08.10.2019 | 
Մշակույթ
ՎԱՐԴԳԵՍ ՊԵՏՐՈՍՅԱՆԻ «ՀԱՅԿԱԿԱՆ ԷՍՔԻԶՆԵՐ»-Ը՝ «ԲՈՀԵՄ» ԹԱՏՐՈՆԻ ԲԵՄՈՒՄ
ՎԱՐԴԳԵՍ ՊԵՏՐՈՍՅԱՆԻ «ՀԱՅԿԱԿԱՆ ԷՍՔԻԶՆԵՐ»-Ը՝ «ԲՈՀԵՄ» ԹԱՏՐՈՆԻ ԲԵՄՈՒՄ
Հոկտեմբերի 7-ին «Բոհեմ» թատրոնում ԵՊՀ մշակույթի կենտրոնը «Հայ ֆեստ» միջազգային թատերական փառատոնի շրջանակում ներկայացրեց Վարդգես Պետրոսյանի «Հայկական էսքիզներ»-ը:

Ներկայացման բեմադրությանը ներկա էին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, գիտքարտուղար Լևոն Հովսեփյանը, Մշակույթի կենտրոնի տնօրեն Կարինե Դավթյանը, կենտրոնի սաներ, ուսանողներ, հյուրեր արտասահմանից, ինչպես նաև Վարդգես Պետրոսյանի ընտանիքը:

Հարկ է նշել, որ «Հայկական էսքիզներ» ներկայացման հիմքում Վարդգես Պետրոսյանի համանուն ստեղծագործությունն է:

Ներկայացման սցենարի հեղինակները ԵՊՀ մշակույթի կենտրոնի տնօրեն Կարինե Դավթյանը և կենտրոնի սան Անի Միքայելյանն են:

 

Մեզ հետ զրույցում Կարինե Դավթյանը փաստեց, որ արդեն 6-րդ անգամ է՝ ԵՊՀ մշակույթի կենտրոնն իր ներկայացումներով մասնակցում է «Հայ ֆեստ» միջազգային թատերական փառատոնին:

««Հայ ֆեստ»-ն ինքնին նորարարական թատրոնների փառատոն է,- նշեց Կարինե Դավթյանը,- մեր թատրոնն ընդգրկվեց «Հայ ֆեստ»-ի ծրագրում, քանի որ այն համարվեց նորարարական և շատ հետաքրքիր ուսանողական թատրոն»:

Անդրադառնալով Վարդգես Պետրոսյանի «Հայկական էսքիզներ»-ին, Կարինե Դավթյանն ասաց, որ այս ներկայացման մեջ նույնպես նորարարություն կա՝ թե՛ բեմադրության, թե՛ տեքստի առումով:

 

«Պետք է նշեմ, որ տեքստում փոփոխություններ ենք կատարել՝ կարևորելով նոր սերնդի մտածողությունը: Բացի Վարդգես Պետրոսյանի հայտնի էսսեից՝ մենք ավելացրել ենք նաև Արցախյան ազատամարտի և Քառօրյա պատերազմի մասին հատվածները՝ նախապես ստանալով նրա ընտանիքի թույլտվությունը»:

Կարինե Դավթյանի խոսքով, Վարդգես Պետրոսյանի ընտանիքը ներկայացման պրեմիերան դիտելուց հետո ոչ միայն գոհ է մնացել կատարված աշխատանքից, այլև խոստովանել է, որ ներկայացման ընթացքում իրենց համար երբեմն դժվար է եղել հասկանալ՝ որտեղ է ավարտվում հեղինակի գրածը, ու սկսվում ավելացրած հատվածները:

«Թատրոնի սաները, որոնք այս փառատոնին առաջին անգամ պիտի մասնակցեն, շատ ոգևորված են,- ասաց Կարինե Դավթյանը,- այդ ոգևորվածությունը կիսում եմ նաև ես, որովհետև «Հայ ֆեստը» հետաքրքիր հարթակ է, և շատ կարևոր է, այդ հարթակն օգտագործելով, ևս մեկ անգամ հնչեցնել ԵՊՀ-ի անունը»:

Անի Պողոսյան

Այլ նորություններ
«ԱՍՏՂԱԶԱՐԴ ԵՐԿԻՆՔՆ ԻՄ ԳԼԽԱՎԵՐԵՎՈՒՄ» ԽՈՐԱԳԻՐԸ ԿՐՈՂ ՀԱՄԵՐԳ՝ ՆՎԻՐՎԱԾ ԼՅՈՒԴՎԻԳ ՎԱՆ ԲԵԹՀՈՎԵՆԻ 250-ԱՄՅԱԿԻՆ
ԵՊՀ մշակույթի կենտրոնում այսօր տեղի ունեցավ Երևանի Կոմիտասի անվան պետական կոնսերվատորիայի Օպերային ստուդիայի՝ «Աստղազարդ երկինքն իմ գլխավերևում» խորագիրը կրող համերգը՝ նվիրված գերմանացի հայտնի կոմպոզիտոր, դաշնակահար, դիրիժոր Լյուդվիգ վան Բեթհովենի 250-ամյակին:
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը: