17.12.2019 | 
Հասարակություն
ՂԱԶԱԽԱԿԱՆ ԽՈՐՀՐԴԱՐԱՆԻ ՊԱՏԳԱՄԱՎՈՐՆԵՐԸ՝ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏՈՒՄ
ՂԱԶԱԽԱԿԱՆ ԽՈՐՀՐԴԱՐԱՆԻ ՊԱՏԳԱՄԱՎՈՐՆԵՐԸ՝ ԵՊՀ ԱՐԵՎԵԼԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ արևելագիտության ֆակուլտետի թյուրքագիտության ամբիոնին առընթեր գործող Ղազախերենի, Ղազախստանի մշակույթի ու պատմության կենտրոնն այսօր հյուրընկալել էր Ղազախստանի խորհրդարանի պատվիրակությանը:

Պատվիրակությունը գլխավորում էր Ղազախստանի խորհրդարանի սոցիալ-մշակութային զարգացման կոմիտեի փոխնախագահ Բեյբիթ Մամրաևը:

Ղազախստանյան խորհրդարանականներին ուղեկցում էր ՀՀ ԱԺ պատգամավոր, ՀՀ ԱԺ Հայաստան-Ղազախստան բարեկամական խմբի ղեկավար Վաղարշակ Հակոբյանը, որը նույնպես ԵՊՀ արևելագիտության ֆակուլտետի թյուրքագիտության ամբիոնի շրջանավարտներից է:

Ղազախ հյուրերին դիմավորեցին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը, ԵՊՀ արևելագիտության ֆակուլտետի թյուրքագիտության ամբիոնի վարիչ Ալեքսանդր Սաֆարյանը:

 

Պրոֆեսոր Ա. Սաֆարյանը հյուրերին պատմեց հայ-ղազախական գիտակրթական ու մշակութային համագործակցության, հայատառ ղփչաղերեն ձեռագրերի ուսումնասիրության արդի փուլի ու առկա նվաճումների, վերջերս հայերեն հրատարակված «Ղազախական գրականության անթոլոգիայի» մասին:

Նա մասնավորապես նշեց, որ հայ-ղազախական գրական կապերի ակունքներում կանգնած են եղել խորհրդահայ գրականության երեք դասականները՝ Սիլվա Կապուտիկյանը, Գևորգ Էմինը և Պարույր Սևակը, բայց միայն այսօր՝ շուրջ կես դար անց, ԵՊՀ-ի, Հայաստանում Ղազախստանի դեսպանության և ՀՀ ԳԱԱ գրականության ինստիտուտի արդյունավետ համագործակցության շնորհիվ հնարավոր եղավ հրատարակել վերոհիշյալ եզակի ու հիմնարար անթոլոգիան:

Այդ գրքում առաջին անգամ հայերեն ներկայացվել են ղազախական ժիրաուների, Շաքարիմի, Մաղժան Ժումաբաևի և Օլժաս Սուլեյմենովի ու այլ ժամանակակից բանաստեղծների ստեղծագործություններ:

 

Բեյբիթ Մամրաևն իր հերթին շեշտեց նաև կրթական, գիտահետազոտական համատեղ ծրագրերի իրականացման կարևորությունը և պատրաստակամություն հայտնեց հանդես գալու այդ ոլորտներում որոշակի նախաձեռնություններով:

Բարձրաստիճան հյուրը շնորհակալություն հայտնեց հայ թյուրքագետներին կատարված աշխատանքների համար և ԵՊՀ պրոռեկտոր Արթուր Իսրայելյանին հանձնեց պաշտոնական հուշանվերը, որը տեղ կգտնի ԵՊՀ պատմության թանգարանում:

 

 

 

 

 

 

Այլ նորություններ
ԱՐՑԱԽՅԱՆ ՀԱԿԱՄԱՐՏՈՒԹՅԱՆ ՎԵՐԱԲԵՐՅԱԼ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ գիտխորհրդի նիստերի դահլիճում այսօր «Թուրքիան և Արցախյան հիմնախնդիրը» թեմայով դասախոսություն է կարդացել ՀՀ ԱԳՆ սահմանակից երկրների վարչության պետ, թուրքագետ, պ. գ. դ., պրոֆեսոր Արսեն Ավագյանը:
«ՄԱՅՐԵՆԻՆ ՄԵՐ ԱԶԳԱՅԻՆ ԻՆՔՆՈՒԹՅՈՒՆՆ Է, ՄԵՐ ԱՆՁՆԱԳԻՐԸ». ՀԱՄԱԼՍԱՐԱՆԱԿԱՆՆԵՐԸ  ԵՎ «ՇԻՐԱԿԱՑՈՒ ՃԵՄԱՐԱՆԻ» ՍԱՆԵՐԸ  ՏՈՆՈՒՄ ԵՆ ՄԱՅՐԵՆԻԻ  ՕՐԸ
ԵՊՀ մշակույթի կենտրոնի և «Շիրակացու ճեմարան» միջազգային գիտակրթական համալիրի համատեղ ջանքերով այսօր տեղի է ունեցել Մայրենի լեզվի օրվան նվիրված «Մայրենի լեզու, Մայր ճեմարան, Մայր համալսարան» խորագիրը կրող միջոցառումը: