17.03.2018 | 
Ուսանողական
«ԵՐԻՏԱՍԱՐԴ ՄԻՋԱԶԳԱՅՆԱԳԵՏՆԵՐ» ՆՈՐ ԱԿՈՒՄԲԸ ԿԳՈՐԾԻ ԵՊՀ-ՈՒՄ ԵՎ ԵՊՀ-ԻՑ ԴՈՒՐՍ
«ԵՐԻՏԱՍԱՐԴ ՄԻՋԱԶԳԱՅՆԱԳԵՏՆԵՐ» ՆՈՐ ԱԿՈՒՄԲԸ ԿԳՈՐԾԻ ԵՊՀ-ՈՒՄ ԵՎ ԵՊՀ-ԻՑ ԴՈՒՐՍ
ԵՊՀ միջազգային հարաբերությունների ֆակուլտետում փետրվարի 28-ից գործում է «Երիտասարդ միջազգայնագետներ» ակումբը: Ուսանողական նոր ակումբի նպատակների, գործունեության և հետագա անելիքների մասին զրուցել ենք հիմնադիր անդամ Անահիտ Ղազարյանի հետ:

- Անահի՛տ, ինչպե՞ս որոշեցիք հիմնել այս ակումբը:

- Ֆակուլտետում ժամանակ առ ժամանակ միջոցառումներ էին իրականացվում, որոնց կազմակերպչական հարցերում մի խումբ ուսանողներ միշտ մասնակցություն էին ունենում: Մի օր էլ ֆակուլտետում բաց դռների օր էր, հյուրեր ունեինք: Այդ նույն խմբով տեսապատկերի միջոցով ներկայացում և միջոցառում էինք պատրաստել, որին ներկա էր նաև մեր ֆակուլտետի դեկան Գեղամ Պետրոսյանը: Միջոցառման ավարտից հետո նա մեր խմբին խոստացավ, որ այսուհետ միշտ կաջակցի մեզ: Հենց այդ ժամանակ միտք  ծագեց կենտրոնացնել այն ուսանողների ուժերը, որոնք պատրաստ են և ցանկություն ունեն դասերից դուրս աշխատելու, իհարկե, ի շահ մասնագիտությանը: Պարզվեց, որ նման ուսանողների թիվը մեր ֆակուլտետում շատ է և գնալով ավելանում է: Ես կազմեցի ծրագիր և ֆակուլտետի գիտխորհրդի նիստում հանդես եկա ակումբ ստեղծելու առաջարկությամբ: Ծրագիրս հավանության արժանացավ:

 

- Որո՞նք են ակումբի նպատակները:


- Մեր ակումբի նպատակներն են ուսանողների համար արդյունավետ ժամանցի ապահովումը, նրանց քաղաքական գիտակցության բարձրացումը, արտալսարանային ուսուցման միջոցով մասնագիտական որակների բարելավումը, ինչպես նաև տարբեր սերունդների մասնագիտական փորձի փոխանակման համար հարթակի ստեղծումը:

 

- Ակումբի գործունեության շրջանակում ի՞նչ միջոցառումներ եք հասցրել իրականացնել և ի՞նչ եք պատրաստվում կազմակերպել առաջիկայում:


- Մեր առաջին ծրագիրը սումգայիթյան ջարդերի 30-րդ տարելիցի կապակցությամբ Ծիծեռնակաբերդի հուշահամալիր այցելությունն էր, որի շրջանակում Սումգայիթի զոհերի հիշատակը հավերժացնող խաչքարի մոտ ծաղկեպսակ դրեցինք, եղանք նաև Ցեղասպանության թանգարանում: Միջոցառմանը ներկա էին մեր ֆակուլտետի դեկանը, շուրջ 300 ուսանողներ, ինչպես նաև հրավիրել էինք ՀՀ ԱԳՆ միջազգային կազմակերպությունների վարչության պետ Վահրամ Կաժոյանին: Առաջիկայում նախատեսում ենք ֆակուլտետի ՈՒԳԸ-ի հետ կազմակերպել գիտաժողով՝ նվիրված Առաջին Հանրապետության 100-ամյակին:

 

- Համագործակցո՞ւմ եք որևէ կառույցի կամ կազմակերպության հետ:


- Դեռևս համագործակցում ենք միայն ֆակուլտետի ՈՒԳԸ-ի հետ: Առաջիկայում պլանավորում ենք կապեր հաստատել այլ բուհերի միջազգայնագետների, ինչպես նաև միջազգային կառույցների հետ: Կարծում եմ՝ համատեղ հետաքրքիր միջոցառումներ կիրականացնենք:

  

- Ի՞նչ է պետք ձեր շարքերը համալրելու համար:


- Այժմ ունենք 520 գրանցված անդամներ: Մեզ միանալու համար պետք է ունենալ լավ գաղափարներ և մոտիվացիա: Ճիշտ է, մեր ակումբի կանոնադրությունը դեռևս վերջնականապես պատրաստ չէ, բայց յուրաքանչյուր երկուշաբթի անցկացնում ենք նիստեր, որոնց ընթացքում քննարկում ենք մեր հետագա անելիքները: Այն մասնակիցները, որոնք պարբերաբար քննարկումներին չեն ներկայանում, միանգամից հեռացվում են: Մեր շարքերը համալրված են խելացի և տաղանդավոր ուսանողներով, ես հուսով եմ, որ առաջիկայում  էլ ավելի մեծ թվով ուսանողներ կմիանան մեզ:

 

Քնար Միսակյան

Այլ նորություններ
ԵՊՀ ՖՐԱՆԿՈՖՈՆՆԵՐԻ ԱԿՈՒՄԲՆ ԱՅՍՕՐՎԱՆԻՑ ՊԱՇՏՈՆԱՊԵՍ Է ԳՈՐԾԵԼՈՒ
Այսօր ԵՊՀ Չարենցի անվան դահլիճում տեղի ոնեցավ միջոցառում, որը նվիրված էր ԵՊՀ ֆրանկոֆոնների ակումբի պաշտոնական բացմանը:
«ՄԵՐ ՀԱՍԱՐԱԿՈՒԹՅԱՆ ԱՄԵՆԱՄԵԾ ԹԵՐՈՒԹՅՈՒՆՆԵՐԻՑ ԵՆ ԵՐԻՏԱՍԱՐԴՈՒԹՅԱՆ ԱՆԿԱԶՄԱԿԵՐՊՎԱԾՈՒԹՅՈՒՆԸ ԵՎ ՀԵՂԻՆԱԿԱՎՈՐ  ԼԻԴԵՐՆԵՐԻ ԲԱՑԱԿԱՅՈՒԹՅՈՒՆԸ». ԵՊՀ ՌԵԿՏՈՐ ԱՐԱՄ ՍԻՄՈՆՅԱՆԸ ՀԱՆԴԻՊԵՑ ՈՒՍԱՆՈՂՆԵՐԻ ՀԵՏ
ՈւԽ նախագահության, ՈՒԳԸ ղեկավար կազմի, ինչպես նաև ուսանողական այլ հանձնաժողովների ներկայացուցիչների հետ պարբերաբար կազմակերպվող հանդիպումների հիմնական նպատակն է համալսարանի ղեկավարի հետ քննարկել ուսանողությանն անհանգստացնող խնդիրները, ներկայացնել առաջարկներ ու տալ համապատասխան լուծումներ: