27.10.2006 | 
Կրթություն
ԵՐԿՈՒ ՆՈՐ ԿԱՌՈՒՅՑ ՀԱՄԱԼՍԱՐԱՆՈՒՄ
ԵՐԿՈՒ ՆՈՐ  ԿԱՌՈՒՅՑ ՀԱՄԱԼՍԱՐԱՆՈՒՄ
Եվրոպական իրավունքի ասպիրանտ-մասնագետները պատվոգրեր ստացան:

Երեւանի պետական համալսարանում միանգամից երկու նոր ամբիոն է բացվել` իրավագիտության ֆակուլտետում` «Եվրոպական եւ միջազգային իրավունքի ամբիոնը», եւ համահամալսարանական «Եվրոպական իրավունքի եւ ինտեգրման կենտրոնը»:

«Հայաստանի եւ Եվրամիության համագործակցության շրջանակներն ընդլայնելու, եվրաինտեգրման գործընթացն ավելի արագ ու արդյունավետ դարձնելու համար անհրաժեշտ են բարձրակարգ մասնագետներ եվրոպական իրավունքի ոլորտում»,- վստահ է ԵՊՀ իրավագիտության ֆակուլտետի դեկան Գագիկ Ղազինյանը: Այդ բացը լրացնելու համար ԵՊՀ-ն վերապատրաստման միջոցառումների մի ամբողջ համալիր է իրականացնում` սեմինարներ, գիտական քննարկումներ, ճանաչողական գործուղումներ եւ այլն:

Հայաստանում «Տասիս» ընկերության 2004-2005 թթ. գործունեության շրջանակներում նախատեսվել եւ Եվրահանձնաժողովի կողմից ֆինանսավորվել է «Աջակցություն եվրոպական եւ միջազգային իրավունքի աբիոնի, եվրոպական իրավունքի ու ինտեգրման կենտրոնի հիմնադրմանը ԵՊՀ-ում եւ աջակցություն գործընկերության եւ համագործակցության համաձայնագրին» ծրագիրը: Այն սկսվել է 2006 թ-ի մարտին` երկու տարի տեւողությամբ:

Հոկտեմբերի 13-22-ը Ծաղկաձորում անցկացվեց առաջին սեմինարը ԵՊՀ-ի, Ռուս –հայկական (Սլավոնական) համալսարանի, Եվրոպական տարածաշրջանային ակադեմիայի ասպիրանտների, դասախոսների, Ֆինանսների եւ էկոնոմիկայի, Արտաքին գործերի նախարարությունների, նաեւ` հասարակական կազմակերպությունների ներկայացուցիչների մասնակցությամբ: Տասն օրվա ընթացքում մասնակիցները ծանոթացան եվրոպական իրավունքի հիմնական պահանջներին, տեսական եւ գործնական պարապմունքների միջոցով ամրապնդեցին իրենց գիտելիքները:

Հոկտեմբերի 27-ին ԵՊՀ իրավագիտության ֆակուլտետում վերապատրաստման ծրագրի բոլոր մասնակիցներին (22 հոգի) պատվոգրեր հանձնեցին ԵՊՀ պրոռեկտոր Սամվել Հարությունյանը, ֆակուլտետի դեկան Գագիկ Ղազինյանը, ծրագրի խմբի ղեկավար Յուրգեն Բինդերը: ԵՊՀ պրոռեկտոր Սամվել Հարությունյանն ասաց, որ համալսարանն այսօր լուրջ բարեփոխումների շրջան է ապրում. «Նման կառույցների ստեղծումը ԵՊՀ-ում ճիշտ ժամանակին է: Մենք, կրթության ոլորտում եւս ինտեգրվելով Եվրոպային, այս ծրագրից մեծ ակնկալիքներ ունենք»:

Այլ նորություններ
ԵՊՀ ՌՈՒՍ ԲԱՆԱՍԻՐՈՒԹՅԱՆ ՖԱԿՈՒԼՏԵՏՆ ԱՆՈՒՄ Է ԱՄԵՆ ՀՆԱՐԱՎՈՐԸ՝ ՀԵՌԱՎԱՐ ՈՒՍՈՒՑՈՒՄԸ ՊԱՏՇԱՃ ԻՐԱԿԱՆԱՑՆԵԼՈՒ ՀԱՄԱՐ
ՀՀ տարածքում արտակարգ դրություն հայտարարելու որոշմամբ պայմանավորված՝ ԵՊՀ ֆակուլտետներն իրականացնում են առցանց ուսուցում՝ ուսումնական գործընթացի երկարատև ընդհատումից խուսափելու համար։
«ՖԱԿՈՒԼՏԵՏՈՒՄ ԱՄԲՈՂՋ ԾԱՎԱԼՈՎ ԻՐԱԿԱՆԱՑՎՈՒՄ ԵՆ ՆԱԽԱՏԵՍՎԱԾ ԲՈԼՈՐ ԴԱՍԵՐԸ». ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՆ ԱՄՓՈՓԵԼ Է ՆԱԽՈՐԴ ՇԱԲԱԹՎԱ ԸՆԹԱՑՔՈՒՄ ԻՐԱԿԱՆԱՑՎԱԾ ՀԵՌԱՎԱՐ ՈՒՍՈՒՑՄԱՆ ԳՈՐԾԸՆԹԱՑԸ
Այսօր տեղի է ունեցել ԵՊՀ իրավագիտության ֆակուլտետի դեկանատի ընդլայնված հեռավար նիստ՝ դեկանի, դեկանի տեղակալների, ամբիոնների վարիչների, լաբորանտների, առկա և հեռակա ուսուցման բակալավրիատի և մագիստրատուրայի բոլոր կուրսերի ու խմբերի ավագների մասնակցությամբ։