09.11.2017 | 
Հասարակություն
«ՓՐԿՈՒԹՅԱՆ ՔԱՐՏԵԶ»-Ը ՑՈՒՑԱԴՐՎԵՑ ԵՊՀ-ՈՒՄ
«ՓՐԿՈՒԹՅԱՆ ՔԱՐՏԵԶ»-Ը ՑՈՒՑԱԴՐՎԵՑ ԵՊՀ-ՈՒՄ
Նոյեմբերի 8-ին Մայր բուհի մշակույթի կենտրոնի դահլիճում տեղի ունեցավ «Փրկության քարտեզ» ֆիլմի ցուցադրությունը:

Ֆիլմը ԵՊՀ-ում ցուցադրվում էր առաջին անգամ՝ ԵՊՀ մշակույթի կենտրոնի կինոակումբի և Հայաստանի ազգային կինոկենտրոնի հետ համագործակցության շրջանակում:

 

Մշակույթի կենտրոնում հյուրընկալվել էին «Փրկության քարտեզ» ֆիլմի պրոդյուսեր Մանվել Սարիբեկյանը, սցենարի հեղինակ Աննա Սարգսյանը, Հայաստանի ազգային կինոկենտրոնի ներկայացուցիչ Աշոտ Համբարձումյանը:

 

«Փրկության քարտեզ» ֆիլմը նկարահանվել է 2015 թ.-ին: Նկարահանումները իրականացվել են ինը երկրներում: Մինչ այժմ ֆիլմը ցուցադրվել է 14 երկրների 31 քաղաքներում: Այն հիմնականում նկարահանված է իրական փաստերի հիման վրա, որոնք տրամադրել են տարբեր երկրների պետական ազգային արխիվները, թանգարանները, ինչպես նաև ձեռք են բերվել անհատական պահոցներից:

 

«Ուրախ եմ, որ ֆիլմը ցուցադրվում է նաև այս ձևաչափով: Կարևորում եմ հատկապես ուսանողների համար կազմակերպվող այսպիսի ֆիլմերի ցուցադրումներն ու դիտումները: Ցեղասպանության թեմայով ֆիլմ պատրաստելը չափազանց դժվար բան է: Դժվար է ոչ միայն հոգեբանական իմաստով: Այս թեման  շատ ավելին է պարտադրում, շատ ավելի ծանր է, քան այն հիմնական  խնդիրը, որը ցանկացած կինոստեղծող դնում է իր առաջ»,- ասում է Աննա Սարգսյանը:

 

Սցենարի հեղինակը նշում է նաև, որ ֆիլմարտադրողների հիմնական խնդիրը հետաքրքիր ֆիլմ ստեղծելն է, բայց կրկնակի խնդիր է անել դա ցեղասպանության թեմայով: 

 

 

Ֆիլմը պատմում է եվրոպացի հինգ կանանց՝ Կարեն Եփփեի, միսիոներուհիներ Մարիա Յակոբսենի, Բոդիլ Բյորնի, Ալմա Յոհանսոնի և Աննա Հեդվիգ Բյուլի՝ հայ ժողովրդի հանդեպ ունեցած անսահման նվիրվածության մասին: Նրանք, թողնելով իրենց բարեկեցիկ կյանքը, Հայոց ցեղասպանության տարիներին գալիս և  օժանդակում են հայ ժողովրդին, օգնում և չխնայելով անգամ իրենց կյանքը՝ փորձում փրկել մահից որբացած երեխաներին:

 

Նրանց անցած ուղին ֆիլմում ներկայացնում է ֆին պատմաբան, ցեղասպանագետ Սվանտե Լունդգրենը՝ Ցեղասպանության, մահվան և ոճրագործության ճանապարհին զուգահեռ գծելով «Փրկության քարտեզը»:

 

Ուսանողները ֆիլմը դիտելուց անմիջապես հետո հնարավորություն ունեցան այն քննարկել ստեղծագործական խմբի ներկայացուցիչների հետ: 

Այլ նորություններ
ԵՊՀ ԲՈՒՍԱԲԱՆՈՒԹՅԱՆ ԵՎ ՍՆԿԱԲԱՆՈՒԹՅԱՆ ԱՄԲԻՈՆԻ ԵՎ «ՓՈՔՐԻԿ ԻՇԽԱՆ» ԿՐԹԱՀԱՄԱԼԻՐԻ ՀԱՄԱԳՈՐԾԱԿՑՈՒԹՅՈՒՆԸ ՏԱԼԻՍ Է ԻՐ ԱՐԴՅՈՒՆՔՆԵՐԸ. ԱՇԱԿԵՐՏՆԵՐՆ ԱՐԺԱՆԱՑԵԼ ԵՆ ՀԱՏՈՒԿ ՄՐՑԱՆԱԿՆԵՐԻ
ԵՊՀ կենսաբանության ֆակուլտետի բուսաբանության և սնկաբանության ամբիոնի դասախոսների և «Փոքրիկ Իշխան» կրթահամալիրի ավագ դպրոցի սաների համատեղ նախաձեռնությամբ իրականացված գիտական հետազոտական աշխատանքների արդյունքները ներկայացվել են ՀՀ ԿԳՄՍ նախարարության կողմից կազմակերպված «Համադպրոցական գիտության փառատոնին», որտեղ սաներն արժանացել են հատուկ մրցանակի։
 «COVID-19: ՌԱԶՄԱՎԱՐՈՒԹՅՈՒՆՆԵՐ, ՄՈԴԵԼՆԵՐ, ՍԻՄՈՒԼՅԱՑԻԱՆԵՐ». ՄՐՑՈՒՅԹԻ ՀԱՅՏԱՐԱՐՈՒԹՅՈՒՆ
ԵՊՀ տնտեսագիտության և կառավարման ֆակուլտետի «Հետազոտությունների և գործարարության կենտրոն» հիմնադրամը ԿորոնաԹեստ ընկերության հովանավորությամբ հայտարարում է մրցույթ՝ նպատակ ունենալով փնտրել ուղիներ՝ համավարակը ճնշելու հետ մեկտեղ պահպանելու տնտեսական ակտիվությունը: