18.12.2019 | 
Ուսանողական
«ԽՈՍԻ՛Ր, ԹԵ ԿԱՐՈՂ ԵՍ». ՀՐԱՊԱՐԱԿԱԽՈՍՈՒԹՅԱՆ ՄՐՑՈՒՅԹ ԵՊՀ-ՈՒՄ
«ԽՈՍԻ՛Ր, ԹԵ ԿԱՐՈՂ ԵՍ». ՀՐԱՊԱՐԱԿԱԽՈՍՈՒԹՅԱՆ ՄՐՑՈՒՅԹ ԵՊՀ-ՈՒՄ
ԵՊՀ միջազգային հարաբերությունների ֆակուլտետի ՈՒԽ-ն կազմակերպել է «Խոսի՛ր, թե կարող ես» խորագրով հրապարակախոսության մրցույթ, որի հաղթողները որոշվել են այսօր:

Արդեն երկրորդ անգամ անցկացվող հրապարակախոսության մրցույթի նպատակը մասնակիցներին ինքնադրսևորվելու և հռետորական հմտությունները զարգացնելու հարթակ տրամադրելն է: Մեզ հետ զրույցում միջոցառման կազմակերպիչ Քերոբ Խաչատրյանը պատմեց, որ մրցույթի անցկացման գաղափարը ծագել է քննարկման արդյունքում, երբ ուսանողներով հասկացել են, որ ֆորմալ կրթական համակարգում հրապարակախոսական հմտությունները զարգացնելու քիչ հնարավորություններ կան:

 

Նրա փոխանցմամբ, մրցույթն իրականացնելուց առաջ ուսանողների համար նախևառաջ կազմակերպվել է հռետորության հմտությունները զարգացնելուն ուղղված դասընթաց, որը վարել է ՈԻԽ փոխնախագահ Խաչիկ Աբաջյանը, ապա նրանք լրացրել են հայտադիմումներ, հետո մասնակցել հարցազրույցի. «Շատ խիստ չենք դատել, քանի որ մրցույթը հենց ուսանողների համար է կազմակերպվել, և մենք ցանկացել ենք, որ ավելի շատ ուսանողներ հնարավորություն ունենան ինքնադրսևորվելու»:

 

Մրցույթի առաջին փուլին մասնակցել է 18 ուսանող, ապա ժյուրիի որոշմամբ, 12 մասնակից ստացել է եզրափակիչ փուլին մասնակցելու հնարավորություն: Մասնակիցներին տրվում են թեմաներ, որոնց վերաբերյալ ուսանողները կառուցում են իրենց ելույթը:

Մասնակիցներին ելույթը ներկայացնելու համար տրվում է 4.5-5 րոպե: Եզրափակիչ փուլի համար ընտրվել են «Հայ առաքելական եկեղեցու դերը պետական կառավարման համակարգում» և «Կոռուպցիայի կանխարգելման հնարավորությունները» խորագրերը: Ըստ Քերոբ Խաչատրյանի՝ թեմաները հայաստանյան հանրության շրջանում մշտապես խնդրահարույց են, և այդ համատեքստում հետաքրքրական է մասնակիցների փաստարկները:

 

Եզրափակիչ փուլի ժյուրիի կազմում այս տարի ընդգրկված են Միջազգային հարաբերությունների ֆակուլտետի դեկանի տեղակալ Կարեն Նահապետյանը, Քաղաքական գիտության պատմության և տեսության ամբիոնի դոցենտ Խաչիկ Գալստյանը, ՈԻԽ փոխնախագահ Խաչիկ Աբաջյանը և ՈՒԽ անդամ Տաթևիկ Սողոյանը:

 

 

Ժյուրին մասնակիցներին գնահատում է 5 բալանոց համակարգով՝ դիտարկելով նրանց խոսքի տրամաբանական կառուցվածքը, փաստարկները հիմնավորելու կարողությունը, վերբալ իմիջը, ժեստերը և այլն: Բացի դրանից՝ ժյուրին հնարավորություն ունի հարցեր ուղղելու մասնակիցներին:

 

Միջոցառման պատասխանատու Միլենա Վարդանյանը մեզ հետ զրույցում էլ փաստեց, որ մրցույթը կարևոր է Միջազգային հարաբերությունների ֆակուլտետի ուսանողների համար, քանի որ նրանց ընտրած մասնագիտությունը ենթադրում է հռետորական հմտությունների առկայություն:

 

Եզրափակիչ փուլի մասնակիցներն այսօր ստացան հավաստագրեր, իսկ 1-3-րդ պատվավոր հորիզոնականները զբաղեցրած ուսանողները՝ նաև մասնագիտական գրքեր: Քերոբ Խաչատրյանի փոխանցմամբ, նպատակ ունեն մրցույթը հաջորդ տարի դարձնել միջֆակուլտետային, իսկ հետագայում արդեն միջհամալսարանական:

 

Քնար Միսակյան

Այլ նորություններ
ԵՊՀ ՈՒԳԸ-Ն ԱՐՏԱԿԱՐԳ ԴՐՈՒԹՅԱՆ ՊԱՅՄԱՆՆԵՐՈՒՄ ՇԱՐՈՒՆԱԿՈՒՄ Է ԻՐ ԱՇԽԱՏԱՆՔՆԵՐԸ
Աշխարհում նոր տիպի կորոնավիրուսի տարածման և ՀՀ կառավարության կողմից արտակարգ դրություն հայտարարելու մասին որոշում կայացնելու առաջին իսկ օրերից ԵՊՀ ՈՒԳԸ-ն շարունակում է իրականացնել իր աշխատանքները: Մեզ հետ զրույցում ՈՒԳԸ նախագահ Մերի Փանոսյանը պատմել է, թե ինչ մեթոդներ և միջոցներ են կիրառել՝ այս ընթացքում արդյունավետ միջոցառումներ կազմակերպելու համար:
ՔԻՄԻԱՅԻ ՖԱԿՈՒԼՏԵՏԻ ՈՒՍԱՆՈՂՆԵՐԸ ՍԵՓԱԿԱՆ ՄԻՋՈՑՆԵՐՈՎ ՊԱՏՐԱՍՏԵԼ ԵՆ ԱԽՏԱՀԱՆՈՂ ՄԻՋՈՑՆԵՐ ԵՎ ԲԱԺԱՆԵԼ ՇՈՒԿԱՅԻ ԱՇԽԱՏԱԿԻՑՆԵՐԻՆ
ԵՊՀ քիմիայի ֆակուլտետի ուսանողները, իրենց նախաձեռնությամբ և ֆակուլտետի մասնագետների աջակցությամբ, ստեղծել են ախտահանիչներ և իրականացրել ակցիա՝ դրանք անվճար բաժանելով շուկայի աշխատակիցներին: