13.02.2018 | 
Կրթություն
ՀԱՆՐԱՊԵՏՈՒԹՅԱՆ ԼԱՎԱԳՈՒՅՆ ՈՒՍԱՆՈՂՆԵՐԸ ՊԱՐԳԵՎԱՏՐՎԵՑԻՆ
ՀԱՆՐԱՊԵՏՈՒԹՅԱՆ ԼԱՎԱԳՈՒՅՆ ՈՒՍԱՆՈՂՆԵՐԸ ՊԱՐԳԵՎԱՏՐՎԵՑԻՆ
Այսօր ԵՊՀ-ում տեղի ունեցավ «Լավագույն ուսանող» հանրապետական մրցույթի հաղթողների մրցանակների հանձնման հանդիսավոր արարողությունը:

Միջոցառմանը ներկա էին ՀՀ կրթության և գիտության նախարար Լևոն Մկրտչյանը, փոխնախարար Վահրամ Մկրտչյանը, ԵՊՀ ռեկտոր Արամ Սիմոնյանը, հայաստանյան մի շարք բուհերի ռեկտորներ և ուսանողներ:

 

Հյուրերին ողջունեց ռեկտոր Արամ Սիմոնյանը. «Ուրախալի է, որ մրցույթի արդյունքներն ամփոփվում են Մայր բուհում: Անկասկած, մենք ունենք հուսալի, առաջադեմ և խելացի ուսանողություն: Ուսանող, ով մեր պետության վստահության գրավականն է: Ազգի ճակատագիրը երիտասարդ քաղաքացու ձեռքում է, ու մենք պարտավոր ենք սատարելու և խրախուսելու նրան»:

 

ԿԳ նախարար Լևոն Մկրտչյան էլ նախ անդրադարձավ միջազգային կրթական ոլորտի արդի հիմնախնդիրներին, ինչպես նաև կրթության բնագավառում ներկայումս իրականացվող փոփոխություններին:

 

 

«Արդեն շատ գեղեցիկ ավանդույթ է դարձել այս մրցույթը: Շնորհակալություն եմ հայտնում բուհերի ղեկավար մարմիններին և պրոֆեսորադասախոսական կազմի ներկայացուցիչներին, քանի որ նրանց ջանքերով ստեղծվում է ոչ միայն գիտելիք ունեցող սերունդ, այլև ձևավորվում են պետության իսկական քաղաքացու հատկանիշներով օժտված անհատներ»,- նշեց նախարարը:

 

Ելույթներից հետո Լևոն Մկրտչյանը հավաստագրեր հանձնեց մրցանակակիր ուսանողներին՝ մաղթելով մասնագիտական նորանոր հաջողություններ, ձեռքբերումներ և հաղթանակներ:

   

Լավագույնները պարգևատրվեցին հավաստագրերով և ՀՀ ԿԳ նախարարի կողմից սահմանված մեկանգամյա անվանական կրթաթոշակներով՝ 1-ին տեղ՝ 400.000 դրամ, 2-րդ տեղ՝ 270.000 դրամ և 3-րդ տեղ՝ 200.000 դրամ:

 

«Աննկարագրելի զգացողություններ ունեմ: Ուրախ եմ, որ աշխատանքս գնահատվել է: Շնորհակալ եմ մրցույթի կազմակերպիչներին, քանի որ մրցանակը ոչ միայն խրախուսող է, այլև պարտավորեցնող»,- ասում է ԵՊՀ ռոմանագերմանական բանասիրության ֆակուլտետի արտասահմանյան գրականության բաժնի 2-րդ կուրսի մագիստրանտ Մարիամ Մարտիրոսյանը:

 

 

2017 թ.-ի «Լավագույն ուսանող» հանրապետական մրցույթի հաղթողներն են ՀՀ 16 բուհ ներկայացնող 7 տարբեր ոլորտների 41 ուսանողներ:

 

Մրցույթն անցկացվել է 2 փուլով՝ ներբուհական և հանրապետական (միջբուհական իրականացվող): Ուսանողները բակալավրի և մագիստրոսի կրթական ծրագրերով մրցել են հետևյալ ոլոտներում՝ բնագիտական (այդ թվում՝ մաթեմատիկական-տեղեկատվական և հեռահաղորդակցման տեխնոլոգիաներ), բժշկություն, հումանիտար գիտություններ, հասարակագիտություն, ճարտարագիտություն, հայագիտություն, մշակույթ-սպորտ:  

 

Հավելենք, որ մրցույթի հաղթողները որոշվում են հավաքած առավելագույն միավորների քանակի հիման վրա, մրցույթի հանձնաժողովի կողմից հաշվի է առնվում ներկայացված թեկնածուի ուսման առաջադիմությունը, գիտական աշխատանքներ կատարելու ունակությունը (բացառությամբ մշակույթ-սպորտ ոլորտի, որտեղ գնահատվում են ուսման մեջ մասնագիտական ձեռքբերումները՝ ցուցահանդեսներ, մրցույթներ և այլն), ինչպես նաև հասարակական ակտիվությունը:

Այլ նորություններ
ԵՊՀ ԴԱՍԱԽՈՍՆԵՐԻ ՀԱՄԱՐ ԱՆՑԿԱՑՎԵՑ ՀԱՄԱԼՍԱՐԱՆԻ ՄԻՋԱԶԳԱՅՆԱՑՄԱՆ ՔԱՂԱՔԱԿԱՆՈՒԹՅԱՆԸ  ՆՊԱՍՏՈՂ ԴԱՍԸՆԹԱՑ
Այսօր ԵՊՀ միջազգային համագործակցության վարչությունը ԵՊՀ 2016-2020 թթ. զարգացման ռազմավարական ծրագրի շրջանակում դասախոսների համար կազմակերպել էր դասընթաց, որի նպատակն է նպաստել համալսարանի միջազգայնացման քաղաքականությանը: Նշենք, որ դասընթացների ավարտից հետո մասնակիցներին կտրվի մեկ կրեդիտ։
«ԶՈՀԻ ՀՈԳԵԲԱՆՈՒԹՅՈՒՆՆ ԻՆՁ ՀԱՄԱՐ ՉԷ». ՀԱՐՑԱԶՐՈՒՅՑ ՄԱԳԻՍՏՐԱՆՏ ՆԵԼԻ ԱԲՐԱՀԱՄՅԱՆԻ ՀԵՏ
Հայոց ցեղասպանության առջև օրեցօր ծառացող մարտահրավերներն առավել պահանջված են դարձնում հարցին տիրապետող, բանիմաց երիտասարդ մասնագետներին: