11.11.2019 | 
Հասարակություն
ԱՌԱՎԵԼ ԱՆՎՏԱՆԳ ԵՎ ԷԿՈԼՈԳԻԱՊԵՍ ՄԱՔՈՒՐ. ՔԻՄԻԱՅԻ ԴԵՐԸ ԱՐՏԱԴՐՈՒԹՅԱՆ ՏԱՐԲԵՐ ՈԼՈՐՏՆԵՐՈՒՄ
ԱՌԱՎԵԼ ԱՆՎՏԱՆԳ ԵՎ ԷԿՈԼՈԳԻԱՊԵՍ ՄԱՔՈՒՐ. ՔԻՄԻԱՅԻ ԴԵՐԸ ԱՐՏԱԴՐՈՒԹՅԱՆ ՏԱՐԲԵՐ ՈԼՈՐՏՆԵՐՈՒՄ
ԵՊՀ Սարգիս և Մարի Իզմիրլյանների անվան գրադարանի նախասրահում այսօր մեկնարկել է «Քիմիան արտադրությունում 2019» խորագրով եռօրյա ցուցահանդեսը:

Նոյեմբերի 11-13-ն անցկացվող ցուցահանդեսը կազմակերպվել է ԵՊՀ քիմիայի ֆակուլտետի ուսանողների և երիտասարդ գիտնականների նախաձեռնությամբ:

 

Մեզ հետ զրույցում ֆակուլտետի 4-րդ կուրսի ուսանող Վլադիմիր Վարդապետյանն ասաց, որ միջոցառման նպատակն է հանրամատչելի կերպով հանրությանը ներկայացնել քիմիայի դերը կյանքում, մասնավորապես՝ արտադրության տարբեր ոլորտներում, ինչպես նաև դիմորդներին ուղղորդել մասնագիտության ընտրության հարցում:

 

«Ցուցադրությանն իրենց աշխատանքներն են ներկայացնում մեր ֆակուլտետի ուսանողները, ինչպես նաև գիտահետազոտական տարբեր ինստիտուտների ներկայացուցիչներ: Հուսով ենք՝ այս միջոցառմամբ կարող ենք ցույց տալ հանրությանը, որ բնական գիտությունների միջոցով մենք կարող ենք հասնել ավելիին՝ լուծելով տնտեսական, էկոլոգիական և կենցաղային խնդիրներ»,- ասաց Վլադիմիր Վարդապետյանը:

 

 

Ի դեպ, ցուցադրությանը ներկայացված են Վլադիմիր Վարդապետյանի և ֆակուլտետի 4-րդ կուրսի ուսանողուհի Աստղիկ Գրիգորյանի կողմից աճեցված բյուրեղները, որոնք արդեն գտել են իրենց կիրառությունը զարդերի մեջ: Աստղիկ Գրիգորյանն ասաց, որ բյուրեղները դրվել են էմալների մեջ, որոնք պատրաստվում են սոճու խեժից: Վլադիմիր Վարդապետյանն էլ տեղեկացրեց, որ այս պահին Ֆրանսիայում գործում է կազմակերպություն, որը, կիրառելով իրենց տեխնոլոգիան, արտադրում է զարդեր:

 


Քիմիայի ֆակուլտետի ՈՒԳԸ նախագահ Շուշաննա Վարդանյանը ցուցադրությանը ներկայացնում է էկոլոգիապես մաքուր և անվտանգ եղանակով թղթի արտադրությունը, որը, նրա փոխանցմամբ, օգուտ կտա երկրին տնտեսական և էկոլոգիական տեսանկյունից:

 

«Ես ներկայացնում եմ, թե ինչպես կարելի է քարից էկոլոգիապես և անվտանգ կերպով թղթի այլընտրանք ստանալ: Հումքի համար ընտրել ենք կրաքարը՝ կալցիումի կարբոնատը, իսկ որպես մյուս բաղադրիչ՝ կիրառել ենք բարձր ճնշման պոլիէթիլենը: Ստացված թուղթը կարելի է անվերջ վերամշակել, ինչը նշանակում է, որ այն ավելի մատչելի է»,- հավաստիացրեց Շուշաննա Վարդանյանը՝ հավելելով, որ այդպիսով կարելի է չվնասել բնությանը՝ չկտրելով ծառերը և վերամշակելով պլաստիկե թափոնները:

 

 

«Քիմիան արտադրությունում 2019» խորագրով եռօրյա ցուցահանդեսին ներկայացվում են նաև ջրի ախտահանման անվտանգ եղանակ, ոչ պիտանի անվադողերի վերամշակում՝ նոր արտադրական հումքի ստացմամբ, հեղուկ պարարտանյութերի, անվտանգ տեխնիկական մաքրող և լվացող նյութերի արտադրություն, կոսմետիկ օճառներ՝ պատրաստված դեղաբույսերի յուղերից և այլն:

 

Հիշեցնենք, որ ցուցադրությունը տեղի է ունենալու մինչը նոյեմբերի 13-ը, որը բաց է հանրության համար:

 

Քնար Միսակյան

 


 

Այլ նորություններ
«ՀԱՄԱԼՍԱՐԱՆԸ ՀԱՅԱԳԻՏԱԿԱՆ ՀՈՒՄԱՆԻՏԱՐ ԿԵՆՏՐՈՆ Է, ՈՐԸ ԳԻՏՈՒԹՅԱՆ ՆՎԱՃՈՒՄՆԵՐԻՆ ՈՒ ՁԵՌՔԲԵՐՈՒՄՆԵՐԻՆ ԻՄԱՍՏ ԵՎ ՀՈՂԵՂԵՆ ՄԱՐՄԻՆ Է ՏԱԼԻՍ». ՏԻԳՐԱՆ ՄԱՆՍՈՒՐՅԱՆ
ԵՊՀ Շառլ Ազնավուրի անվան մշակույթի կենտրոնում տեղի ունեցավ հանդիպում հայ կոմպոզիտոր, Հայաստանի Հանրապետության ժողովրդական արտիստ Տիգրան Մանսուրյանի հետ, որի ընթացքում համալսարանի ռեկտոր Հովհաննես Հովհաննիսյանը մաեստրոյին հանձնեց ԵՊՀ ոսկե մեդալ:
ԵՊՀ ՈՒՍԱՆՈՂՆԵՐԸ ՄՇՏԱՊԵՍ ՏԵՂԵԿԱՑՎԱԾ ԵՆ ԱՇԽԱՏԱՇՈՒԿԱՅԻ ԱՌԱՋԱՐԿՆԵՐԻՑ
ԵՊՀ ինֆորմատիկայի և կիրառական մաթեմատիկայի ֆակուլտետի կոնֆերենս դահլիճում տեղի ունեցավ «CV կազմելու և գործատուին ներկայանալու հմտություններ» խորագրով դասընթաց, որի ավարտին ուսանողները փոխանցեցին իրենց տվյալները՝ հետագայում աշխատանքի առաջարկների վերաբերյալ պարբերաբար տեղեկատվություն ստանալու նպատակով: