13.12.2018 | 
Ուսանողական
«ԲԱՆԱՎԵՃԻ ԱՌԱՋՆՈՒԹՅՈՒՆ - 2018»-Ի ՀԱՂԹՈՂԸ «ԳԱԼԱԿՏԻԿՈՍ» ԹԻՄՆ Է
«ԲԱՆԱՎԵՃԻ ԱՌԱՋՆՈՒԹՅՈՒՆ - 2018»-Ի ՀԱՂԹՈՂԸ «ԳԱԼԱԿՏԻԿՈՍ» ԹԻՄՆ Է
Այսօր ԵՊՀ Մշակույթի կենտրոնում ամփոփվեց «Բանավեճի առաջնություն- 2018»-ը:

Տեղեկացնենք, որ միջֆակուլտետային բանավեճի առաջնության կազմակերպիչը ԵՊՀ ուսանողական խորհրդի գիտակրթական հանձնաժողովի բանավեճի ակումբն է:

Միջֆակուլտետային թեժ և լարված պայքարից հետո եզրափակիչ փուլում մրցում էին ԵՊՀ միջազգային հարաբերությունների ֆակուլտետը ներկայացնող «Լեգատի» և Իրավագիտության ֆակուլտետը ներկայացնող «Գալակտիկոս» թիմերը:

Բանավեճի առանցքում «Քաղաքական պաշտոն զբաղեցնող անձանց ներկայությունը Հայաստանի Հանրապետությունում գործող պետական բուհերի կառավարման խորհուրդներում պետք է արգելվի» թեման էր:

Եզրափակիչ փուլի ժյուրիի կազմում էին ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը, «Այբ» դպրոցի տնօրեն Արամ Փախչանյանը, ԵՊՀ գիտական քարտուղար Մենուա Սողոմոնյանը, հասարակական- քաղաքական գործիչ Անահիտ Բախշյանը, ԵՊՀ ՈՒԽ փոխնախագահ Դավիթ Մաթևոսյանը:

Բանավեճի մեկնարկին ողջույնի խոսքով հանդես եկավ ԵՊՀ ՈՒԽ նախագահ Դավիթ Ափոյանը, որից հետո բանավեճի թեմային կողմ «Գալակտիկոս» թիմը ներկայացրեց կառուցողական իր դիրքորոշումը:

«Բարձրագույն և հետբուհական կրթության որակի նկատմամբ պետական վերահսկողությունը անխուսափելի է, սակայն դրա իրականացման համար բավարար ենք համարում ՀՀ ԿԳՆ գործունեությունը»,- փաստեցին թիմի անդամները:

Նրանց դիրքորոշմամբ, քաղաքական պաշտոն զբաղեցնող անձանց ներկայությունը պետական բուհերի կառավարման խորհուրդներում ավելորդություն է: Այն հղի է ռիսկային և անտրամաբանական լուծումներով:

Ի հակադրումն վերոնշյալ դիրքորոշումների՝ «Լեգատի» թիմը հանդես եկավ կառուցողական ելույթով, որի առանցքում «Արգելել նշանակում է պարտադրել» գաղափարախոսությունն էր:

«Քաղաքական պաշտոն զբաղեցնող անձանց ներկայության արգելքը պետական բուհերի կառավարման խորհուրդներում զրկում է բուհին ինքնավարությունից»,- նշեցին թիմի անդամները:

Նրանց խոսքով, արգելքը արհեստական պատնեշ է բուհի և պետության միջև: 

Թեժ և հետաքրքիր քննարկումից հետո ժյուրիի անդամները կիսվեցին տպավորություններով, ինչպես նաև հանդես եկան որոշակի նկատառումներով:

«Այբ» դպրոցի տնօրեն Արամ Փախչանյանը նշեց, որ պետական բուհերին անդրադառնալիս չպետք է սահմանափակվել միայն Երևանի պետական համալսարանով: 

Եզրափակիչ փուլում հաղթող ճանաչվեց «Գալակիտիկոս» թիմը: Առաջնության հաղթող թիմը պարգևատրվեց գավաթով:

Նրանց փաստարկները, խոսքի արտահայտչականությունը, բանավեճը վարելու հմտությունները, ճկունությունը և ժամանակի տնօրինումը տպավորեցին ժյուրիի անդամներին:

Մասնակիցները ստացան նաև հավաստագրեր և նվերներ:


Անգին Խաչատրյան

Այլ նորություններ
ԵՊՀ ՈՒԳԸ-Ն ԱՐՏԱԿԱՐԳ ԴՐՈՒԹՅԱՆ ՊԱՅՄԱՆՆԵՐՈՒՄ ՇԱՐՈՒՆԱԿՈՒՄ Է ԻՐ ԱՇԽԱՏԱՆՔՆԵՐԸ
Աշխարհում նոր տիպի կորոնավիրուսի տարածման և ՀՀ կառավարության կողմից արտակարգ դրություն հայտարարելու մասին որոշում կայացնելու առաջին իսկ օրերից ԵՊՀ ՈՒԳԸ-ն շարունակում է իրականացնել իր աշխատանքները: Մեզ հետ զրույցում ՈՒԳԸ նախագահ Մերի Փանոսյանը պատմել է, թե ինչ մեթոդներ և միջոցներ են կիրառել՝ այս ընթացքում արդյունավետ միջոցառումներ կազմակերպելու համար:
ՔԻՄԻԱՅԻ ՖԱԿՈՒԼՏԵՏԻ ՈՒՍԱՆՈՂՆԵՐԸ ՍԵՓԱԿԱՆ ՄԻՋՈՑՆԵՐՈՎ ՊԱՏՐԱՍՏԵԼ ԵՆ ԱԽՏԱՀԱՆՈՂ ՄԻՋՈՑՆԵՐ ԵՎ ԲԱԺԱՆԵԼ ՇՈՒԿԱՅԻ ԱՇԽԱՏԱԿԻՑՆԵՐԻՆ
ԵՊՀ քիմիայի ֆակուլտետի ուսանողները, իրենց նախաձեռնությամբ և ֆակուլտետի մասնագետների աջակցությամբ, ստեղծել են ախտահանիչներ և իրականացրել ակցիա՝ դրանք անվճար բաժանելով շուկայի աշխատակիցներին: