25.04.2019 | 
Գիտություն
«ՍԱ ՀԵՏԱՔՐՔԻՐ ԵՎ ԽՈՐՀՐԴԱՆՇԱԿԱՆ ՍԿԻԶԲ Է». ՀՆԴԿԱՍՏԱՆԻ ԴԵՍՊԱՆԸ ԳՐՔԵՐ ՆՎԻՐԵՑ ԻՐԱՆԱԳԻՏՈՒԹՅԱՆ ԱՄԲԻՈՆԻՆ
«ՍԱ ՀԵՏԱՔՐՔԻՐ ԵՎ ԽՈՐՀՐԴԱՆՇԱԿԱՆ ՍԿԻԶԲ Է». ՀՆԴԿԱՍՏԱՆԻ ԴԵՍՊԱՆԸ ԳՐՔԵՐ ՆՎԻՐԵՑ ԻՐԱՆԱԳԻՏՈՒԹՅԱՆ ԱՄԲԻՈՆԻՆ
ԵՊՀ արևելագիտության ֆակուլտետի իրանագիտության ամբիոնն այսօր հյուրընկալել էր Հայաստանում Հնդկաստանի արտակարգ և լիազոր դեսպան Ն.Գ. պարոն Սանգվան Յոգեշվարին:

Հանդիպմանը ներկա էին դեսպանատան, ֆակուլտետի պրոֆեսորադասախոսական կազմի ներկայացուցիչներ:

Ողջունելով ներկաներին՝ Իրանագիտության ամբիոնի վարիչ Վարդան Ոսկանյանը նշեց, որ օրը նշանակալի է ֆակուլտետի համար, քանի որ նախատեսվում է զարգացնել հնդկագիտությունը՝ որպես արևելագիտության կարևոր ուղղություն:

«Բոլորս ենք տեղյակ, թե ինչպիսի նշանակալի և կարևոր դեր է ունեցել Հնդկաստանում հայ համայնքը, և ինչպիսի դեր են ունեցել հայերը Հնդկաստանն աշխարհին ներկայացնելու գործում»,- նշեց Վարդան Ոսկանյանը:



Ըստ բանախոսի՝ ֆակուլտետում հնդկագիտության զարգացումը, հնդկագիտական առարկաների դասավանդումը հետագայում կարող է նպաստել հայ ժողովրդի այդ դերակատարության վերականգնմանը:

Նշենք, որ դեսպանը երկրորդ անգամ էր այցելում ֆակուլտետ: Այցի նպատակը Հնդկաստանին նվիրված գրքերի առաջին խմբաքանակն Իրանագիտության ամբիոնին նվիրելն է:

Վարդան Ոսկանյանի խոսքով, հնդկաիրանական ուսումնասիրությունները դասական դիսցիպլին են եվրոպական մի շարք համալսարաններում, քանի որ լավ իրանագետ լինելու համար պետք է որոշ չափով նաև հնդկագետ լինել, օրինակ՝ հնագույն ձեռագրերն ուսումնասիրելիս անհրաժեշտ է տիրապետել նաև հնդկական սանսկրիտին:

Հայաստանում Հնդկաստանի արտակարգ և լիազոր դեսպան Ն.Գ. պարոն Սանգվան Յոգեշվարը նշեց, որ նախորդ հանդիպումների ժամանակ արդյունավետ քննարկումներից հետո այս միջոցառումը հնդկագիտական կենտրոն բացելու ուղերձ է:



Դեսպանը նշեց, որ ծրագրի նպատակն է Հնդկաստանի մասին համապարփակ տեղեկատվություն հաղորդող նյութերի տրամադրումը հայ ուսումնասիրողներին: Այս նպատակով գրքերի խմբաքանակ է նվիրվել նաև «Զանգակ» գրատանը, «Հայ-հնդկական բարեկամություն» ՀԿ-ին և «Մխիթար Սեբաստացի» կրթահամալիրին:

Արևելագիտության ֆակուլտետի դեկան, պրոֆեսոր Ռուբեն Մելքոնյանը, ուրախություն հայտնելով համագործակցության համար, ասաց. «Արևելագիտության ֆակուլտետում՝ Իրանագիտության ամբիոնում, մենք դնում ենք այն հիմքերը, որոնց վրա կառուցվելու է արևելագիտության կարևոր ուղղություններից մեկը՝ հնդկագիտությունը: Իմ վստահությունը հիմնված է այն պարզ իրողության վրա, որ Իրանագիտության ամբիոնն ունի այն ներուժն ու կազմակերպչական հմտությունները, որոնք հնարավորություն կտան ոչ միայն հիմնելու հնդկագիտության ուսումնասիրության կենտրոն, այլև տանելու այն զարգացման ուղով»:

Նա նշեց, որ մեծ պատիվ է հնարավորություն ունենալ ուսումնասիրելու հնագույն քաղաքակրթություններից մեկի լեզուն, հարուստ մշակույթն ու պատմությունը:
Մեջբերելով ՀՀ նախագահի խոսքերը, որոնք հնչել էին ֆակուլտետի 50-ամյակին նվիրված միջոցառմանը, Ռուբեն Մելքոնյանը նշեց, որ Հայաստանի քաղաքական ղեկավարությունը և գիտական հանրույթը միակարծիք են և համագործակցում են այս հարցի վերաբերյալ:

«Սա հետաքրքիր ու խորհրդանշական սկիզբ է: Այս լավ հիմքի վրա մենք վստահորեն կկարողանանք զարգացնել այս ուղղությունը»,- ամփոփեց Ռ. Մելքոնյանը:

Ելույթներից հետո դեսպանը մանրամասնորեն ներկայացրեց իր նվիրած գրքերը:

Այլ նորություններ
ԵՊՀ-ՈՒՄ ՊԱՀՊԱՆՎԱԾ ԳՐԱՆՑԱՄԱՏՅԱՆԸ՝ ԳԻՏԱԿԱՆ ԱՌԱՋԻՆ ԱՍՏԻՃԱՆՆԵՐԻ ՇՆՈՐՀՄԱՆ ՎԿԱՅԱԳԻՐ
ԵՊՀ-ում պահպանվում է թեկնածուական և դոկտորական ատենախոսությունների պաշտպանությունների վերաբերյալ տեղեկությունների առաջին գրանցամատյանը, ըստ որի՝ թեկնածուական ատենախոսության առաջին պաշտպանությունը տեղի է ունեցել 1938 թվականին, իսկ դոկտորական ատենախոսության պաշտպանությունը՝ 1943 թվականին:
«ՑԱՎՈՔ, ԱՅԺՄ ՀԱՄԱԼՍԱՐԱՆՆԵՐԸ ԵՎՍ ՇԱՐԺՎՈՒՄ ԵՆ ԴՊՐՈՑԻ ՕՐԻՆԱԿՈՎ, ԱՅՍԻՆՔՆ` ՄԵՆՔ ՄԱՐԴՈՒՆ ՍՈՎՈՐԵՑՆՈՒՄ ԵՆՔ ՈՉ ԹԵ ՄՏԱԾԵԼ, ԱՅԼ ԳՈՐԾԻՔ ԿԻՐԱՌԵԼ, ԲԱՅՑ ԳՈՐԾԻՔ ՍՏԵՂԾԵԼ ՉԵՆՔ ՍՈՎՈՐԵՑՆՈՒՄ». ԴԱՎԻԹ ՀԱՅՐԱՊԵՏՅԱՆ
ԵՊՀ փիլիսոփայության և հոգեբանության ֆակուլտետի ընդհանուր հոգեբանության ամբիոնի դոցենտ Դավիթ Հայրապետյանի հետ խոսել ենք ստեղծարարության (կրետիվության) զարգացման մեթոդների, հիմնախնդիրների և դպրոցի անհրաժեշտության մասին: