04.05.2018 | 
Գիտություն
ՀԱՅ-ՆՈՐՎԵԳԱԿԱՆ ԲԱՐԵԿԱՄՈՒԹՅՈՒՆԸ ՆԱԵՎ ԳԻՏՈՒԹՅԱՆ ԱՍՊԱՐԵԶՈՒՄ
ՀԱՅ-ՆՈՐՎԵԳԱԿԱՆ ԲԱՐԵԿԱՄՈՒԹՅՈՒՆԸ  ՆԱԵՎ ԳԻՏՈՒԹՅԱՆ ԱՍՊԱՐԵԶՈՒՄ
Այսօր ԵՊՀ կենսաբանության ֆակուլտետում տեղի ունեցավ Նորվեգիայի Բերգենի համալսարանի պրոֆեսոր, ԵՊՀ հրավիրյալ դասախոս Նիլս-Կորե Բիրկելանդի պարգևատրման արարողությունը:

ԵՊՀ կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի և Բերգենի համալսարանի երկարամյա համագործակցության շրջանակում Նիլս-Կորե Բիրկելանդը ԵՊՀ-ում բազմիցս հանդես է եկել դասախոսություններով:

 

Ամբիոնի վարիչ Արմեն Թռչունյանն այսօր ասաց, որ այս համագործակցությունը բավականին արդյունավետ է և անպայման շարունակական կլինի. «Սա միջազգային կարևոր ծրագիր է, որի նպատակն է խթանել գիտակրթական գործունեությունը տարբեր երկրներում: Այս համագործակցության արդյունքում է, որ մեր ուսանողները բազմաթիվ անգամ հնարավորություն են ունեցել լսելու պարոն Բիրկելանդը  դասախոսությունները, որի համար մեր ամբիոնի կողմից ուզում եմ մեր երախտագիտությունը հայտնել պրոֆեսորին»:

 

Արմեն Թռչունյանը պատմեց նաև, որ նորվեգացի պրոֆեսորն իր առաջին իսկ այցելության ժամանակ այցելել է Ծիծեռնակաբերդի հուշահամալիր, մեծ հետաքրքրությամբ ուսումնասիրել է, թե որ պետություններն են ճանաչել Հայոց ցեղասպանությունը և անձամբ նորվեգական ժողովրդի հետ մեծ աջակցություն է ցուցաբերում այդ հարցում. «Պարոն Բիրկելանդը վաղն անձամբ կգնա Ծիծեռնակաբերդի հուշահամալիր, որտեղ իր միջոցներով կազմակերպվելու է ծառատունկ՝ ի հիշատակ հայ-նորվեգական բարեկամությանը»:

 

Կենսաքիմիայի, մանրէաբանության և կենսատեխնոլոգիայի ամբիոնի դոցենտ Հովիկ Փանոսյանը պարգևատրման արարողությունից առաջ ներկայացրեց, որ այս համագործակցությունը սկսվել է ամբիոնին տրամադրված դրամաշնորհի շրջանակում. «Այդ ժամանակ 3 ամսով հնարավորություն ունեցա լինել Բերգենի համալսարանում, աշխատել պրոֆեսոր Բիրկելանդը գլխավորած լաբորատորիայում, որտեղ էլ ծանոթացա նրա հետ: Մեր ծանոթությունից հետո պրոֆեսորն ուսումնասիրեց և ծանոթացավ հայ ազգի հետ ու սիրեց մեզ: Մենք դարձանք արդեն լավ ընկերներ և որոշեցինք համագործակցության հիմք ստեղծել Բերգենի համալսարանի և ԵՊՀ-ի միջև»:

 

Համագործակցության ծրագիրը, Հովիկ Փանոսյանի հավաստմամբ, ֆինանսավորվել է Նորվեգիայի արտաքին գործերի նախարարության կողմից, որն իր տեսակի մեջ առաջին գիտակրթական ծրագիրն է եղել: Ժամանակի ընթացքում համագործակցությունն ընդլայնվել է՝ իր մեջ ներառելով նոր երկրներ և դառնալով ցանցային ծրագիր:

 

«Ցանցի կարևորությունը Հայաստանի, մասնավորապես ԵՊՀ-ի համար այն է, որ այստեղ մենք դարձանք ոչ միայն գիտություն սպառող կամ գիտություն ներմուծող երկիր, այլև դարձանք գիտություն արտահանող երկիր: Եվրոպական առաջադեմ միտքը մենք յուրացնում ենք, հետո փորձում ենք հասնել այդ մակարդակին ու փոխանցում այն երկրներին, որոնք դրա կարիքն ունեն: Այս ցանցում ԵՊՀ-ն կենտրոնական դեր է ստանձնել Եվրոպայից Չինաստան և հակառակ ուղղությամբ գիտական նոր արդյունքները փոխանցելիս»,- պարզաբանեց Հովիկ Փանոսյանը:

 

 

Ամբիոնի դոցենտը փաստեց, որ համագործակցության հաստատված ծրագիր կա մինչև 2021 թվականը, որի շրջանակում կշարունակեն փորձի փոխանակումը և էլ ավելի մեծ արդյունքներ կգրանցեն:

 

Հայաստանի Ֆրիտյոֆ Նանսեն հիմնադրամի նախագահ Ֆելիքս Բախչինյանը Նորվեգիայի Բերգենի համալսարանի պրոֆեսոր, ԵՊՀ հրավիրյալ դասախոս Նիլս-Կորե Բիրկելանդը  հայ-նորվեգական բարեկամության զարգացման գործում ունեցած վաստակի համար պարգևատրեց Ֆրիտյոֆ Նանսենի ոսկյա հուշամեդալով:

 

 

Միջոցառման ավարտին Նիլս-Կորե Բիրկելանդին և Կենսաբանության ֆակուլտետի պրոֆեսորադասախոսական կազմի ներկայացուցիչները ծաղկեպսակ են տեղադրել ԵՊՀ երախտիքի ծառուղում տեղադրված Ֆրիտյոֆ Նանսենի կիսանդրու դիմաց:

 

Քնար Միսակյան

Այլ նորություններ
ՀԱՅՐ ԵՎ ՈՐԴԻ ԹՌՉՈՒՆՅԱՆՆԵՐՆ ԱՌԱՋԱՐԿՈՒՄ ԵՆ ՆՈՐ ԳԱՂԱՓԱՐ ՄԱՆՐԷՆԵՐԻ ԿԵՆՍԱՔԻՄԻԱՅԻ ԲՆԱԳԱՎԱՌՈՒՄ
ԵՊՀ դոկտորներ Ա. Թռչունյանի և Կ. Թռչունյանի հեղինակած «Վերանայված խմորում. ինչպե՞ս են միկրոօրգանիզմները գոյատևում էներգիայի սահմանափակման պայմաններում» վերնագրով տեսակետային հոդվածը տպագրվել է հեղինակավոր «Trends in Biochemical Sciences» 15.678 ազդեցության գործակից ունեցող ամսագրում:
ՇՈՏԼԱՆԴԻԱՅՈՒՄ ԳՏԵԼ ԵՆ ՄԵՆԴԵԼԵԵՎԻ ԱՄԵՆԱՀԻՆ ՊԱՐԲԵՐԱԿԱՆ ԱՂՅՈՒՍԱԿՆ ԱՇԽԱՐՀՈՒՄ
Շոտլանդիայի Սենտ-Էնդրյուս համալսարանի քիմիական լաբորատորիայի մաքրման աշխատանքների ժամանակ հայտնաբերվել է Մենդելեևի պարբերական աղյուսակի տպագիր տարբերակը, որն այսօր առկա տարբերակներից ամենահինն է: