19.11.2019 | 
Կրթություն
ԵՊՀ ՈՒՍԱՆՈՂՆԵՐԸ ՀՆԱՐԱՎՈՐՈՒԹՅՈՒՆ ՈՒՆԵՆ ԱՆՎՃԱՐ ՓՈՐՁԱՇՐՋԱՆ ԱՆՑՆԵԼՈՒ ՏՏ ՈԼՈՐՏՈՒՄ ՀԱՅՏՆԻ ԸՆԿԵՐՈՒԹՅՈՒՆՈՒՄ
ԵՊՀ ՈՒՍԱՆՈՂՆԵՐԸ ՀՆԱՐԱՎՈՐՈՒԹՅՈՒՆ ՈՒՆԵՆ ԱՆՎՃԱՐ ՓՈՐՁԱՇՐՋԱՆ ԱՆՑՆԵԼՈՒ ՏՏ ՈԼՈՐՏՈՒՄ ՀԱՅՏՆԻ ԸՆԿԵՐՈՒԹՅՈՒՆՈՒՄ
Երևանի պետական համալսարանի տնտեսագիտության և կառավարման ֆակուլտետում այսօր տեղի ունեցավ հանդիպում ՏՏ ոլորտում հայտնի «Ֆիդեմ» ՍՊԸ-ի ներկայացուցիչների հետ։

Մեզ հետ զրույցում Տնտեսագիտության և կառավարման ֆակուլտետի փոխդեկան Կարեն Եղոյանն ասաց, որ ՏՏ ոլորտում հայտնի «Ֆիդեմ» ընկերությունը պատրաստակամություն է հայտնել համագործակցելու ֆակուլտետի հետ՝ կազմակերպելով բակալավրիատի և մագիստրատուրայի ավարտական կուրսերի մարքեթինգով և ծրագրավորմամբ հետաքրքրված ուսանողների անվճար փորձաշրջանը։



Հանդիպմանը ներկա էին նաև Կառավարման և գործարարության ամբիոնի վարիչ Կառլեն Խաչատրյանը, ներկայացուցիչներ ֆակուլտետի պրոֆեսորադասախոսական կազմից, տարբեր կուրսերի ուսանողներ։

«Ֆիդեմ» ընկերության մարդկային ռեսուրսների կառավարման մասնագետ Նաիրա Խաչատրյանը և վաճառքի ու մարքեթինգի մասնագետ Սվետա Սամսոնյանը պատմեցին ընկերության գործունեության մասին՝ նշելով, որ իրենք աշխատում են հիմնականում արտասահմանյան պատվիրատուների հետ։

««Ֆիդեմ»-ը ՏՏ ոլորտում 5 տարվա աշխատանքային փորձ ունեցող կազմակերպություն է։ Մենք զբաղվում ենք վեբ կայքերի, բջջային հավելվածների, ներքին օգտագործման համակարգերի մշակմամբ, դիզայնով և բիզնես խորհրդատվությամբ»,- նշեց Ն․ Խաչատրյանը։



Հանդիպման ընթացքում ուսանողներին ներկայացվեցին ՏՏ ոլորտում մարքեթինգի և վաճառքի մասնագետների հնարավորությունները և այն հմտությունները, որոնք ուսանողները կարող են ձեռք բերել այս ընկերությունում փորձաշրջան անցնելու ընթացքում։

Հանդիպման վերջում ուսանողները հյուրերին տվեցին իրենց հուզող հարցերը և ստացան կոնտակտային տվյալներ՝ ընկերությունում փորձաշրջան անցնելու նպատակով դիմումներ ներկայացնելու համար։

Այլ նորություններ
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։
«ԻՆԴՈՒՍՏՐԻԱՅԻ ՕՐ» ԵՊՀ ՄԱԹԵՄԱՏԻԿԱՅԻ ԵՎ ՄԵԽԱՆԻԿԱՅԻ ՖԱԿՈՒԼՏԵՏՈՒՄ
Երևանի պետական համալսարանի մաթեմատիկայի և մեխանիկայի ֆակուլտետն այսօր կազմակերպել էր «Ինդուստրիայի օր» խորագիրը կրող միջոցառում, որի նպատակն էր բարձր կուրսերի ուսանողներին հնարավորություն տալ ծանոթանալու ՏՏ ոլորտի ընկերությունների ներկայացուցիչների հետ և իրենց մագիստրոսական ծրագրի համար գտնելու համագործակցության ուղիներ։