25.12.2018 | 
Ուսանողական
ԵՊՀ ՈՒԳԸ-Ն ԱՄՓՈՓԵՑ ԱՆՑՆՈՂ ԿԻՍԱՄՅԱԿԸ
ԵՊՀ  ՈՒԳԸ-Ն ԱՄՓՈՓԵՑ ԱՆՑՆՈՂ ԿԻՍԱՄՅԱԿԸ
ԵՊՀ Պալեանների անվան դահլիճում այսօր տեղի ունեցավ 2018-19 ուսումնական տարվա 1-ին կիսամյակի ընդլայնված նիստը:

Նիստի մեկնարկին ՈՒԳԸ-ականներին ողջունեց ԵՊՀ ուսանողների, շրջանավարտների և հասարակայնության հետ կապերի գծով պրոռեկտոր Ռուբեն Մարկոսյանը՝ փաստելով, որ անցնող կիսամյակում Ուսանողական գիտական ընկերությունը մի շարք միջոցառումներ է իրականացրել՝ հավատարիմ մնալով սահմանված նշաձողին:

 

«Կատարված աշխատանքի համար ուզում եմ շնորհակալություն հայտնել ՈՒԳԸ-ի անդամներին և հույս հայտնել, որ եկող կիսամյակում ևս դուք ակտիվ գործունեություն կծավալեք: Մասնավորապես ակնկալվում է, որ ՈՒԳԸ կարևորագույն միջոցառումը՝ տարեկան գիտական նստաշրջանը, որը վերջին տարիներին միջազգային բնույթ ունի, այս անգամ ևս կկազմակերպվի բարձր մակարդակով և նվիրված կլինի ԵՊՀ 100-ամյակին»,- ասաց Ռ. Մարկոսյանը:

 

Այնուհետև նիստի մասնակիցներն ունկնդրեցին Յունգյան դպրոցի հոգեբան, ազգագրագետ, ԳԱԱ հնագիտության և ազգագրության ինստիտուտի գիտաշխատող Լիլիթ Սիմոնյանի «Ազգային ինքնագիտակցություն» խորագրով դասախոսությունը: Ինչպես մեզ հետ զրույցում փաստեց ՈՒԳԸ նախագահ Վանատուր Շերենցը, ընդլայնված նիստերին դասախոսություններ անցկացնելը վաղուց որդեգրած քաղաքականություն է. «Մենք ուզում ենք ոչ միայն ամփոփել կիսամյակը, այլև նոր գիտելիքներ ստանալ»:

 

Ակտիվ հարցուպատասխանով ուղեկցված դասախոսությունից հետո Վանատուր Շերենցը տեսապատկերի միջոցով ներկայացրեց թվային տվյալներ կիսամյակային գործունեության վերաբերյալ:

 

«Ընդհանուր առմամբ կազմակերպվել է 186 միջոցառում, այդ թվում՝ 4 գիտաժողովներ և 2 օլիմպիադաներ: Անցկացված գիտաժողովներին հնչել է 121 զեկուցում»,- ասաց Վանատուր Շերենցը:

 

ՈՒԳԸ նախագահը ներկայացրեց նաև ֆակուլտետային ՈՒԳԸ-ների՝ կիսամյակի ընթացքում ստացած և կորցրած միավորների վիճակագրական աղյուսակը, համաձայն որի՝ գերազանց գնահատականի են արժանացել Իրավագիտության, Պատմության և Աշխարհագրության և երկրաբանության ֆակուլտետների ՈՒԳԸ-ները:  

 

Նիստի ավարտին տեղի ունեցավ պարգևատրման արարողությունը, որի ընթացքում հավաստագրեր և խրախուսական մրցանակներ ստացան գերազանց և վերապահմամբ գերազանց գնահատականի արժանացած ֆակուլտետային ՈՒԳԸ նախագահները, կիսամյակի ընթացքում մեծ ակտիվություն ցուցաբերած քարտուղարները և անդամները:

 

Քնար Միսակյան

Այլ նորություններ
ԿՐԱԿԱՅԻՆ ՊԱՏՐԱՍՏՈՒԹՅԱՆ ԳՈՐԾՆԱԿԱՆ ՊԱՐԱՊՄՈՒՆՔ ԵՊՀ ՈՒՍԱՆՈՂՆԵՐԻ ՀԱՄԱՐ
ԵՊՀ ՈՒԽ Լ. Ազգալդյանի անվան մարտական պատրաստության ակումբի նախաձեռնությամբ և ՊՆ աջակցությամբ ԵՊՀ մի շարք ուսանողներ այսօր Նուբարաշենի զորամասի հրաձգարանում մասնակցել են կրակային պատրաստության գործնական պարապմունքի:
ԾԱՆՈԹՈՒԹՅՈՒՆ ԲԱՆԱԿԱՅԻՆ ԿՅԱՆՔԻՆ. ԵՊՀ ՈՒՍԱՆՈՂՆԵՐՆ ԱՅՑԵԼԵՑԻՆ ՀՀ ՊՆ ԽԱՂԱՂԱՊԱՀ ԶՈՐԱՄԱՍ
ԵՊՀ ՈՒԽ Լ. Ազգալդյանի անվան մարտական պատրաստության ակումբի նախաձեռնությամբ այսօր ԵՊՀ տարբեր ֆակուլտետների ուսանողներ մասնակցել են ՀՀ ՊՆ խաղաղապահ բրիգադում անցկացվող տեսական պարապմունքների շարային և կրակային պատրաստություններից: