04.09.2020 | 
Հասարակություն
«ԵԹԵ ՈՒԶՈՒՄ ԵՆ ՀԱՋՈՂՈՒԹՅՈՒՆ ԳՐԱՆՑԵԼ, ՊԵՏՔ Է ՆԱԽԵՎԱՌԱՋ ԴՈՒՐՍ ԳԱԼ ՈՒՍՈՒՄՆԱԿԱՆ ԾՐԱԳՐԻՑ ԵՎ ԿԱԶՄԱԿԵՐՊԵԼ ԱՇԽԱՏԱՆՔՆ ԱՆԴՈՒԼ ԱՇԽԱՏԱՍԻՐՈՒԹՅԱՄԲ». ԵՊՀ-ՈՒՄ ԱՆՑԿԱՑՎԵԼ Է ԵՎՐՈՊԱՅԻ ԻՆՖՈՐՄԱՏԻԿԱՅԻ ՊԱՏԱՆԵԿԱՆ ՕԼԻՄՊԻԱԴԱՆ
«ԵԹԵ ՈՒԶՈՒՄ ԵՆ ՀԱՋՈՂՈՒԹՅՈՒՆ ԳՐԱՆՑԵԼ, ՊԵՏՔ Է ՆԱԽԵՎԱՌԱՋ ԴՈՒՐՍ ԳԱԼ ՈՒՍՈՒՄՆԱԿԱՆ ԾՐԱԳՐԻՑ ԵՎ ԿԱԶՄԱԿԵՐՊԵԼ ԱՇԽԱՏԱՆՔՆ ԱՆԴՈՒԼ ԱՇԽԱՏԱՍԻՐՈՒԹՅԱՄԲ». ԵՊՀ-ՈՒՄ ԱՆՑԿԱՑՎԵԼ Է ԵՎՐՈՊԱՅԻ ԻՆՖՈՐՄԱՏԻԿԱՅԻ ՊԱՏԱՆԵԿԱՆ ՕԼԻՄՊԻԱԴԱՆ
ԵՊՀ ՏՏ կրթական և հետազոտական կենտրոնի համակարգչային դահլիճում այսօր անցկացվել է Եվրոպայի ինֆորմատիկայի պատանեկան օլիմպիադան (EJOI):

ysu.am-ը զրուցել է Եվրոպայի ինֆորմատիկայի պատանեկան օլիմպիադայի միջազգային կոմիտեի անդամ, ԵՊՀ ծրագրավորման և ինֆորմացիոն տեխնոլոգիաների ամբիոնի ասիստենտ Արմեն Անդրեասյանի հետ:

 

Վերջինս տեղեկացրեց, որ մինչև 15 տարեկանների համար նախատեսված օլիմպիադային մասնակցում է աշխարհի 27 երկրներից 90 մասնակից. «Օլիմպիադայի կազմակերպիչ երկիրը Վրաստանն է, և պայմանավորված արտակարգ իրավիճակով՝ այն անցկացվում է առցանց եղանակով»:

 

Մասնագետի հաղորդմամբ, Եվրոպայի ինֆորմատիկայի պատանեկան օլիմպիադան անցկացվում է դեռևս 2017 թվականից Բուլղարիայի առաջարկով:

 

Նրա տեղեկացմամբ, օլիմպիադան ընթանալու է երկու օր, յուրաքանչյուր օր՝ 4 ժամ տևողությամբ, որի ընթացքում մասնակիցները լուծելու են 3 խնդիր. «Ենթախնդիրները լուծելիս ամփոփվելու են մասնակիցների միավորները, և դրանց հիման վրա որոշվելու են հաղթողներն ու մեդալակիրները, որոնք լինելու են ոչ թե մեկը կամ երկուսը, այլ մի քանիսը»: 

 

Նշենք, որ մասնակիցներն ընտրվել են ընտրական մրցույթներով՝ միջազգային կոմիտեի անդամի և թիմի ղեկավարների կողմից:

«Մեր թիմի հիմնական կորիզը Ա. Շահինյանի անվան ֆիզմաթ դպրոցի և «Քվանտ» վարժարանի 8 աշակերտներն են, որոնց հետ մինչև օլիմպիադայի մեկնարկը մենք առցանց եղանակով պարապմունքներ ենք անցկացրել»,- ասաց Արմեն Անդրեասյանը:

Վերջինս նաև տեղեկացրեց, որ այս օլիմպիադան հնարավորություն է ընձեռել ստեղծելու արտամրցութային թիմ, որի հետ նույնպես անցկացվել են առցանց պարապմունքներ:

 

«Քանի որ վերջին տարիներին միջազգային օլիմպիադաներում եվրոպական երկրների ցուցաբերած արդյունքները զիջում են արևելյան և խաղաղօվկիանոսյան երկրների ցուցանիշներին, ապա Եվրոպայում որոշեցին նմանաբնույթ օլիմպիադա կազմակերպել, որի արդյունքներով ուժեղագույնները կդառնան ապագայում կազմակերպվելիք  միջազգային օլիմպիադայի կորիզը»,- ասաց Ա. Անդրեասյանը:

 

 

Խոսելով նմանաբնույթ օլիմպիադաներում ՀՀ թիմի մասնակցության նվազագույն քանակի և առկա բացթողումների մասին՝ ԵՊՀ ասիստենտն առանձնացրեց մի քանի կետ. «Օլիմպիադաներում մեր խնդիրն օլիմպիադայի հանրայնացումն է: Ըստ թվային տվյալների՝ «Մաթեմատիկա» և «Ինֆորմատիկա» առարկաների օլիմպիադաների մասնակիցների քանակի տարբերությունն էական է»:

 

 

Նման ցուցանիշը մասնագետը պայմանավորեց «Ինֆորմատիկա» առարկայի՝ ընդունելության քննություններում ներառված չլինելու և աշակերտների մոտիվացիայի պակասով:

 

«Եթե ուզում են հաջողություն գրանցել, պետք է նախևառաջ դուրս գալ ուսումնական ծրագրից և կազմակերպել աշխատանքն անդուլ աշխատասիրությամբ: Ցավոք, Հայաստանում քիչ են այդպիսինները»,- ասաց պարոն Անդրեասյանը:

 

Օլիմպիադայի մասնակից, «Քվանտ» վարժարանի 10-րդ դասարանի աշակերտ Համլետ Պետրոսյանը նշեց, որ միջազգային օլիմպիադային իր մասնակցությունն արդեն կարևոր քայլ է հետագայի համար: 

 

Ապագա ծրագրավորողի խոսքով, օլիմպիադայի առցանց եղանակով կազմակերպումը  հավելյալ դժվարություն չի առաջացրել՝ շնորհիվ առարկայի բնույթի: 

 

Համլետը նաև նշեց, որ օլիմպիադան անցկացվում է ընկերական մթնոլորտում, որտեղ յուրաքանչյուրը գիտի դիմացինի հնարավորությունները. «Մեկս մյուսի հնարավորությունները ճանաչելով՝ կարողանում ենք աջակցել ու օգնել միմյանց՝ այս կերպ ցուցաբերելով թիմային միասնություն»:

 

 Նշենք, որ սեպտեմբերի 6-ին առցանց կկայանան օլիմպիադայի փակման արարողությունը և հաղթողների որոշումը:

 

Մեդալների հանձնումը, ըստ էության, կանցկացվի մյուս տարի, իսկ դիպլոմների հանձնման արարողությունը տեղի կունենա էլեկտրոնային եղանակով: 

 

Անգին Խաչատրյան

 

Այլ նորություններ
ՍԼՈՎԱԿԻԱ. ԿՐԹՈՒԹՅԱՆ ԻՆՔՆԱՎԱՐՈՒԹՅԱՆ ՇԱՐՈՒՆԱԿՎՈՂ ՊԱՏՄՈՒԹՅՈՒՆ
Սլովակիան Կենտրոնական Եվրոպայում գտնվող, լեռներով պատված փոքր երկիր է:
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՀԱՅՏԱՐԱՐՈՒԹՅՈՒՆԸ
ԵՊՀ իրավագիտության ֆակուլտետի հայտարարությունը՝ կապված Հանրային հեռուստաընկերության 2020 թ. սեպտեմբերի 10-ի եթերում հնչած տեղեկատվության հետ: