02.02.2018 | 
Կրթություն
ՆՈՐ ՀՆԱՐԱՎՈՐՈՒԹՅՈՒՆ ԱՊԱԳԱ ՄԱԳԻՍՏՐԱՆՏՆԵՐԻ ՀԱՄԱՐ
ՆՈՐ ՀՆԱՐԱՎՈՐՈՒԹՅՈՒՆ ԱՊԱԳԱ ՄԱԳԻՍՏՐԱՆՏՆԵՐԻ ՀԱՄԱՐ
ԵՊՀ-ի և «ԱՄՔՈՐ Հայաստան» բարեգործական հիմնադրամի համագործակցության արդյունքում մագիստրատուրայի 8 ուսանողի ուսման վճարը կփոխհատուցվի «ԱՄՔՈՐ Հայաստան» հիմնադրամի կողմից:

ԵՊՀ շրջանավարտների և կարիերայի կենտրոնը և «ԱՄՔՈՐ Հայաստան» բարեգործական հիմնադրամը իրականացնում են «Աջակցություն ուսմանը՝ ապագայի ներդրում» ծրագիրը, որը կյանքի կոչելու նպատակով փետրվարի 2-ին ԵՊՀ ռեկտոր Արամ Սիմոնյանը և «ԱՄՔՈՐ Հայաստան» բարեգործական հիմնադրամի տնօրեն Գոհար Գրիգորյանը ստորագրեցին համագործակցության հուշագիր:

 

«Այս նախաձեռնությունը շատ գովելի է և անհրաժեշտ, քանի որ շատ մագիստրանտներ, հատկապես մարզաբնակները չեն կարողանում վճարել ուսման վարձը»,- նշեց Արամ Սիմոնյանը:

 

Հանդիպմանը ներկա էին նաև ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, «ԱՄՔՈՐ Հայաստան» հիմնադրամի ու ԵՊՀ շրջանավարտների և կարիերայի կենտրոնի աշխատակիցներ:

 

ԵՊՀ-ի և «ԱՄՔՈՐ Հայաստանի» համագործակցությունը ներառում է «Աջակցություն ուսմանը՝ ապագայի ներդրում» ծրագրի ներկայացման ու իրազեկման կազմակերպումը ԵՊՀ սոցիոլոգիայի, Տնտեսագիտության և կառավարման ֆակուլտետների բակալավրիատի այն ուսանողների համար, ովքեր ցանկանում են շարունակել ուսումը ԵՊՀ մագիստրատուրայում և ունեն բարձր առաջադիմություն:

 

«ԱՄՔՈՐ Հայաստանը» ընտրված ուսանողների համար կկազմակերպի «Ծրագիր կազմելու», «Բյուջետավորման» և «Ներկայացման հմտություններ» դասընթացներ և կփոխհատուցի վերջնական փուլի հաղթողների՝ ԵՊՀ մագիստրատուրայի ուսման վճարը (2 տարի ժամկետով, 8 ուսանողի համար):

 

«Ակնկալվում է, որ մասնակիցները կլինեն մարզաբնակ ուսանողներ և կմշակեն իրենց համայնքների զարգացման ծրագրերը: Լավագույն ծրագրերի հեղինակները որպես պարգևատրում կստանան մագիստրատուրայի երկու տարվա ուսման վարձի փոխհատուցում»,- ասաց ԵՊՀ պրոռեկտոր Ռուբեն Մարկոսյանը և հավելեց, որ այդ ծրագրերը կարող են դառնալ նաև մագիստրոսական թեզի թեմաներ:

 

Ինչպես նշեց Գոհար Գրիգորյանը, ուսանողների առաջարկած լավագույն ծրագրերը «ԱՄՔՈՐ Հայաստան» հիմնադրամի կողմից հետագայում հնարավորության սահմաններում կյանքի կկոչվեն հենց իրենց համայնքներում: Նա հավելեց նաև, որ 2012 թ.-ից սկսած՝ «ԱՄՔՈՐ Հայաստան» ԲՀ-ի կողմից իրականացվում է «Ուսանողների ուսման վճարների մասնակի փոխհատուցում» ծրագիրը, որի ընթացքում ԵՊՀ ուսանողների համար կատարվել է ուսման վարձի 611 մասնակի փոխանցում՝ շուրջ 51,000,000 ՀՀ դրամ: 

Այլ նորություններ
ՔՆՆԱՐԿԵԼ ՓԱԽՍՏԱԿԱՆՆԵՐԻ ԻՐԱՎՈՒՆՔՆԵՐԸ ԵՎ ԽԹԱՆԵԼ ԴՐԱՆՑ ՊԱՇՏՊԱՆՈՒԹՅԱՆ ՈԼՈՐՏՈՒՄ ԻՐԱՎԱԿԱՆ ԿՐԹՈՒԹՅԱՆ ԶԱՐԳԱՑՈՒՄԸ. ԵՌՕՐՅԱ ԴՊՐՈՑ՝ ԴԻԼԻՋԱՆՈՒՄ
ԵՊՀ իրավագիտության ֆակուլտետի, ՄԱԿ-ի փախստականների գծով գերագույն հանձնակատարի հայաստանյան գրասենյակի և «Առաքելություն Հայաստան» ՀԿ-ի համատեղ նախաձեռնությամբ հոկտեմբերի 11-13-ը Դիլիջան քաղաքում կազմակերպվել է արդեն ավանդական դարձած «Փախստականների իրավունք» խորագրով 9-րդ դպրոցը:
«ՆՊԱՏԱԿԸ ՏԵՍԱԿԱՆ ԳԻՏԵԼԻՔՆԵՐԸ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ ՎԵՐԱԾԵԼՆ Է»․ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏԻ ՈՒՍԱՆՈՂՆԵՐԻ ԱՅՑԸ ԵՐԵՎԱՆԻ «ԱՐԱՐԱՏ» ԿՈՆՅԱԿԻ-ԳԻՆՈՒ-ՕՂՈՒ ԿՈՄԲԻՆԱՏ
Արդեն չորրորդ տարին է, ինչ ԵՊՀ տնտեսագիտության և կառավարման ֆակուլտետի կառավարման և գործարարության ամբիոնը նախաձեռնում է արտալսարանային դասեր, որոնք, տեսական գիտելիքներից բացի, նաև գործնական հմտություններ ձեռքբերելու հնարավորություն են տալիս: Տնտեսագիտության և կառավարման ֆակուլտետի 4-րդ կուրսի ուսանողներն այսօր նմանօրինակ դաս են ունեցել Երևանի «Արարատ» կոնյակի-գինու-օղու կոմբինատում: