03.10.2018 | 
Հասարակություն
ԵՊՀ-ՈՒՄ ՏԵՂԻ ՈՒՆԵՑԱՎ ՀԱՆԴԻՊՈՒՄ ՍԵՎԻԼՅԱՅԻ «ԱԹԱԼԱՅԱ» ԹԱՏՐՈՆԻ ՆԵՐԿԱՅԱՑՈՒՑԻՉՆԵՐԻ ՀԵՏ
ԵՊՀ-ՈՒՄ ՏԵՂԻ ՈՒՆԵՑԱՎ ՀԱՆԴԻՊՈՒՄ ՍԵՎԻԼՅԱՅԻ «ԱԹԱԼԱՅԱ» ԹԱՏՐՈՆԻ ՆԵՐԿԱՅԱՑՈՒՑԻՉՆԵՐԻ ՀԵՏ
ԵՊՀ ռոմանագերմանական ֆակուլտետի ռոմանական բանասիրության ամբիոնն այսօր հյուրընկալել էր Սևիլյայի «Աթալայա» թատրոնի ղեկավարին և դերասաններին:

Հյուրերը Երևան են ժամանել «Հայֆեստ» միջազգային թատերական փառատոնին մասնակցելու համար, որի շրջանակում ներկայացրել են իսպանական գրականության գլուխգործոցներից մեկը՝ Ֆերնանդո դե Ռոխասի «Սելեստինա» ներկայացումը:

«Աթալայա» թատերախումբը Սևիլյայում գործող թատերախումբ է և արժանացել է բազմաթիվ միջազգային մրցանակների, այդ թվում նաև ստացել է թատրոնի ազգային մրցանակը: Թատերախումբն իր գործունեության ընթացքում հասցրել է ներկայանալ շուրջ 2200 ներկայացմամբ և հյուրընկալվել աշխարհի ավելի քան 500 քաղաքներում:

 

 

 Հյուրերը, որոնց թվում էր նաև «Աթալայա» թատրոնի տնօրեն Ռիկարդո Ինիեստան, ԵՊՀ էին ժամանել Ռոմանական բանասիրության ամբիոնի վարիչ Հասմիկ Բաղդասարյանի հրավերով:  Հանդիպում-քննարկման ժամանակ ներկաներն անդրադարձան մի շարք գեղարվեստական և սոցիալական թեմաների, խոսեցին  Ֆերնանդո դե Ռոխասի «Սելեստինա» ստեղծագործության գեղարվեստական արժեքի մասին:

 

Թատրոնի ղեկավար Ռիկարդո Ինիեստան նշեց, որ այս ստեղծագործության բացառիկ արժեքն այն է, որ վերջինիս արծարծած թեմաները, ինչպես օրինակ՝ կանանց իրավունքների և սոցիալական անհավասարության խնդիրները, հիմա էլ շարունակում են ակտուալ մնալ: Բացի դրանից՝ սրանք թեմաներ են, որոնք հարցի քննարկումը  տեղափոխում են նաև սոցիալական հարթակ՝ շոշափելով արդեն հասունացած սոցիալական խնդիրները:

Խոսելով այդ սոցիալական խնդիրների բարձրաձայնման կարևորության մասին՝ հյուրերը ներկայացրին նաև «Caravan Next» ծրագիրը: Ծրագրի հիմնական նպատակը հասարակության մեջ ինտեգրման խնդիր ունեցող մարդկանց լսելն ու տեսանելն է՝  թատրոնն օգտագործելով որպես կարևորագույն գործիք:

 

Ծրագրի շրջանակում կարևոր նշանակություն ունի նաև համայնքային թատրոնի ստեղծման գաղափարը, որը հնարավորություն է կտա բարելավվելու հասարակությունից օտարված կամ առանձնացված մարդկանց կյանքի որակը:

Վերջում հյուրերն առանձնահատուկ նշեցին, թե ինչքան կարևոր է ժամանակակից տարրերի ներմուծումը ներկայացման մեջ: Հատկապես կարևոր են  հագուստի, բեմական լույսի, լեզվի և լեզվական շեշտերի ճիշտ ընտրությունները:

Անի Պողոսյան

Այլ նորություններ
ԵՊՀ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏԻ ԵՐԵՔ ՈՒՍԱՆՈՂՆԵՐԸ՝ «ԼՐԱԳՐՈՂԱԿԱՆ ՄԵՆԱՄԱՐՏ» ՀԵՌՈՒՍՏԱՆԱԽԱԳԾԻ ՄԱՍՆԱԿԻՑՆԵՐ
ԵՊՀ ժուռնալիստիկայի ֆակուլտետի երեք ուսանողներ՝ Աննա Կոստանյանը, Էլեն Աղաջանյանը (4-րդ կուրս) և Ռիմա Գրիգորյանը (2-րդ կուրս), մասնակցել են Եվրոպական միության կողմից համաֆինանսավորվող «Տեղեկատվության մատչելիություն և հետաքննական լրագրություն առավել իրազեկված քաղաքացիների համար» ծրագրի շրջանակում իրականացվող «Լրագրողական մենամարտ» հեռուստանախագծին և հասել մինչև եզրափակիչ:
ՔՆՆԱՐԿՈՒՄ՝ ԲԱՐՁՐԱԳՈՒՅՆ ԿՐԹՈՒԹՅԱՆ ՀԻՄՆԱԽՆԴԻՐՆԵՐԻ, ՄԱՐՏԱՀՐԱՎԵՐՆԵՐԻ ԵՎ ԴՐԱՆՑ ՀՆԱՐԱՎՈՐ ԼՈՒԾՈՒՄՆԵՐԻ ՎԵՐԱԲԵՐՅԱԼ
ԵՊՀ Չարենցի անվան դահլիճում «Մեդիա կենտրոն»-ի նախաձեռնությամբ անցկացվեց «Բարձրագույն կրթության հիմնախնդիրները, առկա մարտահրավերներն ու դրանց հնարավոր լուծումները բարձրագույն կրթության զարգացման ռազմավարությունում» թեմայով քննարկում: