02.09.2019 | 
Հասարակություն
«ԴՈՒՔ ԴԱՐՁԵԼ ԵՔ ՈՒՍԱՆՈՂՆ ԱՅՆ ՖԱԿՈՒԼՏԵՏԻ, ՈՐԸ ՀԱՄԱԼՍԱՐԱՆԻ ԱՌԱՋԱՄԱՐՏԻԿՆԵՐԻՑ Է». ԲԱՐԻ ԳԱԼՈՒՍՏ ԵՊՀ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏ
«ԴՈՒՔ ԴԱՐՁԵԼ ԵՔ ՈՒՍԱՆՈՂՆ ԱՅՆ ՖԱԿՈՒԼՏԵՏԻ, ՈՐԸ ՀԱՄԱԼՍԱՐԱՆԻ ԱՌԱՋԱՄԱՐՏԻԿՆԵՐԻՑ Է». ԲԱՐԻ ԳԱԼՈՒՍՏ ԵՊՀ ՄԻՋԱԶԳԱՅԻՆ ՀԱՐԱԲԵՐՈՒԹՅՈՒՆՆԵՐԻ ՖԱԿՈՒԼՏԵՏ
ԵՊՀ միջազգային հարաբերությունների ֆակուլտետում այսօր հանդիսավոր կերպով դիմավորեցին առաջինկուրսեցիներին:

Առաջինկուրսեցիների հետ հանդիպմանը Միջազգային հարաբերությունների ֆակուլտետի դեկան Գեղամ Պետրոսյանը, դիմելով նրանց, փաստեց, որ մեծ պատիվ և պատասխանատվություն է սովորել 100-ամյա պատմություն ունեցող համալսարանում:

 

«Դուք դարձել եք ուսանողն այն ֆակուլտետի, որը համալսարանի առաջամարտիկներից է: Քսան տարի շարունակ ֆակուլտետում պատրաստվում են բարձր որակավորում ունեցող, հայրենասեր և նվիրված մասնագետներ, որոնցից շատերը, անցնելով դիվանագիտական ծառայության կամ զբաղեցնելով պատասխանատու պաշտոններ, իրենց ուրույն ավանդն են բերում ՀՀ-ի զարգացման և նրա դերի ամրապնդման գործին»,- ասաց Գեղամ Պետրոսյանը:

 

Վերջինս ուսանողներին տեղեկացրեց, որ ֆակուլտետը ստեղծվել 1998 թվականին, որին միացել է նաև Փիլիսոփայության ֆակուլտետի կազմում գործող Քաղաքագիտություն բաժինը. «Ներկայումս Միջազգային հարաբերությունների ֆակուլտետում գործում է 3 բաժին` Միջազգային հարաբերություններ, Քաղաքագիտություն և Հանրային կառավարում»:

 

Գեղամ Պետրոսյանը, խոսելով մասնագիտական դասընթացների մասին, փաստեց, որ ֆակուլտետում մեծ տեղ է հատկացվում օտար լեզուների ուսուցմանը. «Միջազգային հարաբերություններ բաժնի ուսանողների համար եվրոպական և արևելյան լեզուների ուսուցումն իրականացվում է Դիվանագիտական ծառայության և մասնագիտական հաղորդակցման ամբիոնի դասախոսների հեղինակած ուսումնական հատուկ ծրագրերով, մեթոդական գրականությամբ, դասագրքերով, որոնք ապահովում են դասավանդման գիտական մակարդակը, որակական չափանիշները, մատչելիությունը և արդիականությունը»:

 

Նրա փոխանցմամբ, արդեն չորրորդ տարին է՝ Միջազգային հարաբերություններ բաժնում դասավանդվում է ճապոներեն և չինարեն. «Ուսումնական այս տարվանից դասավանդվելու է նաև կորեերեն»:

 

«Այսօր Արտաքին գործերի նախարարության աշխատակիցների կեսից ավելին մեր ֆակուլտետի շրջանավարտներն են: Գրեթե բոլոր դեսպանություններում և հյուպատոսական մարմիններում տարեցտարի ավելանում են մեր ֆակուլտետն ավարտած աշխատակիցները: Մենք հրաշալի կադրեր ունենք դիվանագիտական ծառայության տարբեր ոլորտներում՝ արտակարգ և լիազոր դեսպաններ, փոխդեսպաններ, առաջին քարտուղարներ, հյուպատոսներ»,- տեղեկացրեց ֆակուլտետի դեկանը:

 

Առաջինկուրսեցիների հետ հանդիպմանը մասնակցում էին նաև Հանրային կառավարման ամբիոնի վարիչ Վահագն Ագլյանը, Միջազգային հարաբերությունների և դիվանագիտության ամբիոնի վարիչ Վահրամ Պետրոսյանն ու Քաղաքական գիտության պատմության և տեսության ամբիոնի վարիչ Աշոտ Ենգոյանը, որոնք ուսանողներին տեղեկություններ հաղորդեցին ուսումնական ծրագրերի մասին և պատասխանեցին նրանց հարցերին:

 

Քնար Միսակյան

Այլ նորություններ
ՀՆԴԿԱԳԻՏՈՒԹՅԱՆ ԶԱՐԳԱՑՄԱՆ ՆՈՐ ՀԵՌԱՆԿԱՐՆԵՐ ԵՊՀ-ՈՒՄ. ԳԵՂԱՄ ԳԵՎՈՐԳՅԱՆԸ ՀՅՈՒՐԸՆԿԱԼԵԼ Է ԴԵՍՊԱՆԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունել է ՀՀ-ում Հնդկաստանի արտակարգ և լիազոր դեսպան Ն. Գ. պարոն Կիշան դան Դեվալին, որի հետ քննարկել է համագործակցության ոլորտները և ուղիները:
ՀՀ-ՈՒՄ ՀՈՒՆԱՍՏԱՆԻ ԴԵՍՊԱՆՈՒԹՅՈՒՆՆ ԱՋԱԿՑՈՒՄ Է ԵՊՀ ՀՈՒՆԱԳԻՏՈՒԹՅԱՆ ԳԻՏԱՈՒՍՈՒՄՆԱԿԱՆ ԿԵՆՏՐՈՆ-ԳՐԱԴԱՐԱՆԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունել է ՀՀ-ում Հունաստանի արտակարգ և լիազոր դեսպան Ն. Գ. տիկին Նաֆսիկա Նանսի Էվա Վրայլային, որի հետ քննարկել է ԵՊՀ-ում հունարենի ուսուցման արդյունավետությանն ուղղված աշխատանքներ: