10.12.2019 | 
Հասարակություն
«ԱՌԱՆՑ ՀԱՅՐԵՆԻՔԸ ՍԻՐԵԼՈՒ ՈՉ ՈՔ ՉԻ ԿԱՐՈՂ ԴԻՎԱՆԱԳԵՏ ԴԱՌՆԱԼ». ԱՐԱՄ ԳՐԻԳՈՐՅԱՆԸ՝ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏՈՒՄ
«ԱՌԱՆՑ ՀԱՅՐԵՆԻՔԸ ՍԻՐԵԼՈՒ ՈՉ ՈՔ ՉԻ ԿԱՐՈՂ ԴԻՎԱՆԱԳԵՏ ԴԱՌՆԱԼ». ԱՐԱՄ ԳՐԻԳՈՐՅԱՆԸ՝ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ արևելագիտության ֆակուլտետն այսօր հյուրընկալել է Ուզբեկստանի Հանրապետությունում ՀՀ արտակարգ և լիազոր դեսպան Արամ Գրիգորյանին, որը հանդես է եկել Կենտրոնական Ասիայի պետությունների հետ Հայաստանի հարաբերությունների վերաբերյալ դասախոսությամբ:

Ներկայումս Ուզբեկստանի Հանրապետությունում ՀՀ արտակարգ և լիազոր դեսպան Արամ Գրիգորյանը ԵՊՀ արևելագիտության ֆակուլտետի շրջանավարտ է: Ինչպես հանդիպման սկզբում տեղեկացրեց ֆակուլտետի դեկան Ռուբեն Մելքոնյանը, դեսպանի հետ հանդիպումը կազմակերպվել է արդեն ավանդական դարձած «Արևելագետները՝ Արևելագիտականում» հանդիպում-դասախոսությունների շրջանակում:

 

«Ֆակուլտետում այսօր յուրահատուկ օրերից մեկն է, քանի որ պատիվ ունենք հյուրընկալելու ՀՀ դիվանագիտությունը կերտած հայտնի դեսպաններից մեկին՝ Արամ Գրիգորյանին»,- ասաց Ռուբեն Մելքոնյանը և ներկայացրեց դեսպանի գործունեության հատկանշական դրվագները՝ փաստելով, որ նա եղել է ՀՀ արտակարգ և լիազոր դեսպան նաև Թուրքմենստանում և Տաջիկստանի Հանրապետությունում:

 

 

Ռուբեն Մելքոնյանը փաստեց, որ Արևելագիտության ֆակուլտետը Հայաստանում միակ ուսումնագիտական կենտրոնն է, որտեղ որպես առանձին ուղղվածություն ուսումնասիրվում է թյուրքագիտությունը. «Միայն այս ֆակուլտետում է, որ ուսումնասիրվում է ոչ միայն թուրքերենը, այլև ադրբեջաներենը, ղազախերենը, թուրքմեներենը, և այստեղ է, որ կա համապատասխան կենտրոն»:

 

Հանդիպում-դասախոսությանը, որին ներկա էին ֆակուլտետի ամբիոնի վարիչներ, պրոֆեսորադասախոսական կազմի ներկայացուցիչներ և ուսանողներ, Արամ Գրիգորյանը ներկայացրեց Կենտրոնական Ասիայի պետությունների հետ Հայաստանի հարաբերությունների առանձնահատկությունները՝ ցույց տալով, թե ինչպես ու ինչ պայմաններում են հաստատվել դիվանագիտական կապերը և զարգացման ինչ ընթացք են ունեցել:

 

Արամ Գրիգորյանը փաստեց, որ դիվանագիտական գործունեություն իրականացնելիս գլխավոր հատկանիշը, որ պետք է ունենա դիվանագետը, հայրենասիրությունն է. «Առանց հայրենիքը սիրելու ոչ ոք չի կարող դիվանագետ դառնալ: Բոլոր գործողությունների, խոսքերի, շփումների ժամանակ պետք է մտածել նախևառաջ հայրենիքի շահի համար»:

 

 

Նա հիշեց, որ 1990-ականների սկզբին նորանկախ Հայաստանում դեռ դիվանագիտական դպրոց չկար, և այդ ժամանակ ղեկավարությունը կոչ արեց տարբեր երկրներում ապրող հայ դիվանագետներին վերադառնալ Հայաստան և նպաստել երկրի արտաքին հարաբերությունների կայացմանը. «Այդ ժամանակ շատերը եկան, բայց ուշագրավն այն է, որ միայն Արևելագիտության ֆակուլտետի շրջանավարտներն էին, որոնք համահավասար էին դիվանագետներին»:

 

Արամ Գրիգորյանը հանդիպում-դասախոսության ընթացքում պատասխանեց նաև մասնակիցների հարցերին: Միջոցառման ավարտին Ռուբեն Մելքոնյանը դեսպանին նվիրեց «Թուրքիայի Հանրապետության պատմություն» դասագիրքը:

 

Քնար Միսակյան

Այլ նորություններ
ՍԼՈՎԱԿԻԱ. ԿՐԹՈՒԹՅԱՆ ԻՆՔՆԱՎԱՐՈՒԹՅԱՆ ՇԱՐՈՒՆԱԿՎՈՂ ՊԱՏՄՈՒԹՅՈՒՆ
Սլովակիան Կենտրոնական Եվրոպայում գտնվող, լեռներով պատված փոքր երկիր է:
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՀԱՅՏԱՐԱՐՈՒԹՅՈՒՆԸ
ԵՊՀ իրավագիտության ֆակուլտետի հայտարարությունը՝ կապված Հանրային հեռուստաընկերության 2020 թ. սեպտեմբերի 10-ի եթերում հնչած տեղեկատվության հետ: