27.03.2019 | 
Գիտություն
ԱՎՍՏՐԻԱՅՈՒՄ ՎԵՐԱՊԱՏՐԱՍՏՎԱԾ ԴԱՍԱԽՈՍՆ ԻՐ ՍՏԱՑԱԾ ԳԻՏԵԼԻՔՆԵՐԸ ՓՈԽԱՆՑՈՒՄ է ԳՈՐԾԸՆԿԵՐՆԵՐԻՆ
ԱՎՍՏՐԻԱՅՈՒՄ ՎԵՐԱՊԱՏՐԱՍՏՎԱԾ ԴԱՍԱԽՈՍՆ ԻՐ ՍՏԱՑԱԾ ԳԻՏԵԼԻՔՆԵՐԸ ՓՈԽԱՆՑՈՒՄ է ԳՈՐԾԸՆԿԵՐՆԵՐԻՆ
«ERASMUS+ PRINTeL» նախագծի դասախոսների վերապատրաստման շրջանակում ՏՏ կրթական և հետազոտական կենտրոնի ուսումնական նոր տեխնոլոգիաների լաբորատորիայի ղեկավար Արթուր Ավագյանը մասնակցել է Ավստրիայի Գրաց քաղաքի Յոաններում կիրառական գիտությունների համալսարանում տեղի ունեցած «Համակցված դասավանդում և ուսուցում» խորագրով դասընթացին և այժմ վերապատրաստում է իր գործընկերներին:

Մեզ հետ զրույցում Արթուր Ավագյանը փաստեց, որ Ավստրիայում տեղի ունեցած վերապատրաստման ծրագրի ընթացքում ծանոթացել և քննարկել են դասախոսի՝ որպես էլեկտրոնային մոդերատորի և ռեֆլեկտիվ իրականացնողի դերի  առանձնահատկությունները, ինչպես նաև դրա հետ կապված սեփական լսարանում կիրառվող մեթոդների յուրահատկությունները, որոնք էլ իր կողմից անցկացվող 5-օրյա վերապատրաստման դասընթացի շրջանակում կներկայացնի գործընկերներին:

 

Գործընկերների հետ առաջին հանդիպման ժամանակ Արթուր Ավագյանը խոսեց համակցված ուսուցման և դասավանդման մասին՝ փաստելով, որ տեխնոլոգիաների վրա հիմնված ուսուցումը ձգվում է զուտ «դեմառդեմ» ուսուցումից մինչև ամբողջովին առցանց ծրագրեր, և յուրաքանչյուր դասախոս ինքը պետք է որոշի, թե կոնկրետ որ հատվածում պետք է իր կուրսը կամ ծրագիրը լինի:

 

«Խառը կամ համակցված դասընթացի դեպքում ուսուցման ձևաչափերից ընտրում ենք այն մեթոդները, որոնք առավել արդյունավետ են: Այդ ուսուցմանն անցնելու դեպքում պետք է վերանայել նաև դրան աջակցելու համար անհրաժեշտ հարմարությունները»,- փաստեց Արթուր Ավագյանը:

Բանախոսը գործընկերներին ներկայացրեց նաև լսարանային, համակցված և առցանց դասընթացների հիմնական տարբերությունները, ապա միասին քննարկեցին առավելությունները և թերությունները:

 

Արթուր Ավագյանն ասաց, որ վերապատրաստման դասընթացի հետագա հանդիպումներում նախատեսվում է, որ կքննարկվեն դասախոսի՝ որպես էլեկտրոնային մոդերատորի աշխատանքները, կմանրամասնեն, թե ինչպես պետք է աշխատել ուսանողի հետ:

 

«Օրինակ՝ ուսանողի հետ աշխատելու համար առաջարկվում է 5 քայլից բաղկացած մի մոդել, որը հնարավորություն է տալիս մոտիվացնելու, ներգրավելու ուսուցողական միջավայր, ապա սոցիալականացնելու և, ըստ այդմ, օգնելու, որ ուսանողները տեղեկություններ փոխանակեն: Մոդելի 4-րդ քայլը նպաստում է, որ ուսանողն աստիճանաբար կարողանա վերահսկել իր ուսուցումը: Նա կդառնա գիտելիք գեներացնող համայնքի ինտեգրված անդամ ու կարժևորի իր դերն այդ խմբում: Իսկ վերջին քայլով նա արդեն կգնահատի իր անցած ճանապարհն ու կձգտի ավելի զարգանալ»,- պարզաբանեց Արթուր Ավագյանը:



Նրա հավաստմամբ, գործընկերներին ծանոթացնելու է թվային գործիքներին, որոնք կարելի է կիրառել ուսուցման գործընթացի ժամանակ, պատմելու է առցանց պորտֆոլիոների առկայության անհրաժեշտության մասին և փոխանցելու է առցանց դասախոսություններ պատրաստելու գործիքակազմի ու հնարավորությունների մասին գիտելիքներ:


 

«Վերապատրաստման դասընթացի ավարտին մասնակիցներից յուրաքանչյուրը պատրաստելու է ծրագիր, որով ներկայացնելու է, թե ինչ քայլեր և մեխանիզմներ են կիրառվելու հետագայում՝ համակցված ուսուցում կազմակերպելու համար»,- ասաց Արթուր Ավագյանը:

Քնար Միսակյան

Այլ նորություններ
ԵՊՀ ԴՈՑԵՆՏ ՀԱԿՈԲ ՀԱՐՈՒԹՅՈՒՆՅԱՆԻ ՀԵՐԹԱԿԱՆ ՀՈԴՎԱԾԸ «ՆՅՈՒԹԵՐ ՀԻՆ ԵՎ ՄԻՋՆԱԴԱՐՅԱՆ ՄԵՐՁՍԵՎԾՈՎՅԱՆ ՀՆԱԳԻՏՈՒԹՅԱՆ ԵՎ ՊԱՏՄՈՒԹՅԱՆ ՎԵՐԱԲԵՐՅԱԼ» ԳԻՏԱԿԱՆ ՀԱՆԴԵՍՈՒՄ
Երևանի պետական համալսարանի համաշխարհային պատմության ամբիոնի դոցենտ, պ.գ.դ. Հակոբ Հարությունյանն իր հերթական հոդվածն է հրատարակել «Նյութեր հին և միջնադարյան մերձսևծովյան հնագիտության և պատմության վերաբերյալ» հայտնի գիտական հանդեսի հերթական համարում:
«ԿԱՆԽԱՐԳԵԼԻՉ ՄԻՋՈՑԱՌՈՒՄՆԵՐԻ ԵՎ ԲՆԱՊԱՀՊԱՆԱԿԱՆ ԽՆԴԻՐՆԵՐԻ ԼՈՒԾՄԱՆ ՀԱՄԱՐ ԽՆԱՅԵԼ ՉԻ ԿԱՐԵԼԻ». ԱՐՄԵՆ ԹՌՉՈՒՆՅԱՆ
Ամբողջ աշխարհն այսօր պայքարում է նոր կորոնավիրուսի (COVID19) դեմ՝ իրականացնելով տարաբնույթ միջոցառումներ: Առողջապահության համաշխարհային կազմակերպության կողմից հայտարարված աշխարհավարակի պատճառ դարձած կորոնավիրուսով այսօր աշխարհում վարակված է ավելի քան 1 մլն մարդ: Հայաստանում նոր կորոնավիրուսային հիվանդության հաստատված ավելի քան 730 դեպք է գրանցվել: Երկրում հաստատված է արտակարգ դրություն: Ստեղծված իրավիճակի, իրականացվող միջոցառումների արդյունավետության և սպասվող քայլերի մասին զրուցել ենք ԵՊՀ կենսաքիմիայի, մանրէաբանության և կենսատեխնոլոգիայի ամբիոնի վարիչ, ՀՀ ԳԱԱ թղթակից անդամ, կենսաբ. գիտ. դոկտոր, պրոֆեսոր Արմեն Թռչունյանի հետ: