29.03.2017 | 
Հասարակություն
ՆՈՐ ՀՆԱՐԱՎՈՐՈՒԹՅՈՒՆՆԵՐ ՈՒՍԱՆՈՂՆԵՐԻ ՀԱՄԱՐ
ՆՈՐ ՀՆԱՐԱՎՈՐՈՒԹՅՈՒՆՆԵՐ ՈՒՍԱՆՈՂՆԵՐԻ ՀԱՄԱՐ
ԵՊՀ ռեկտորն ու Հայաստանում «Beeline» ընկերության գլխավոր տնօրեն Անդրեյ Պյատախինը համագործակցության հուշագիր են ստորագրել:

Այսօր ԵՊՀ շրջանավարտների և կարիերայի կենտրոնի նախաձեռնությամբ կազմակերպված «Լիդերության դերը կարիերայի զարգացման գործում. բուհ-ձեռնարկություն համագործակցության նոր ձևաչափ» խորագրով ծրագրի շրջանակում ԵՊՀ ռեկտոր Արամ Սիմոնյանը հանդիպեց Հայաստանում «Beeline» ընկերության ներկայացուցիչների հետ, իսկ քննարկման առանցքում կառույցների միջև փոխգործակցության ծավալումն ու ակտիվ զարգացումն էին:

 

ԵՊՀ բակալավրիատի և մագիստրատուրայի ուսանողների, ինչպես նաև շրջանավարտների համար նախատեսված ծրագիրը մասնակիցներին հնարավորություն կտա ծանոթանալու ներկայումս ՀՀ աշխատաշուկայում մեծ պահանջարկ վայելող ոլորտների կազմակերպությունների գործունեությանը և կադրային քաղաքականությանը:

 

«Մենք միշտ պատրաստ ենք և ունենք բոլոր հնարավորությունները կադրերի պատրաստման և պրակտիկայի ձեռքբերման տեսանկյունից ընդլայնելու մեր համագործակցությունը ՀՀ-ում խոշոր գործատուների հետ: Այսօրվա հուշագիրը, վստահ եմ, նոր և արդյունավետ փոխգործակցության համար կարևոր խթան կհանդիսանա»,- ասաց Արամ Սիմոնյանը:

 

Հանդիպմանը ներկա էին նաև ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, ԵՊՀ շրջանավարտների և կարիերայի կենտրոնի տնօրեն Լիլիթ Հակոբյանը, կենտրոնի այլ աշխատակիցներ:

 

«Յուրաքանչյուր պետության զարգացման և կայացման համար կարևորագույն նախապայմաններից է կիրթ և խելացի երիտասարդություն ունենալը: Եվ քանի որ մենք գործում ենք Հայաստանում և մեր ընկերության ապագան նույնպես կախված է երիտասարդ կադրերից, մենք, անկասկած, նույնպես հետաքրքրված ենք Հայաստանի առաջատար բուհի հետ համագործակցությամբ»,- նշեց Ա. Պյատախինը և հավելեց, որ «Beeline» ընկերությունը պատրաստ է ուսանողների համար լինել այն կառույցը, որտեղ նրանք կարող են ձեռք բերել գործնական հմտություններ և կայանալ որպես մասնագետներ:

 

Այնուհետև «Beeline» ընկերության գլխավոր տնօրենը համալսարանական ուսանողների հետ հանդիպման ընթացքում ներկայացրեց հեռահաղորդակցության և տեղեկատվական տեխնոլոգիաների ոլորտի զարգացման փուլերն ու ժամանակակից միտումները, «Beeline» ընկերության գործունեությունն, ինչպես նաև Հայաստանում ու ընդհանրապես աշխարհում հեռահաղորդակցության ոլորտի միջազգային խոշորագույն ընկերությունների մրցակցության կանոններն ու հմտությունները:

 

Հավելենք, որ «Լիդերության դերը կարիերայի զարգացման գործում. բուհ-ձեռնարկություն համագործակցության նոր ձևաչափ» խորագրով ծրագրի ավարտին բոլոր մասնակիցները կպարգևատրվեն հավաստագրերով, իսկ լավագույնները ծրագրում ընդգրկված կազմակերպությունների կողմից կստանան պրակտիկայի կամ աշխատանքի առաջարկ:

Այլ նորություններ
ՄԵԿՆԱՐԿԵՑ ՖՐԱՆԿՖՈՒՐՏԻ ԳՐՔԻ ՄԻՋԱԶԳԱՅԻՆ ՏՈՆԱՎԱՃԱՌԸ
ԵՊՀ-ի հրատարակած գրքերը ներկայացվեցին Եվրոպական գրահրատարակչական ամենաբարձր հարթակում:
ԹԱՐԳՄԱՆՉԱՑ ՏՈՆԸ ՆՇՎԵՑ ԵՊՀ-ՈՒՄ
Հոկտեմբերի 12-14-ը համալսարանականները կազմակերպել են Սուրբ Թարգմանչաց տոնին նվիրված մի շարք միջոցառումներ: