20.11.2019 | 
Հասարակություն
ԵՊՀ-Ն ԸՆԴԼԱՅՆՈՒՄ Է ՀԱՄԱԳՈՐԾԱԿՑՈՒԹՅԱՆ ՈՒՂԻՆԵՐԸ. ՀԱՄԱԼՍԱՐԱՆԸ ՀՅՈՒՐԸՆԿԱԼԵԼ Է ՎԻԵՏՆԱՄԻ ՆԵՐԿԱՅԱՑՈՒՑԻՉՆԵՐԻՆ
ԵՊՀ-Ն ԸՆԴԼԱՅՆՈՒՄ Է ՀԱՄԱԳՈՐԾԱԿՑՈՒԹՅԱՆ ՈՒՂԻՆԵՐԸ. ՀԱՄԱԼՍԱՐԱՆԸ ՀՅՈՒՐԸՆԿԱԼԵԼ Է ՎԻԵՏՆԱՄԻ ՆԵՐԿԱՅԱՑՈՒՑԻՉՆԵՐԻՆ
ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն այսօր հյուրընկալել է Հայ-վիետնամական բարեկամության ասոցիացիայի պատվիրակությանը:

ԵՊՀ-ում այսօր հյուրընկալված պատվիրակության կազմում էին Հայ-վիետնամական բարեկամության ասոցիացիայի փոխնախագահ և գլխավոր քարտուղար, ԵՊՀ շրջանավարտ Մայ Քուանգ Վինը (Mai Quang Vinh), Վիետնամում ամերիկյան համալսարանի ներկայացուցչական վարչության պետ Դոնգ Ման Կունգը (Duong Manh Coung) և ասոցիացիայի մշտական քարտուղար Տրան Դուք Հյուն (Tran Duc Hieu):

 

Հանդիպմանը ներկա էին նաև Վիետնամում ՀՀ արտակարգ և լիազոր դեսպան Վահրամ Կաժոյանը, ԵՊՀ միջազգային համագործակցության վարչության պետ Ալեքսանդր Մարգարովը և վարչության միջազգային կապերի բաժնի վարիչի տեղակալ Նաիրա Մնացականյանը:

 

Արթուր Իսրայելյանը հյուրերին ներկայացրեց ԵՊՀ կառուցվածքը և գործունեությունը՝ փաստելով, որ այստեղ գործում են 19 ֆակուլտետ և 2 ինստիտուտ. «Մեր ուսանողների ավելի քան 150-ն օտարերկրացիներ են: Ցավոք, նրանց մեջ դեռևս չկան վիետնամցիներ, բայց ես հույս ունեմ, որ առաջիկայում մենք կընդունենք նաև նրանց»:

 

ԵՊՀ պրոռեկտորը տեղեկացրեց, որ համալսարանում այլ օտար լեզուների հետ մեկտեղ դասավանդվում են նաև չինարեն և կորեերեն. «Այս համատեքստում կարելի է քննարկել ԵՊՀ-ում վիետնամերեն դասավանդելու հնարավորությունները և հեռանկարները»:

 

Ալեքսանդր Մարգարովը պատմեց համալսարանում օտարերկրյա ուսանողների համար կազմակերպվող դասընթացների մասին՝ փաստելով, որ այսօրվա դրությամբ ռուսերենով իրականացվում են գրեթե բոլոր կրթական ծրագրերը, իսկ անգլերենով՝ 22 ծրագրեր, որոնցից 6-ը՝ բակալավրիատում, իսկ 18-ը՝ մագիստրատուրայում:

 

Հանդիպման ընթացքում հյուրընկալված պատվիրակության ներկայացուցիչներն առաջարկեցին համագործակցություն հաստատել ԵՊՀ-ի և Վիետնամում ամերիկյան համալսարանի միջև, որը հնարավորություն կտա ԵՊՀ ուսանողներին իրենց կրթությունը շարունակելու Վիետնամում:

 

Ըստ առաջարկվող նախագծի՝ Վիետնամում ամերիկյան համալսարանի կողմից տրամադրվելու է 30 հազար դոլարին համարժեք կրթաթոշակ, որին կարող են դիմել բարձր առաջադիմություն ունեցող ուսանողները: Կրթաթոշակը տրամադրվելու է «Բիզնես կառավարում», «Տեղեկատվական տեխնոլոգիաներ» և «Հաղորդակցություն» կրթական ծրագրերի համար:

 

Հանդիպման ընթացքում քննարկվեցին նաև հնարավոր համագործակցության այլ ուղիներ, որոնք կնպաստեն ինչպես երկու կառույցների, այնպես էլ երկու երկրների բարեկամական հարաբերությունների զարգացմանը:

 

Քննարկման ավարտին Արթուր Իսրայելյանը հյուրերին գրքեր և ԵՊՀ 100-ամյակի առթիվ թողարկված հուշանվերներ նվիրեց:

 

Քնար Միսակյան

Այլ նորություններ
«ԱՐՑԱԽՅԱՆ ՀԱԿԱՄԱՐՏՈՒԹՅԱՆ ԸՆԿԱԼՄԱՆ ՀԻՄՆԱԽՆԴԻՐՆԵՐԻ ՇՈՒՐՋ» ԽՈՐԱԳՐՈՎ ՔՆՆԱՐԿՈՒՄ ԵՊՀ-Ի ԵՎ ՈՒՐՈՒԳՎԱՅԻ ՀԱՆՐԱՊԵՏՈՒԹՅԱՆ ՀԱՄԱԼՍԱՐԱՆԻ ՄԻՋԵՎ
Երևանի պետական և Ուրուգվայի Հանրապետության համալսարանների միջև այսօր տեղի է ունեցել «Արցախյան հակամարտության ընկալման հիմնախնդիրների շուրջ» խորագրով քննարկում:
«ՑԵՂԱՍՊԱՆՈՒԹՅՈՒՆԸ ԺԱՄԱՆԱԿԱԿԻՑ ԱՇԽԱՐՀՈՒՄ. ՈՒՍՈՒՄՆԱՍԻՐՄԱՆ ՀԵՌԱՆԿԱՐՆԵՐԸ ԵՎ ՄԱՐՏԱՀՐԱՎԵՐՆԵՐԸ». ՏԵՂԻ Է ՈՒՆԵՑԵԼ ԵՌՕՐՅԱ ՄԻՋԱԶԳԱՅԻՆ ԳԻՏԱԺՈՂՈՎ
ԵՊՀ ՀՀԻ ցեղասպանության և այլ զանգվածային ոճրագործություների կանխարգելման և կրթության ՅՈՒՆԵՍԿՕ-ի ամբիոնի նախաձեռնությամբ և ԿԳՄՍ նախարարության գիտական կոմիտեի աջակցությամբ նոյեմբերի 5-7-ը տեղի է ունեցել «Ցեղասպանությունը ժամանակակից աշխարհում. Ուսումնասիրման հեռանկարները և մարտահրավերները» եռօրյա միջազգային առցանց գիտաժողով: