15.03.2019 | 
Հասարակություն
ՄԱՐՏԻ 29-ԻՆ ՏԻԵԶԵՐՔ ԿԹՌՉԻ ԲԱՑԱՌԱՊԵՍ ԿԱՆԱՆՑԻՑ ԿԱԶՄՎԱԾ ԽՈՒՄԲԸ
ՄԱՐՏԻ 29-ԻՆ ՏԻԵԶԵՐՔ ԿԹՌՉԻ ԲԱՑԱՌԱՊԵՍ ԿԱՆԱՆՑԻՑ ԿԱԶՄՎԱԾ ԽՈՒՄԲԸ
Պատմության մեջ առաջին անգամ տիեզերք է թռչելու միայն կանանցից կազմված խումբը:

https://www.BBC.com/russian/news-ի հաղորդմամբ, ԱՄՆ-ում մարտը հայտարարվել է կանանց ամիս:

Հասարակության մեջ տարածված է այն թյուր կարծիքը, որ կարելի է թերագնահատել կնոջ կատարած դերը, այն դարձնել սահմանափակ և կաղապարված:

Այնինչ կանայք բազմաթիվ օրինակներով ապացուցում են, որ իրենց դերը չի սահմանափակվում ընտանեկան նեղ հարցերով, այլ տարածվում և ընդգրկում է հասարակական կյանքի բազմաբովանդակ ոլորտները:


Շատ հաճախ կանանց դերը կախված է հասարակության կառուցվածքից և կնոջն ընձեռած հնարավորություններից. որքան շատ են այդ հնարավորությունները, այնքան ավելի ընդարձակ և բազմաբովանդակ են հաջողության հասնելու ճանապարհները:

Կանայք կարող են պատերազմ մղել, խաղաղության դաշինք կնքել, տնտեսության տարբեր ոլորտներ ղեկավարել, արտաքին քաղաքականություն մշակել, տիեզերք թռչել:

Վերջին օրինակն ակնառու է. շուտով տիեզերք է թռչելու բացառապես կանանցից կազմված խումբը:

«Air Force» ավիաընկերության փոխանցմամբ, այդ մասին մարտի 8-ին հայտարարել է ՆԱՍԱ-ն:

Թռիչքին կմասնակցի չորս կին: Նրանցից երկուսը՝ տիեզերագնացներ Էնն Մաքքլեյնը ու Քրիստինա Քուկը, դուրս կգան բաց տիեզերք՝ մոտ 400 կիլոմետր բարձրության վրա՝ Միջազգային տիեզերական կայանի (ՄՏԿ) արևային վահանակները փոխելու նպատակով:
Երկրի վրա նրանց գործողությունները ղեկավարելու է Մերի Լոուրենսը, կառավարման վահանակի վրա աշխատելու է Ջեկի Քեյգին:

Ըստ «Air Force»-ի՝ թռիչքը տեղի կունենա մարտի 29-ին:



Հարկ է նշել, որ նախկինում բացառապես կանանցից կազմված խմբեր տիեզերք չեն թռել:

Փետրվարի 21-ին ռուս Ալեքսեյ Օվչինինը, ամերիկացիներ Նիկ Հեյգը և Քրիստինա Քուկը «Սոյուզ ՄՍ-12» տիեզերանավով թռիչքից առաջ՝ քննությունները հանձնելուց հետո, միջգերատեսչական հանձնաժողովի կողմից թռիչքի են երաշխավորվել որպես Միջազգային տիեզերակայանի հիմնական անձնակազմ:

ՄՏԿ-ում նրանք պետք է անցկացնեն 204 օր: Նրանք Բայկոնուրի տիեզերակայանից ուղեծիր կուղևորվեն մարտի 14-ին:

Ներկայումս ՄՏԿ-ում աշխատում են ռուս Օլեգ Կոնոնենկոն, կանադացի Դավիթ Սեն-Ժակը և ամերիկուհի Էնն Մաքքլեյնը:

Տեղեկացնենք, որ առաջին կինը տիեզերքում Վալենտինա Տերեշկովան էր։ 1963 թ. հունիսի 16-ին նա թռիչք կատարեց «Վաստոկ 6» տիեզերանավով։

19 տարի շարունակ նա միակ կին տիեզերագնացն էր, իսկ 1982 թ. օգոստոսի 19-ին Սվետլանա Սավիցկայան դարձավ երկրորդ կին տիեզերագնացը։

Անգին Խաչատրյան

 

 

 

 

Այլ նորություններ
ԵՊՀ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏԻ ԵՐԵՔ ՈՒՍԱՆՈՂՆԵՐԸ՝ «ԼՐԱԳՐՈՂԱԿԱՆ ՄԵՆԱՄԱՐՏ» ՀԵՌՈՒՍՏԱՆԱԽԱԳԾԻ ՄԱՍՆԱԿԻՑՆԵՐ
ԵՊՀ ժուռնալիստիկայի ֆակուլտետի երեք ուսանողներ՝ Աննա Կոստանյանը, Էլեն Աղաջանյանը (4-րդ կուրս) և Ռիմա Գրիգորյանը (2-րդ կուրս), մասնակցել են Եվրոպական միության կողմից համաֆինանսավորվող «Տեղեկատվության մատչելիություն և հետաքննական լրագրություն առավել իրազեկված քաղաքացիների համար» ծրագրի շրջանակում իրականացվող «Լրագրողական մենամարտ» հեռուստանախագծին և հասել մինչև եզրափակիչ:
ՔՆՆԱՐԿՈՒՄ՝ ԲԱՐՁՐԱԳՈՒՅՆ ԿՐԹՈՒԹՅԱՆ ՀԻՄՆԱԽՆԴԻՐՆԵՐԻ, ՄԱՐՏԱՀՐԱՎԵՐՆԵՐԻ ԵՎ ԴՐԱՆՑ ՀՆԱՐԱՎՈՐ ԼՈՒԾՈՒՄՆԵՐԻ ՎԵՐԱԲԵՐՅԱԼ
ԵՊՀ Չարենցի անվան դահլիճում «Մեդիա կենտրոն»-ի նախաձեռնությամբ անցկացվեց «Բարձրագույն կրթության հիմնախնդիրները, առկա մարտահրավերներն ու դրանց հնարավոր լուծումները բարձրագույն կրթության զարգացման ռազմավարությունում» թեմայով քննարկում: