17.07.2019 | 
Կրթություն
ԵՊՀ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՇՐՋԱՆԱՎԱՐՏՆԵՐԸ ՍՏԱՑԱՆ ԻՐԵՆՑ ԴԻՊԼՈՄՆԵՐԸ
ԵՊՀ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՇՐՋԱՆԱՎԱՐՏՆԵՐԸ ՍՏԱՑԱՆ ԻՐԵՆՑ ԴԻՊԼՈՄՆԵՐԸ
ԵՊՀ սև շենքի դահլիճում այսօր տեղի է ունեցել Տնտեսագիտության և կառավարման ֆակուլտետի 2018-2019 ուստարվա մագիստրատուրայի և բակալավրիատի շրջանավարտների դիպլոմների հանձնման հանդիսավոր արարողությունը:

Բացի ֆակուլտետի պրոֆեսորադասախոսական կազմից՝ միջոցառմանը ներկա էին նաև ՀՀ պետական եկամուտների կոմիտեի նախագահ Դավիթ Անանյանը, ԵՊՀ շրջանավարտներ ՀՀ վարչապետի խորհրդական Մեսրոպ Առաքելյանը և ՀՀ ԱԺ ֆինանսավարկային և բյուջետային հարցերի մշտական հանձնաժողովի անդամ Եղիշե Սողոմոնյանը, ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանը:


Միջոցառման սկզբում ֆակուլտետի դեկան Հայկ Սարգսյանը ողջունեց ներկաներին ու ասաց, որ իրենց ֆակուլտետը շուրջ երեք տասնյակ մասնագիտություններ է ուսուցանում, և ֆակուլտետի պատրաստած կադրերից շատերը բարձր պաշտոններ են զբաղեցնում թե՛ պետական կառույցներում, թե՛ միջազգային հարթակներում, թե՛ գիտական աշխարհում և թե՛ բիզնեսում։



«Բարեկեցիկ հասարակության, արդյունավետ տնտեսության համար պետք են լավ մասնագետներ»,- ասաց Հայկ Սարգսյանը և շնորհավորեց բոլոր շրջանավարտներին՝ մաղթելով նրանց գտնել իրենց ուղին։

ՀՀ ՊԵԿ նախագահ Դավիթ Անանյանն իր ողջույնի խոսում նշեք, որ միջոցառմանը ներկա լինելու հրավերն ընդունել է ուրախությամբ և միանում է բոլոր շնորհավորանքներին։



«Հանրապետության առջև կանգնած են բազում մարտահրավերներ, բայց դրանցից ամենակարևորը գիտելիքի ու արհեստավարժության մարտահրավերն է։ Հիմա գիտելիքի և արհեստավարժության պակաս կա։ Շնորհակալ եմ, որ այստեղ եք ու ձեր ներկայությամբ հույս եք ներշնչում ապագայի հանդեպ»,- իր շնորհավորական խոսքը եզրափակեց ՀՀ ՊԵԿ նախագահը։

Տնտեսագիտության և կառավարման ֆակուլտետի շրջանավարտներին շնորհավորեց նաև ԵՊՀ հումանիտար և հասարակագիտական մասնագիտությունների գծով պրոռեկտոր Էլինա Ասրիյանը։



«Ես վստահ եմ, որ համալսարանը ձեզ զինել է արդիական գիտելիքներով, հմտություններով և կարողություններով: Ես հույս ունեմ, որ դուք այդ գիտելիքները, հմտություններն ու կարողությունները կծառայեցնեք ի շահ հանրությանը, Հայաստանին: Մաղթում եմ՝ այն արժեհամակարգը, որ ձևավորել է համալսարանը ձեր ուսումնական տարիներին, ձեզ բարեկեցիկ դարձնի, ձևավորի և՛ անձնական, և՛ հոգեբանական բարեկեցություն: Շնորհավորում եմ բոլորիդ»,- ասաց պրոռեկտոր Է. Ասրիյանը:

Շնորհավորական խոսքերից հետո Տնտեսագիտության և կառավարման ֆակուլտետի 2018-2019 ուստարվա բակալավրիատի և մագիստրատուրայի շրջանավարտները ստացան իրենց դիպլոմները։

Այլ նորություններ
ՏԵՍԱԿԱՆ ԳԻՏԵԼԻՔՆԵՐԸ ՎԵՐԱԾՎՈՒՄ ԵՆ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ․ «ՏՕՊԱՍ» ԾՐԱԳՐԻ ՀԵՐԹԱԿԱՆ ԽՈՐՀՐԴԱԿՑՈՒԹՅՈՒՆԸ ԵՊՀ-ՈՒՄ
Երևանի պետական համալսարանի տնտեսագիտության և կառավարման ֆակուլտետում այսօր տեղի է ունեցել «ՏՕՊԱՍ»-ի (TOPAS- From Theoretical-Oriented to Practical education in Agrarian Studies) «Տեսական ուղղվածությունից գործնական կրթությանը նվիրված Ագրարային կրթության» ծրագրի հերթական խորհրդակցությունը։
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։