11.06.2019 | 
Հասարակություն
ԵՊՀ ՈՒՍԱՆՈՂՆԵՐԻ «ՔԱՐԻՑ ԹՈՒՂԹ» ԳԱՂԱՓԱՐԸ՝ «BIG IDEA CHALLENGE» ԳԱՂԱՓԱՐՆԵՐԻ ՄՐՑՈՒՅԹԻ ՀԱՂԹՈՂՆԵՐԻ ՇԱՐՔՈՒՄ
ԵՊՀ ՈՒՍԱՆՈՂՆԵՐԻ «ՔԱՐԻՑ ԹՈՒՂԹ» ԳԱՂԱՓԱՐԸ՝ «BIG IDEA CHALLENGE» ԳԱՂԱՓԱՐՆԵՐԻ ՄՐՑՈՒՅԹԻ ՀԱՂԹՈՂՆԵՐԻ ՇԱՐՔՈՒՄ
ԵՊՀ ձեռներեցության զարգացման կենտրոնը Լոնդոնի Սիթի համալսարանի (City University) և Չենջսքուլի (Change School) հետ Երևանի պետական համալսարանում իրականացրեց Բարձրագույն կրթության ձեռներեցության «Ստեղծարար միտք» (Creative Spark) ծրագիրը:

«Ստեղծարար միտք» ծրագրի նպատակն է նպաստել ստեղծարար ձեռնարկատիրական կրթության զարգացմանը և աջակցել ծրագրի մասնակից երկրների՝ ներառյալ Հայաստանի, ուսումնական հաստատությունների միջև միջազգային համագործակցության ձևավորմանը:

Ծրագիրն իրականացվում է Բրիտանական խորհրդի կողմից Կենտրոնական Ասիայում (Ղազախստան, Ուզբեկստան, Ղրղստան), Հարավային Կովկասում (Ադրբեջան, Հայաստան և Վրաստան) և Ուկրաինայում:

Ծրագրի համակարգող Ռոզա Ալավերդյանը նշեց, որ մեկ տարվա ընթացքում 75 ուսանողներ և դասախոսներ հնարավորություն են ունեցել կատարելագործելու անգլերենի իմացությունը՝ դառնալով «Learn English Select» դասընթացի շահառուներ:

Ըստ Ռոզա Ալավերդյանի՝ ավելի քան 90 ուսանողներ ստացել են ձեռնարկատիրական գիտելիքներ և հմտություններ՝ մասնակցելով «Ստեղծարար ձեռներեցության» դասընթացներին, որոնք անցկացվել են Բրիտանական խորհրդի կողմից կազմակերպված «Ձեռնարկատիրական հմտություններ և դասավանդում» ծրագրի շրջանակում:



Այդ դասընթացի նպատակն էր մասնակիցներին տալ բիզնես գաղափար ձևավորելու, նորարարական տեխնոլոգիաներ մշակելու և կենսունակ բիզնես մոդելներ կազմելու հմտություններ, ինչպես նաև ստանալ մենթորների խորհրդատվություն:

Ինչպես նշեց Ռոզա Ալավերդյանը, նմանօրինակ դասընթացները կարևոր են, քանի որ անկախ ընտրած ոլորտից՝ ուսանողները ձեռք են բերում ձեռնարկատիրական հմտություններ և դրանք կիրառելու կարողություն:



«Այս ծրագիրը միջազգային փորձն ու ժամանակակից մոտեցումները ԵՊՀ ուսանողներին փոխանցելու համար հիանալի հարթակ էր»,- ասաց Ռ. Ալավերդյանը:

Նշենք, որ ծրագրի տրամաբանական շարունակությունն է «Big Idea Challenge» գաղափարների մրցույթը, որի տեղային փուլում հաղթող ճանաչված 10 տեսահոլովակների շարքում էր նաև ԵՊՀ ձեռներեցության զարգացման կենտրոնի թիմը՝ «Քարից թուղթ» գաղափարով:
Թիմի անդամներն են Քիմիայի ֆակուլտետի 3-րդ կուրսի ուսանողուհի Շուշաննա Վարդանյանն ու Եվրոպական լեզուների և հաղորդակցության ֆակուլտետի 4-րդ կուրսի ուսանողուհի Արաքսյա Առաքելյանը:



Նրանք թղթի ստացման այլընտրանքային տարբերակ են առաջարկում: Ըստ նրանց գաղափարի՝ կրաքարի օգտագործմամբ թղթի ստացումը չի վնասում բնությանը և քիչ ծախսատար է:

 

Պատրաստեց Մարի Ռաֆյանը

Այլ նորություններ
ԵՊՀ ԻՐԱՎԱԲԱՆԱԿԱՆ ԿԼԻՆԻԿԱՆ ՇՆՈՐՀԱՎՈՐԵԼ ԵՎ ՎԿԱՅԱԳՐԵՐ Է ՇՆՈՐՀԵԼ ԻՐ 20-ՐԴ ՏԱՐՎԱ ՇՐՋԱՆԱՎԱՐՏՆԵՐԻՆ
Իրավաբանական կլինիկան 2019-2020 ուսումնական տարում տոնում է իր 20-ամյակը։ Ինչպես նախորդ տարիներին, կլինիկան 20-րդ տարվա շրջանավարտներին ևս ճանապարհում է վկայագրերով, որոնք այս տարի ուսանողներին նախապես ուղարկվել էին փոստով։
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԹԻՄԸ ՀԱՂԹԵԼ Է ԱՐԲԻՏՐԱԺ ԽԱՂ-ՄՐՑՈՒՅԹՈՒՄ
ԵՊՀ իրավագիտության ֆակուլտետի թիմը մասնակցել ու հաղթող է ճանաչվել Հայաստանի ամերիկյան համալսարանի մեդիացիոն և արբիտրաժային կլինիկայի և ՀՀ արբիտրների ասոցիացիայի կողմից կազմակերպվող ամենամյա դատախաղ-մրցույթին, որը գրավոր եղանակով անցկացվել է հունիսի 19-30-ը։