20.12.2018 | 
Կրթություն
ԱՄՓՈՓՎԵՑԻՆ ԵՐԻՏԱՍԱՐԴ ԳԻՏՆԱԿԱՆՆԵՐԻ ՆՈՐԱՐԱՐԱԿԱՆ ԳԱՂԱՓԱՐՆԵՐԻ ՄՐՑՈՒՅԹԻ ԱՐԴՅՈՒՆՔՆԵՐԸ
ԱՄՓՈՓՎԵՑԻՆ ԵՐԻՏԱՍԱՐԴ ԳԻՏՆԱԿԱՆՆԵՐԻ ՆՈՐԱՐԱՐԱԿԱՆ ԳԱՂԱՓԱՐՆԵՐԻ ՄՐՑՈՒՅԹԻ ԱՐԴՅՈՒՆՔՆԵՐԸ
Կենսաբանության գիտահետազոտական ինստիտուտի կողմից հայտարարված նորարարական գաղափարների մրցույթի արդյունքներն ամփոփվեցին այսօր:

Նշենք, որ նորարարական գաղափարների մրցույթը հայտարարվել էր նոյեմբերին, որին ուսանողները և երիտասարդական խմբերը ներկայացրել էին 8 նորարարական գաղափար:

 

Նախապես ներկայացված հայտերից ընտրվել էին 5-ը. մանրէների միջոցով որոշ կենսավառելիքների ստացումը սուրճի թափոններից, կենսահանքարդյունաբերությունը՝ որպես պոչամբարների վերամշակման նոր ուղի Հայաստանում, հալվեի (aloe sp.) հյութի խթանող ազդեցության ուսումնասիրությունը ռուկոլաի (eruca vesicaria) սերմերի ծլունակության և աճի վրա, սնկային ծագման կենսաբանորեն ակտիվ միացությունների հավելումերով ըմպելիքների պատրաստում, կենսաջրածնի արտադրությունը բակտերիաների միջոցով տարբեր արտադրական թափոններից:

 

Միջոցառմանը մասնակցում էին պրոռեկտորներ Գեղամ Գևորգյանը, Ռուբեն Մարկոսյանը, Կենսաբանության ֆակուլտետի դեկան Էմիլ Գևորգյանը,  Կենսաբանության գիտահետազոտական ինստիտուտի տնօրեն Ալեքսանդր Եսայանը, փոխտնօրեն Կարեն Թռչունյանը, դասախոսներ և ուսանողներ:

 

Հաղթող ուսանողները և երիտասարդական խմբերը ներկայացրեցին իրենց նորարակական գաղափարները, որից հետո ստացան խրախուսական նվերներ: 

 

 

 

Ալեքսանդր Եսայանը նշեց, որ մրցույթի նպատակն է խրախուսել ուսանողների նորարարական գաղափարները, իսկ հետագայում աջակցել դրանք իրականացնելու համար: 

 

Գեղամ Գևորգյանը, կարևորելով նմանատիպ մրցույթները, ասաց, որ Կենսաբանության ֆակուլտետում ուսանում են ստեղծագործող և նորարարական գաղափարներ ունեցող ուսանողներ:

Ռուբեն Մարկոսյանը նույնպես կարևորեց այս մրցույթը և հայտնեց, որ բուհի ղեկավարությունը կփորձի աջակցել երիտասարդների նորարարական գաղափարների իրականացմանը: 

 

 

 

Կարեն Թռչունյանը մեզ հետ զրույցում նշեց, որ կիրառական նշանակություն ունեցող այս մրցույթն անցկացվել է երկու փուլով. «Առաջին փուլում ընտրված գաղափարները՝ ըստ ուղղվածության, ունեցել են իրենց ղեկավարները, իսկ արդեն երկրորդ փուլում ընտրվել են մրցույթի հաղթողները: Այս մրցույթն օգնում է ուսանողներին, որ իրենց տեսական գիտելիքները կիրառեն գործնականում»:

 

Կենսաբանության ֆակուլտետի դեկան Էմիլ Գևորգյանի խոսքով, մրցույթը կկրի շարունակական բնույթ. «Մենք ցանկանում ենք, որ ուսանողները ոչ միայն դասընթացներին մասնակցեն, այլև նոր գաղափարներ առաջարկեն, իսկ մենք հնարավորինս կնպաստենք դրանք իրագործելու համար»:

 

Նադեժդա Տեր-Աբրահամյան

 

Այլ նորություններ
ԵՊՀ-ՈՒՄ ԴԱՍԵՐԸ ՄԵԿՆԱՐԿԵԼՈՒ ԵՆ ՓԵՏՐՎԱՐԻ 11-ԻՑ
2018-2019 ուստարվա 2-րդ կիսամյակի առկա ուսուցման ուսումնական պարապմունքները սկսվելու են փետրվարի 11-ից, իսկ հեռակա ուսուցման ուսումնական պարապմունքները՝ մարտի 11-ից:
ԵՊՀ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏՈՒՄ ԿԻՐԱՌՎՈՒՄ ԵՆ ՈՒՍՈՒՄՆԱՌՈՒԹՅԱՆ ԺԱՄԱՆԱԿԱԿԻՑ ՄԻՋՈՑՆԵՐ
Երևանի պետական համալսարանում «Moodle» էլեկտրոնային ուսուցման համակարգի ներդրման առաջին քայլերն արվել են ՏՏ կրթական և հետազոտական կենտրոնի կողմից դեռևս 2008 թվականին: Առաջին առցանց դասընթացները կենտրոնի աշխատակիցների կողմից հարթակում տեղադրվել են դեռևս 2009-2010 թվականներին: