Մարտի 10-ին Բոլոնիայի համալսարանում կազմակերպված կոնֆերանսի ընթացքում քննարկվեցին Իտալիայի բուհերի շրջանավարտների շրջանում իրականացված աշխատանքային պայմանների խնդիրներին նվիրված 16-րդ ուսումնասիրության արդյունքները: Զեկույցներով հանդես եկող բանախոսները նշեցին, որ շրջանավարտների գործազրկության տոկոսը նվազել է և ներկայումս կազմում է 10-20% (ավարտած կրթական ծրագրից կախված):
Ընդգծվեց, որ ներկա իրավիճակում շրջանավարտների՝ աշխատանք գտնելու հնարավորությունը հիմնականում կախված է նրա գիտելիքներից ու ձեռք բերած հմտություններից և որոշ չափով պայմանավորված է նաև երկրի տնտեսական վիճակով: Կոնֆերանսի ընթացքում մանրամասն դիտարկվեց ձեռներեցության և նորարարության խնդիրը: Բանախոսներից շատերն այս հարցում կարևորում էին համալսարանների դերակատարությունը:
Կոնֆերանսին ԵՊՀ-ն ներկայացնում էր Ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը: Մասնակցում էին նաև ՀՊՃՀ ռեկտոր Արա Ավետիսյանը, ԵՃՇՊՀ ռեկտոր Հովհաննես Թոքմաջյանը, ԳՊՀ ռեկտոր Ռուզաննա Հակոբյանը, Գյումրու մանկավարժական ինստիտուտի պրոռեկտոր Անահիտ Ֆարմանյանը և «HEN-GEAR» ծրագրի մասնակից ՀՀ բուհերի այլ ներկայացուցիչներ:
«AlamLaurea» համալսարանների կոնսորցիումը ստեղծվել է շուրջ 20 տարի առաջ և ներկայումս միավորում է Իտալիայի 64 համալսարաններ: «AlmaLaurea»-ի տվյալների բազայում այժմ գրանցված է շուրջ 2 մլն շրջանավարտ: Կոնսորցիումը համագործակցում է Երևանի պետական համալսարանի և ՀՀ մի շարք այլ համալսարանների հետ Եվրոպական միության «HEN-GEAR» «Տեմպուս» ծրագրի շրջանակներում:
«HEN-GEAR» ծրագրի հիմնական նպատակն է ստեղծել շրջանավարտների տվյալների միասնական շտեմարան, ձևավորել գործատուների հետ համագործակցության համապատասխան հարթակ և աջակցել բուհերի շրջանավարտների մուտքին աշխատաշուկա: Ծրագրում ներգրավված են նաև Ագրարային համալսարանը, ՀՊՃՀ-ն (Պոլիտեխնիկ), ՀՊՏՀ-ն, ԵՊՃՇՀ-ն, Գավառի պետական համալսարանը, Գեղարվեստի պետական ակադեմիան և Գյումրու պետական մանկավարժական ինստիտուտը:
Կոնֆերանսում ծավալուն զեկույցով հանդես եկավ «AlmaLaurea»-ի տնօրեն Ա. Կամելին, մասնակիցներին ողջունեց Բոլոնիայի համալսարանի ռեկտորը: Հետազոտությունների և բուհական համակարգի զարգացման խնդիրների մասին խոսեց Իտալիայի շրջակա միջավայրի նախարար Գ. Գալետին: «Նոր իրավիճակը, որը գալիս է ճգնաժամից հետո, կարող է բնութագրվել որպես մրցակցություն հետազոտություններում և կրթությունում»,- նշեց նա:
«AlmaLaurea»-ն համագործակցում է ոչ միայն Հայաստանի, այլև Սերբիայի, Բոսնիա և Հերցեգովինայի, Մոնտենեգրոյի, Մարոկոյի, Թունիսի, Խորվաթիայի և այլ երկրների համալսարանների հետ: Կոնֆերանսին մասնակցում էին նաև գործընկեր երկրների դիվանագիտական ներկայացուցչությունների ղեկավարները: Իտալիայում ՀՀ-ի արտակարգ և լիազոր դեսպան Սարգիս Ղազարյանը, ով Իտալիայի Տրիեստեի համալսարանի շրջանավարտ է, կարևորեց «AlmaLaurea»-ի փորձի կիրառումն ու համագործակցությունը հայաստանյան բուհերի հետ:
Կոնֆերանսի ավարտին ամփոփիչ ելույթով հանդես եկավ Իտալիայի նախկին վարչապետ, Եվրոպական հանձնաժողովի նախկին նախագահ Ռոմանո Պրոդին: Նա շեշտադրեց նորարարություններին և տեխնոլոգիական զարգացման մարտահրավերներին արձագանքելու խնդիրը և մասնավորապես նշեց, որ տեղեկատվական տեխնոլոգիաները մի կողմից ավելացնում, իսկ մյուս կողմից կրճատում են աշխատատեղերը, և հաճախ տուժում է աշխատաշուկայի միջին սեգմենտը:
