03.04.2019 | 
Մշակույթ
«ՀԱՅԿԱԿԱՆ ԷՍՔԻԶՆԵՐ» ՆԵՐԿԱՅԱՑՈՒՄԸ՝ ԵՊՀ ԻՋԵՎԱՆԻ ՄՇԱԿՈՒՅԹԻ ՏԱՆ ԲԵՄՈՒՄ
«ՀԱՅԿԱԿԱՆ ԷՍՔԻԶՆԵՐ» ՆԵՐԿԱՅԱՑՈՒՄԸ՝ ԵՊՀ ԻՋԵՎԱՆԻ ՄՇԱԿՈՒՅԹԻ ՏԱՆ ԲԵՄՈՒՄ
ԵՊՀ մշակույթի կենտրոնի «Համալսարանականներ» թատրոն-ստուդիան ապրիլի երկուսին ԵՊՀ Իջևանի մասնաճյուղի հրավերով Իջևանի մշակույթի տան բեմում ներկայացրեց Վարդգես Պետրոսյանի «Հայկական էսքիզներ»-ը:

Հիշեցնենք, որ «Հայկական էսքիզներ» ներկայացման հիմքում Վարդգես Պետրոսյանի համանուն ստեղծագործությունն է: Բեմադրության սցենարի հեղինակները ԵՊՀ մշակույթի կենտրոնի տնօրեն Կարինե Դավթյանը և Անի Միքայելյանն են, բեմադրող ռեժիսորը՝ Կարինե Դավթյանը, հագուստների ձևավորումն իրականացրել է «Տերյան» մշակութային կենտրոնի տնօրեն Լիլիթ Մելիքյանը, դերերը կերտել են ԵՊՀ մշակույթի կենտրոնի «Համալսարանական» թատրոն-ստուդիայի սաները:

 

Կարինե Դավթյանը ներկայացման մեջ նոր հերոսներ և դեպքեր է ներառել. «Պիեսը գրվել էր մի ժամանակաշրջանում, որից հետո մեր ժողովրդի կյանքում շատ կարևոր իրադարձություններ են տեղի ունեցել, որոնցից են Արցախյան հերոսամարտը, Քառօրյա պատերազմը: Վերջինս ինձ վրա մեծ ազդեցություն է թողել: Երիտասարդ տղաների հայրենասիրական այդ շունչն անչափ հուզիչ է, և կարծում եմ, որ դեռևս չի ստեղծվել մի գործ, որը լավագույնս կարտացոլի այն: Ես իմ հոգու պարտքը համարեցի «Հայկական էսքիզներում» ավելացնել այդ երկու կարևոր դրվագները՝ իրենց հերոսներով»:       

 

 

Մեզ հետ զրույցում Մշակույթի կենտրոնի տնօրենը փաստեց, որ ԵՊՀ Իջևանի մասնաճյուղի հետ համագործակցությունը սկսվել է դեռևս նախորդ տարվանից, երբ առաջարկ էին ստացել՝ կազմակերպելու շրջանավարտներին դիպլոմներ հանձնելու արարողությունը. «Ղեկավարությունը ցանկություն հայտնեց սերտացնել հետագա համագործակցությունը և առաջարկեց հետագայում մշակութային այլ միջոցառումներ իրականացնել այնտեղ, հատկապես թատերական ներկայացում, քանի որ վաղուց ներկայացումներ չեն կազմակերպվել»:

 

Եվ ահա, խորհրդանշական ձևով ապրիլի 2-ին ԵՊՀ Իջևանի մշակույթի տան բեմում ներկայացվեց «Հայկական էսքիզները»՝ նվիրված Քառօրյա պատերազմի զոհերին: Կարինե Դավթյանի հավաստմամբ, հանդիսականների շարքերում միայն համալսարանականներ չէին. «Մեր ներկայացումը մշակութային տոն էր ամբողջ քաղաքի համար»:

 

«Արձագանքները շատ էին, բոլորը հուզվել էին: Դահլիճում ցուրտ էր, բայց մեր սաներին դա չխանգարեց հանդես գալ այնպես, որ դահլիճում բոլորը ջերմանան ու յուրօրինակ զգացումներ ստանան»,- ասաց Կարինե Դավթյանը:

 

Նա փաստեց նաև, որ համագործակցությունը հետագայում ևս շարունակվելու է. «ԵՊՀ Իջևանի մասնաճյուղում ևս ցանկանում են ստեղծել Մշակույթի կենտրոն, մենք էլ պատրաստ ենք ամեն կերպ աջակցելու և սատարելու»:

 

Քնար Միսակյան

Այլ նորություններ
«ՀԱՄԱԼՍԱՐԱՆԸ ՀԱՅԱԳԻՏԱԿԱՆ ՀՈՒՄԱՆԻՏԱՐ ԿԵՆՏՐՈՆ Է, ՈՐԸ ԳԻՏՈՒԹՅԱՆ ՆՎԱՃՈՒՄՆԵՐԻՆ ՈՒ ՁԵՌՔԲԵՐՈՒՄՆԵՐԻՆ ԻՄԱՍՏ ԵՎ ՀՈՂԵՂԵՆ ՄԱՐՄԻՆ Է ՏԱԼԻՍ». ՏԻԳՐԱՆ ՄԱՆՍՈՒՐՅԱՆ
ԵՊՀ Շառլ Ազնավուրի անվան մշակույթի կենտրոնում տեղի ունեցավ հանդիպում հայ կոմպոզիտոր, Հայաստանի Հանրապետության ժողովրդական արտիստ Տիգրան Մանսուրյանի հետ, որի ընթացքում համալսարանի ռեկտոր Հովհաննես Հովհաննիսյանը մաեստրոյին հանձնեց ԵՊՀ ոսկե մեդալ:
ՀԱՄԱԼՍԱՐԱՆԱԿԱՆՆԵՐԸ ԴԻՏԵՑԻՆ «…ԵՎ ՆՈՐԻՑ ԳԱՐՈՒՆ» ՆԵՐԿԱՅԱՑՈՒՄԸ
ԵՊՀ Շառլ Ազնավուրի անվան մշակույթի կենտրոնի նախաձեռնությամբ «Համալսարանական» թատրոն-ստուդիայի սաները Ս. Սարգսյանի անվան համազգային թատրոնում դիտեցին ներկայացում, որի ավարտին տեղի ունեցավ քննարկում ներկայացման ստեղծագործական և դերասանական կազմի հետ: