Նա շեշտեց երկու երկրների հնագույն համալսարանների, ստեղծագործական տարբեր միությունների և Հայաստանի ու Թուրքմենստանի գիտական շրջանակների միջև համագործակցության կարևորությունը:

 

Ալ. Սաֆարյանն իր երախտագիտությունը հայտնեց Թուրքմենստանի նախագահ, ԵՊՀ պատվավոր դոկտոր Գուրբանգուլի Բերդիմուհամեդովին իրեն շնորհած պետական մրցանակի՝ «Մահթումկուլի Ֆրագի» մեդալի համար, որը ստացել է կրթության, գիտության և մշակույթի բնագավառներում հայ-թուրքմենական հարաբերությունների զարգացման գործում ներդրած ավանդի և Ֆրագիի ստեղծագործական ժառանգության քարոզչության համար:

 

ԵՊՀ ամբիոնի վարիչը տեղեկացրեց, որ «Հայագիտության հարցեր» ամսագրում հրատարակվել է իր և ՀՀ ԳԱԱ թղթակից անդամ Արամ Սիմոնյանի «Հայ-թուրքմենական մշակութային կապերի և Հայաստանի ու Թուրքմենստանի միջև գիտական ու կրթական համագործակցության մասին» համատեղ հոդվածը՝ նվիրված թուրքմեն մեծ բանաստեղծ Մահթումկուլիի 295-ամյակին:

 

Այդ կապակցությամբ հնչեցին առաջարկներ թուրքմեն բանաստեղծների երկերի՝ հայերեն թարգմանությունների նոր անթոլոգիայի ստեղծման, ինչպես նաև ԵՊՀ թյուրքագիտության ամբիոնի ավագ դասախոս Ամալյա Պետրոսյանի՝ Մահթումկուլիի ստեղծագործությանը նվիրված մենագրության լույսընծայման հետ կապված:

 

Ալ. Սաֆարյանը Երևանի պետական համալսարանի պրոֆեսորադասախոսական անձնակազմի անունից հանդես եկավ ԵՊՀ-ում Թուրքմեներենի և թուրքմենական մշակույթի կենտրոն բացելու ու Մահթումկուլի Ֆրագիի անունով կոչելու առաջարկով:

 

ԵՊՀ թյուրքագիտության ամբիոնի ավագ դասախոս Ամալյա Պետրոսյանը ելույթ ունեցավ թուրքմեներեն՝ շեշտելով, որ թուրքմեներենին տիրապետել է Թուրքմենստանի իր գործընկերների շնորհիվ, երբ նախապատրաստվում էին թուրքմեն մեծ բանաստեղծի ստեղծագործությանը նվիրված գիտական աշխատանքին: 

 

Ամալյա Պետրոսյանը դասավանդում է թուրքմեներեն և այլ թյուրքական լեզուներ, ինչպես նաև մեծ աշխատանք է կատարում Սայաթ-Նովայի և Մահթումկուլի Ֆրագիի բանաստեղծական ժառանգության համեմատական վերլուծության վերաբերյալ: Այդ թեմային էլ նվիրված էր նրա գիտական զեկուցումը:

 

Այնուհետև ելույթով հանդես եկավ Մահթումկուլիի անվան պետական համալսարանի թուրքմենական գրականության ամբիոնի վարիչ Ամաննեպես Շիխնեպեսովը, որը 18-րդ դարի երկու մեծ բանաստեղծների երկերի հետաքրքիր վերլուծություն ներկայացրեց:

 

Ա. Շիխնեպեսովը նշեց, որ պատիվ է ունեցել ներկա գտնվելու Հայաստանում Թուրքմենստանի դեսպանատան աջակցությամբ 2019 թ. ԵՊՀ-ում կազմակերպված՝ Մահթումկուլիի 295-ամյակին նվիրված գիտաժողովին՝ հավելելով, որ ԵՊՀ-ն թյուրքագիտության շատ կարևոր կենտրոն է:

 

Վիդեոկոնֆերանսի մասնակիցները ցանկություն հայտնեցին ամրապնդելու և շարունակելու գիտական համագործակցությունը Հայաստանի ու Թուրքմենստանի բուհերի, երկու երկրների գիտության և մշակույթի գործիչների միջև:

 

Նշենք, որ գիտաժողովը կազմակերպվել էր Հայաստանում Թուրքմենստանի դեսպանատան աջակցությամբ:

 

Պատրաստեց Հասմիկ Ասլանյանը

Այլ նորություններ
ԵՊՀ ԻՐԱՎԱԲԱՆԱԿԱՆ ԿԼԻՆԻԿԱՆ ՇՆՈՐՀԱՎՈՐԵԼ ԵՎ ՎԿԱՅԱԳՐԵՐ Է ՇՆՈՐՀԵԼ ԻՐ 20-ՐԴ ՏԱՐՎԱ ՇՐՋԱՆԱՎԱՐՏՆԵՐԻՆ
Իրավաբանական կլինիկան 2019-2020 ուսումնական տարում տոնում է իր 20-ամյակը։ Ինչպես նախորդ տարիներին, կլինիկան 20-րդ տարվա շրջանավարտներին ևս ճանապարհում է վկայագրերով, որոնք այս տարի ուսանողներին նախապես ուղարկվել էին փոստով։
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԹԻՄԸ ՀԱՂԹԵԼ Է ԱՐԲԻՏՐԱԺ ԽԱՂ-ՄՐՑՈՒՅԹՈՒՄ
ԵՊՀ իրավագիտության ֆակուլտետի թիմը մասնակցել ու հաղթող է ճանաչվել Հայաստանի ամերիկյան համալսարանի մեդիացիոն և արբիտրաժային կլինիկայի և ՀՀ արբիտրների ասոցիացիայի կողմից կազմակերպվող ամենամյա դատախաղ-մրցույթին, որը գրավոր եղանակով անցկացվել է հունիսի 19-30-ը։