19.12.2020 | 
Հասարակություն
ԵՊՀ ԴՈՑԵՆՏ ԱՇՈՏ ԱԼԵՔՍԱՆՅԱՆԸ ՄԱՍՆԱԿՑԵԼ Է ԲԵԼԳՈՐՈԴՈՒՄ ԿԱԶՄԱԿԵՐՊՎԱԾ ԱՌՑԱՆՑ ՄԻՋԱԶԳԱՅԻՆ ՖՈՐՈՒՄԻՆ
ԵՊՀ ԴՈՑԵՆՏ ԱՇՈՏ ԱԼԵՔՍԱՆՅԱՆԸ ՄԱՍՆԱԿՑԵԼ Է ԲԵԼԳՈՐՈԴՈՒՄ ԿԱԶՄԱԿԵՐՊՎԱԾ ԱՌՑԱՆՑ ՄԻՋԱԶԳԱՅԻՆ ՖՈՐՈՒՄԻՆ
Բելգորոդում դեկտեմբերի 16-17-ը տեղի է ունեցել միջազգային ֆորում «Հանրային կառավարումը ԵԱՏՄ երկրներում» խորագրով:

Այն կազմակերպվել է Բելգորոդի պետական ազգային հետազոտական համալսարանի սոցիալական տեխնոլոգիաների և պետական ծառայության ամբիոնի ու Միջսահմանային համագործակցության և ինտեգրման ինստիտուտի համատեղ նախաձեռնությամբ:


Առցանց ֆորումը համախմբել էր հանրային կառավարման, եվրասիական ինտեգրման և միջազգային հարաբերությունների ոլորտների առաջատար գիտնականներին ու փորձագետներին տարբեր երկրներից (Բելառուս, Հայաստան, Ղազախստան, Ղրղզստան, Ռուսաստան և այլն):


Հայաստանից առցանց ֆորումին մասնակցում էին ԵՊՀ քաղաքական գիտության պատմության և տեսության ամբիոնի դոցենտ, քաղ. գիտ. դոկտոր Աշոտ Ալեքսանյանը և Գորիսի պետական համալսարանի պրոռեկտոր Թեհմինա Մարությանը:


Մասնակիցներին ողջունեց Տնտեսագիտության և կառավարման ինստիտուտի տնօրեն, սոց. գիտ. դոկտոր Վիկտոր Զախարովը: Սոցիալական տեխնոլոգիաների և պետական ծառայության ամբիոնի վարիչ, սոց. գիտ. դոկտոր Վիկտոր Սապրիկան նշեց, որ ֆորումն առաջին անգամ է անցկացվում, բայց հույս հայտնեց, որ նախագիծը հետագայում շարունակական կլինի:


Գորիսի պետական համալսարանի պրոռեկտոր Թեհմինա Մարությանն ընդգծեց ֆորումի անցկացման կարևորությունը ԵԱՏՄ տարածքում տարածաշրջանային գիտությունը միավորելու համար:


ԵՊՀ քաղաքական գիտության պատմության և տեսության ամբիոնի դոցենտ, քաղ. գիտ. դոկտոր Աշոտ Ալեքսանյանը հանդես եկավ «ՌԴ խաղաղապահ գործունեության ժամանակակից ռազմավարությունը Լեռնային Ղարաբաղում. կանխարգելման հնարավորությունները և զինված հակամարտությունների կարգավորման ուղիները» թեմայով զեկուցմամբ: Փորձագետը խոսեց խաղաղապահ գործունեության ուղղությունների մասին, որոնք կարևոր են ոչ միայն Ռուսաստանի, այլև ԱՊՀ երկրների համար, ինչպես նաև ընդգծեց ներկա փուլում ձևավորվող մեթոդներն ու ռազմավարությունները:

 

 


Օրվա ավարտին Վիկտոր Սապրիկան ֆորումի մասնակիցներին ներկայացրեց «ԵԱՏՄ անդամ երկրների հանրային կառավարման դպրոցների միջտարածաշրջանային ցանցը» նախագծի շրջանակում կատարված սոցիոլոգիական հետազոտության արդյունքները: Հետազոտության ընթացքում ուսումնասիրվել են ԵԱՏՄ անդամ երկրներում հանրային կառավարման հիմնական հասկացությունները, հանրային կառավարման մեջ հասարակական սեկտորի դերը, գիտակրթական համագործակցության արդյունավետությունը և այլն:

 

 

Դեկտեմբերի 17-ին ֆորումի շրջանակում անցկացվել է գործնական խաղ «Հանրային կառավարման մարմինների համակարգը» թեմայով, որին մասնակցել են Բելգորոդի պետական ազգային հետազոտական համալսարանի ուսանողներ, ինչպես նաև դասախոսներ, փորձագետներ ու ուսանողներ Հայաստանից, Բելառուսից, Ղազախստանից և Ղրղզստանից:


Խաղի ընթացքում թիմերի մասնակիցները մշակել և ներկայացրել են քաղաքական կուսակցությունների ծրագրեր, ազգային նախագծեր և անցկացրել են նախընտրական քարոզչություն: Մասնակիցներն ընտրել են նախագահ, քաղաքական կուսակցություններ և ընդունել են օրենքի նախագծեր:


Ֆորումն ավարտվել է «Հանրային կառավարումը թվային հասարակության մեջ. դեպի նոր սոցիալական պայմանագիր» խորագրով կլոր սեղանով:

Այլ նորություններ
«ՀԻՍՈՒՍ ՔՐԻՍՏՈՍԻ ԿԵՐՊԱՐԸ XX ԴԱՐԻ ԵՎ ԱՐԴԻ ՀԱՅ ԱՐՎԵՍՏՈՒՄ» ԳԻՐՔԸ ՀՈԳԵՎՈՐ ԱՐԺԵՔՆԵՐԻՆ ՄՈՏԵՆԱԼՈՒ ՆՈՐ ՈՒՂԵՆԻՇ
ՀՀ նկարիչների միության մեծ սրահում այսօր տեղի են ունեցել ԵՊՀ հայ արվեստի պատմության և տեսության ամբիոնի դոցենտ, արվեստագիտության թեկնածու Սաթենիկ Վարդանյանի «Հիսուս Քրիստոսի կերպարը XX դարի և արդի հայ արվեստում» գրքի շնորհանդեսը, ինչպես նաև հայ արդի նկարիչների թեմատիկ ստեղծագործությունների ցուցահանդեսը:
ՀԱՄԱԼՍԱՐԱՆԱԿԱՆՆԵՐՆ ԱՄԱՆՈՐԸ ԿԱՐՈՂ ԵՆ ԱՆՑԿԱՑՆԵԼ ԾԱՂԿԱՁՈՐԻ ՈԻՍՈԻՄՆԱԱՐՏԱԴՐԱԿԱՆ ԲԱԶԱՅՈՒՄ
Այս տարի ևս ԵՊՀ հիմնական աշխատակիցներն ու բոլոր ցանկացողներն իրենց ամանորյա տոները 31.12.2020-06.01.2021 թթ. ընկած ժամանակահատվածում կարող են անցկացնել Ծաղկաձորի ուսումնաարտադրական բազայում։